Тусгай үүргийн нислэгээр Австрали, Филиппинээс иргэдээ татан авна
2020-06-05 12:50

Улсын онцгой комиссын Шуурхай штабаас ээлжит мэдээллээ хийж байна. 

Оюутолгой компани Австрали Улс руу ажилчдаа хүргэхээр МИАТ ТӨХК-ийн онгоцыг түрээсэлж нислэг үйлдэхээр болсон холбоотойгоор тус улсаас иргэдээ татан авахаар болжээ. Тусгай үүргийн нислэг зургаадугаар сарын 6-нд хөөрөх бөгөөд тус онгоцоор Австрали, Филиппин дэх монгол иргэдээ ирэх Даваа гаригт авчрах юм байна.

УОК-ын Шуурхай штабын дарга, ОБЕГ-ын дэд дарга, хурандаа Б.Ууганбаяр: “Өнөөдөр Улаанбаатар хотын 22 тусгаарлах байранд 1309 хүн байна. Орон нутагт есөн байршилд 358 хүн байгаа. Өрхийн ажиглалтад 903 хүн, өнөөдөр нэмж 216 хүн өрхийн ажиглалтад шилжинэ.

Оюутолгой компани Австрали Улс руу ажилчдаа хүргэхээр МИАТ ТӨХК-ийн онгоцыг түрээсэлж байгаа. Зургаадугаар сарын 6-нд 02:00 цагт Сидней рүү нислэг үйлдэхээр болсон. Энэ боломжийг бид ашиглаж, Австрали улсад байгаа, эх орондоо ирэх хүсэлтэй иргэдээ авчрах ажлыг зохион байгуулахаар боллоо. 

УОК-ын шуурхай штаб, цагдаагийн байгууллагатай хамтарч гэрээр тусгаарлалтад байгаа иргэдийг түүврийн аргаар сонгож, шалгасан. Нийт 94 хүнийг сонгож шалгахад 11 хүн гэртээ байгаагүй, хоёр хүний хаяг тодорхойгүй байлаа. Ийм хуулийн хүрээнд хариуцлага тооцно.  

Эх орондоо ирж байгаа иргэд маань Шуурхай штабаас гаргасан зөвлөмж, зааврыг чанд сахин биелүүлж, мэргэжлийн хяналтын байгууллагаас шаардсан үзлэгт хамрагдсан байх шаардлагатай. Татан авах, тусгаарлалтад байрлуулах зайлшгүй гарах зардлыг мөн төлөх байгаа. Ирээд 21 хоног тусгаарлалтад байж, зөвлөмжийг чанд сахина гэдгийг анхаарах хэрэгтэй" гэв.

Гадаад харилцааны яамны Консулын газрын дарга Л.Мөнхтүшиг: "Гадаадаас Монгол иргэдээ татан авах үйл ажиллагааг зогсолтгүй зохион байгуулсаар байна. Төлөвлөгөөний дагуу зарим нислэгийн зөвшөөрөл албан ёсоор гарсан. Мөн бидэнд Австрали улс руу тусгай үүргийн нислэг хийх боломж гарлаа. 

Өмнө нь тус улс руу манай улсын иргэний агаарын тээврийн нислэг огт хийгдэж байгаагүй. Энэхүү нислэгийг зарлахгүйгээр нууцаар хийх гэж байна гэх ташаа мэдээлэл гадуур байна. Тийм зүйл байхгүй юм шүү. Австрали улсаас ирэх хүсэлтэй 1000 гаруй хүний өргөдлийг уламжлал ёсоор Шуурхай штаб дээр нэрсийг хүлээн авч баталгаажуулж байна. 

Өнөө шөнө буюу зургаадугаар сарын 6-нд нислэг үйлдэнэ. Сиднейгээс даваа гарагт ирэх тус тусгай үүргийн онгоцоор 250-270 гаруй хүн ирнэ. Буцах замдаа онгоцоо Филиппин улсад цэнэглэхдээ тэнд байгаа 34 иргэнээ авна.

Өнөөдрийн байдлаар гадаадын 45 улсад байгаа 11,600 гаруй иргэн нутаг буцах хүсэлтээ өгсөн. 

Нөхцөл байдал өдөр бүр өөрчлөгдөж байна. Буцах хүсэлтэй иргэдийн тоо нэмэгдэх ч хандлагатай, буурч байгаа ч зүйл байна. Энэ нь тухайн улс орны нөхцөл байдлаас хамаарч байна. Мөн зун болж байна. Оюутнуудын хичээл амарч байгаатай холбоотой нэмэгдэж байна. Үүнийг бүсчлээд харвал, АНУ, Хойд Америкт 2600 гаруй, Азид 5500 гаруй, Европт байгаа манай улсын 2600 гаруй хүн нутаг буцах хүсэлтээ ирүүлсэн, тоо шинэчлэгдэн өөрчлөгдөж байна.

Өнгөрсөн хугацаанд бид гадаадын 30 улсаас 9,068 иргэнээ татаад авчихсан байгаа. Зөвхөн агаараар биш авто замаар мөн иргэдээ татан авч байна. Мөн ойрын хугацаанд БНХАУ-аас ирэх хүсэлтэй 160 гаруй иргэнээ авчирна. Тэр дунд оюутнууд ч байна, түр хугацаагаар яваад саатсан иргэд ч байна. Ял эдлээд суллагдсан иргэд ч байна. Бид Хятадын талтай ойрын хугацаанд яриад иргэдээ татаж авахаар төлөвлөж байгаа.   

Зургаадугаар сард нийт найман удаагийн нислэг хийхээр төлөвлөсөн талаар мэдээлсэн. Урьдчилсан тооцоогоор 2,000 орчим иргэнээ агаараар татаж авах тооцоотой байна" гэлээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй