"Улаан"-уудын фэнүүд баярын нулимс унагаж болно
2020-06-26 11:11

Английн Премьер лигийн энэ улирлын аваргаар “Ливерпүүл” баг тодрох нь тодорхой боллоо.

Хүснэгтийн хоёрдугаарт явж буй “Манчестер Сити” урд шөнө “Челси”-д 1:2 харьцаагаар хожигдсоноор аваргалах боломжоо алдав.

Ингэснээр домогт “Битлз” хамтлагийн төрсөн хотын баг сүүлийн 30 жилд анх удаагаа Английн аварга багаар шалгарч байгаа юм. Тэд Английн аварга шалгаруулах тэмцээнийг 1992 онд Премьер лиг болгон өөрчлөхөөс хоёр жилийн өмнө буюу 1990 онд хамгийн сүүлийн удаа аваргын цомоо өргөж байлаа.

Энэ улирлын аваргын түрүү нь “Ливерпүүл”-ийн 19 дэх бөгөөд энэ амжилтаараа 20 удаа аваргын цомыг өргөж байсан “Манчестер Юнайтед”-ын дараа хоёрдугаарт бичигдэж байна.

Харин Юрген Клоппын дасгалжуулагчийн хувиар авч буй ес дэх цом гэнэ.

Өдгөө 53 настай герман мэргэжилтэн Дортмунд хотын “Боруссия”-г удирдаж байхдаа хоёр удаа Бундеслигийн аварга (2011, 2012), нэг удаа Германы цом (2012), хоёр ч удаа Германы Суперцомд (2013, 2014) түрүүлж байжээ.

Харин дөрвөн жил гаруйн өмнөөс “Ливерпүүл”-ийг дасгалжуулж эхэлснээс хойш баг нь Аваргуудын лиг (2019), Европын хөлбөмбөгийн холбооны Суперцом (2019), Дэлхийн клубүүдийн аварга шалгаруулах тэмцээн (2019) болон Английн Премьер лиг (2020)-ийг оролцуулаад дөрвөн цомын эзнээр тодроод байна.


 

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй