Д.Нямхүү: Өчигдөр Москвагийн онгоцоор ирсэн гурван оюутнаас коронавирус илэрлээ
2020-06-26 11:35

Эрүүл мэндийн яамнаас шинэ коронавирус COVID-19-ийн халдварын талаар өнөөдөр ээлжит мэдээллээ хийлээ.

ХӨСҮТ-ийн ерөнхий захирал Д.Нямхүү "Зургаадугаар сарын 25-нд ХӨСҮТ-ийн вирус судлалын хоёр лаборатори болон Дархан-Уул аймгийн салбар лабораторид нийт 171 хүнд шинжилгээ хийлээ. Үүнээс 168 хүний шинжилгээнд коронавирус илрээгүй.

Харин гурван хүний шинжилгээнд коронавирус илэрлээ. Энэ нь зургаадугаар сарын 25-нд Москва-Улаанбаатарын тусгай үүргийн нислэгээр ирсэн зорчигчдын шинжилгээг хийхэд 22-23 насны хоёр эрэгтэй, нэг эмэгтэй оюутнаас хүнд коронавирус илэрлээ. 

Бусад шинжилгээнүүдийг хэлэхэд, ажиглах байранд тусгаарлагдсан 19 хүний давтан шинжилгээ, тандалтын зорилгоор Сонгинохайрхан дүүргийн нэгдсэн эмнэлгээс цуглуулсан гурван сорьцонд шинжилгээ хийхэд коронавирус илрээгүй байна. 

ХӨСҮТ-д тусгаарлагдан ажиглалтад байгаа найман хүний шинжилгээ болон Алтанбулагийн боомтоор орж ирсэн ачаа тээврийн 26 жолоочийн сорьцонд шинжилгээг хийхэд коронавирус илрээгүй байна.

Өнөөдөр нэг хүн эдгэрч ХӨСҮТ-өөс дараагийн шатны хяналт руу шилжлээ. 19 настай цэргийн сургуулийн сонсогч 43 хоног эмчлэгдээд гарч байгаа юм.

Нийт батлагдсан тохиолдол 219 боллоо. Үүнээс 170 хүнийг эмчлэн эдгэрүүлж дараагийн шатны хяналт руу шилжүүлсэн байна. Одоо ХӨСҮТ-д 49 хүн эмчилгээнд байна. Биеийн байдал хөнгөн 42, хүндэвтэр долоон хүн байна.

ХӨСҮТ-д 88 хүн эмчилгээ, ажиглалт тандалтын дор байна" гэлээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй