Зам тээврийн ослоор орон нутагт таван хүн амиа алджээ
2020-06-05 16:10

Тээврийн цагдаагийн албаны Жижүүрийн шуурхай удирдлагын хэлтэст энэ долоо хоногт нийт 918 дуудлага мэдээлэл хүлээн авснаас 644 зам тээврийн ослын шинжтэй дуудлага мэдээлэл бүртгэгдсэн байна.

Зам тээврийн ослоор 24 хүн бэртэж, орон нутагт таван хүн амь насаа алджээ. 

Зам тээврийн ноцтой ослууд:

Зургаадугаар сарын 01-ний үүрийн 05:48 цагийн орчимд Хөвсгөл аймгийн Тосонцэнгэл сумын нутаг дэвсгэрт асфальтан замд Хонда Инсайт маркийн автомашин онхолдож, жолооч 31 настай, эрэгтэй Д, зорчигч 30 настай, эрэгтэй О, 29 настай, эрэгтэй Н нарын гурван хүний амь нас хохирчээ.

Зургаадугаар сарын 04-ны 10:35 цаг орчимд Архангай аймгийн Хашаат сум, Жаргалант багийн нутаг дэвсгэр асфальтан замд улсын дугааргүй Даюн маркийн Г жолоочтой мотоцикл онхолдож, жолооч 47 настай, эрэгтэй Г-гийн амь нас хохирсон байна. 

Зургаадугаар сарын 04-ний шөнийн 22:20 цаг орчимд Хөвсгөл аймгийн Мөрөн сум /аймгийн төвд/ шороон замд Мицүбиши L200 маркийн А жолоочтой автомашин, Бүргэд маркийн Г жолоочтой мотоциклтой мөргөлдөж, мотоциклийн жолооч 27 настай, эрэгтэй Г-гийн амь нас хохирсон хэргүүдийг тус тус шалгаж байна.

Мөн хяналт шалгалтын үеэр согтуугаар тээврийн хэрэгсэл жолоодсон 108 жолоочийг илрүүлж, эрхгүй үедээ согтуугаар тээврийн хэрэгсэл жолоодсон 20 хүнийг шүүхээр баривчилж, хуулийн дагуу хариуцлага тооцсон байна.

Нийт хүн бэртсэн, амь нас хохирсон ослыг хэлбэрээр нь авч үзвэл:

Явган зорчигч мөргөх хэлбэрээр - 16

Мөргөлдөх хэлбэрээр - 1

Онхолдох хэлбэрээр - 1

Үл хөдлөх цэг мөргөх хэлбэрээр - 1

Мотоцикл, унадаг дугуйтай мөргөлдөх хэлбэрээр - 5 тус тус бүртгэгдсэн байна.

Энэ долоо хоногт бүртгэгдсэн зам тээврийн осол, хэргийг өмнөх долоо хоногийн нөхцөл байдалтай харьцуулахад нийт дуудлага мэдээлэл 5,0 хувиар, бүртгэгдсэн зам тээврийн осол 7,4 хувиар, зам тээврийн ослын улмаас хүний амь нас хохирсон осол 44,5 хувиар тус тус буурч, ослын улмаас гэмтсэн хүн 12,5 хувиар өссөн үзүүлэлттэй байна.

Тээврийн хэрэгслийн хурдыг тохируулан хөдөлгөөнд оролцох, урин дулааны улирал ирж унадаг дугуй, мотоциклтой замын хөдөлгөөнд оролцох хөдөлгөөн нэмэгдсэн тул анхаарал болгоомжтой зорчих, бага насны хүүхдийг заавал насанд хүрсэн харгалзах хүнтэй замын хөдөлгөөнд оролцуулахыг Тээврийн цагдаагийн албанаас анхаарууллаа.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй