Д.Нямхүү: 413 хүнд шинжилгээ хийхэд, бүгдэд нь коронавирус илрээгүй
2020-06-16 11:36

Эрүүл мэндийн яамнаас шинэ коронавирус COVID-19-ийн халдварын талаар өнөөдөр ээлжит мэдээллээ хийлээ.

ХӨСҮТ-ийн ерөнхий захирал Д.Нямхүү "2020 оны зургаадугаар сарын 15-нд ХӨСҮТ-ийн вирус судлалын хоёр лаборатори, ЗӨСҮТ-ийн лаборатори болон Дархан-Уул аймгийн салбар лабораториудад нийтдээ 413 хүнд шинжилгээ хийхэд, бүгдэд нь коронавирус илрээгүй.

Үүнийг задалж хэлбэл, ажиглах байранд тусгаарлагдсан 16 хүний шинжилгээг хийсэн байна. Мөн тавдугаар сарын 27-нд Алтанбулагийн боомтоор орж ирсэн 358 хүний давтан шинжилгээг хийхэд коронавирус илрээгүй.

Дорноговь аймагт тусгаарлагдсан 10 хүнд давтан шинжилгээг хийхэд коронавирус илрээгүй байна. 

Тандалтын зорилгоор Увс аймгийн нэгдсэн эмнэлэг болон Сонгинохайрхан дүүргийн өрхийн эмнэлгээс цуглуулсан гурван сорьцонд хийсэн шинжилгээ болон ХӨСҮТ-д тусгаарлагдсан дөрвөн хүний шинжилгээг хийхэд коронавирус илрээгүй.

Мөн Алтанбулагийн боомтоор орж ирсэн 22 ачаа тээврийн жолоочийн шинжилгээ хийгдсэн байна.

Өнөөдөр бас сайн мэдээтэй. Нэг хүн эдгэрч ХӨСҮТ-өөс дараагийн шатны хяналт руу шилжлээ. Батлан хамгаалахын сургуулийн 19 настай сонсогч 32 хоног эмчлэгдээд гарч байна.

Нийт батлагдсан тохиолдол 197 байна. Үүнээс эдгэрч, эмчлэгдсэн 109 тохиолдол байна. Одоо эмчилгээнд 88 хүн байна. Биеийн байдал хөнгөн 80, хүндэвтэр найман хүн байна" гэлээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй