Д.Нямхүү: Сиэтл хотоос ирсэн нэг хүний сорьцонд коронавирус илэрчээ
2020-06-25 11:50

Эрүүл мэндийн яамнаас шинэ коронавирус COVID-19-ийн халдварын талаар өнөөдөр ээлжит мэдээллээ хийлээ.

ХӨСҮТ-ийн ерөнхий захирал Д.Нямхүү "2020 оны зургаадугаар сарын 24-нд ХӨСҮТ-ийн вирус судлалын хоёр лаборатори, ЗӨСҮТ-ийн явуулын лаборатори болон Дархан-Уул аймгийн салбар лабораторид нийтдээ 333 сорьцонд шинжилгээ хийснээс 332-т нь коронавирус илрээгүй байна.

Зургаадугаар сарын 24-нд Сиэтл-Улаанбаатарын тусгай үүргийн нислэгээр ирсэн зорчигчдоос 64 настай эмэгтэйн шинжилгээнд коронавирус илэрлээ. 

Бусад шинжилгээнүүдийг хэлэхэд, ажиглах байранд тусгаарлагдсан арван хүний давтан шинжилгээ, тандалтын зорилгоор Баянзүрх дүүргийн өрхийн эрүүл мэндийн төвөөс цуглуулсан хоёр сорьцонд шинжилгээ хийхэд коронавирус илрээгүй байна. 

ХӨСҮТ-д тусгаарлагдсан нэг хүний шинжилгээ, Зам-Үүдийн боомтоор орж ирсэн 29 ачаа тээврийн жолоочийн шинжилгээ болон Алтанбулагийн боомтоор орж ирсэн 37 ачаа тээврийн жолоочийн сорьцонд шинжилгээг хийхэд коронавирус илрээгүй байна.

Мөн Сэлэнгэ аймагт тусгаарлагдсан хоёр хүний сорьцонд шинжилгээг хийсэн. Коронавирус илрээгүй.

Өнөөдөр бас сайн мэдээтэй. Нэг хүн эдгэрч ХӨСҮТ-өөс дараагийн шатны хяналт руу шилжлээ. 

Нийт батлагдсан тохиолдол Монгол Улсын хэмжээнд 216. Үүнээс 169 хүн эдгэрч гарчээ. Одоо эмчилгээнд 47 хүн байна. Биеийн байдал хөнгөн 41, хүндэвтэр зургаан хүн байна.

ХӨСҮТ-д 81 хүн эмчилгээ, ажиглалт тандалтын дор байна.

Өнөөдөр өглөө 07.00 цагт буусан Москва-Улаанбаатарын тусгай үүргийн нислэгээр ирсэн 114 зорчигчоос эрэмблэн ангилалтаар гурван хүнийг сэжигтэй гэж үзэн ХӨСҮТ-д авчирч тусгаарлаад байна" гэлээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй