Д.Нямхүү: Эдгэрч гарсан хүний тоо 70 боллоо
2020-06-05 11:49

Эрүүл мэндийн яамнаас шинэ коронавирус COVID-19-ийн халдварын талаар өнөөдөр ээлжит мэдээллээ хийлээ.

ХӨСҮТ-ийн ерөнхий захирал Д.Нямхүү "2020 оны зургаадугаар сарын 4-нд ХӨСҮТ-ийн вирус судлалын хоёр лаборатори, ЗӨСҮТ-ийн лаборатори болон Дархан-Уул аймгийн салбар лабораторид нийтдээ 715 хүний шинжилгээ хийснээс 710-т нь коронавирус илрээгүй.

Үүнийг задалж хэлбэл, тандалтын зорилгоор ЭНЭМҮТ, Сүхбаатар, Увс аймгийн нэгдсэн эмнэлэг, Сонгинохайрхан дүүргийн нэгдсэн эмнэлэг зэргээс цуглуулсан 14 сорьцонд шинжилгээ хийхэд коронавирус илрээгүй байна.

Мөн Дорноговь аймгийн Ханги, Мандалын боомтоор орж ирсэн 29 ачаа тээврийн жолоочид шинжилгээг хийсэн. Коронавирус илрээгүй.

Ажиглах байранд тусгаарлагдан ажиглагдаж байгаа 626 хүний шинжилгээг хийлээ.

Дархан-Уул аймгийн ажиглах байранд тусгаарлагдаж буй 17 хүний давтан шинжилгээг хийсэн. Үүнд коронавирус илрээгүй. 

Алтанбулагийн боомтоор орж ирсэн 22 ачаа тээврийн жолоочид шинжилгээ хийгдсэн. ХӨСҮТ-д татан авчирсан хоёр хүний давтан шинжилгээг хийсэн байна.

Ингээд өчигдөр хийсэн 715 шинжилгээнээс таван хүнд нь коронавирус илэрсэн. Үүний дөрөв нь оюутан, нэг нь оросын ачаа тээврийн жолооч. Орос жолооч зургаадугаар сарын 3-нд орж ирсэн, сэжигтэй тохиолдол гэж үзээд Сэлэнгэ аймагт тусгаарласан байсан. Шинжилгээний хариу нь эерэг гарсан учраас өнөөдөр ХӨСҮТ рүү татан авчирч эмчилгээнд оруулах ажил эхэлсэн.

Өнөөдөр таван хүн эдгэрч ХӨСҮТ-өөс дараагийн шатны хяналт руу шилжлээ.

Нийт батлагдсан 191 тохиолдол. Эдгэрч гарсан хүний тоо 70 болсон. Өнөөдрийн байдлаар ХӨСҮТ-д 121 хүн хяналт, эмчилгээнд байна. Биеийн байдал хөнгөн 106 хүн, хүндэвтэр 15 хүн байна" гэлээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй