Э.Бат-Үүл: Цаашид сонгууль болохоор нэр дэвшигчийг цагдан хорьдог жишиг тогтох вий гэж эмээж байна
2020-06-26 11:53

АН-ын гишүүн, ҮБХ-ны гишүүн Э.Бат-Үүл цаг үеийн асуудлаар мэдээлэл хийлээ. 

Тэрбээр “УИХ-ын ээлжит сонгууль болж өнгөрлөө. СЕХ-ноос сонгуулийн дүнг танилцуулах гэж байна. Зургаан нэр дэвшигчийг хууль бусаар цагдан хорьж байгаад сонгууль боллоо гэдэг асуудлыг сонгуулийн дүн танилцуулах албан бичигтээ заавал тэмдэглэх хэрэгтэй. Энэ асуудлыг УИХ заавал хэлэлцэх ёстой. Хууль зөрчиж шийдвэр гаргасан шүүгч нарт хариуцлага хүлээлгэх ёстой. Шүүгч хүн Үндсэн хуулийг заавал мөрдөх ёстой. “Ичсэн хүн хүн ална” гэгчээр шүүхээс хариуцлагагүй мэдэгдэл хийсэн байсан. Сонгуулийн үйл ажиллагааг Сонгуулийн хуулиар зохицуулна. Тиймээс УИХ, Ерөнхийлөгч нарт шүүхийн зүгээс Сонгуулийн хууль зөрчиж, нэр дэвшигч нарыг цагдан хорьж байгаад сонгууль явуулсан гэдгийг уламжилж байна.

Сонгууль ид явагдаж байхад Да.Ганболд тэргүүтэй АН-ын нэр дэвшигчдийг цагдан хорьсон. СЕХ-ны зөвшөөрөлгүй, шүүхийн шийдвэрээр цагдан хорьсон. Да.Ганболдын өмгөөлөгч н.Баяраа “Шүүх Үндсэн хуулиа зөрчсөн ноцтой зөрчил боллоо” гэсэн. Зургаадугаар сарын 15-ны өдөр шүүхээс Да.Ганболдын өмгөөлөгч н.Баяраатай холбогдож “Да.Ганболд хаана явна” гэж тодруулсан байсан. Ингээд сонгуулийн ажлаар явж байгаа бол дуудах шаардлагагүй гэж хэлсэн байдаг. Гэтэл зургаадугаар сарын 15-нд 10 тэрбум төгрөгийн барьцаа төлөх шийдвэр гаргаад, зургаадугаар сарын 18-нд барьцаагаа төлөөгүй гээд цагдан хорьсон. Сонгууль дуустал Да.Ганболд тэргүүтэй зургаан нэр дэвшигчийг цагдан хорьсон хэвээр сонгуулийн дүн гарлаа. Энэ бол сонгуулийн хуулийг маш ноцтой зөрчсөн үйл явдал болсон. Би сонгуулийн өмнө “Дарангуйллыг давраахгүй” гэдэг цуглаан хийсэн. Тэр цуглаанаас гарсан шаардлагыг СЕХ-ны Хуулийн хэлтсийн дарга Д.Бат-Эрдэнэд гардуулж өгсөн. Нэр дэвшигчийг СЕХ-ны зөвшөөрлөөр баривчлах ёстой ч хүний эрх, эрх чөлөөг ноцтой зөрчлөө.

Цаашид сонгууль болохоор нэр дэвшигчийг цагдан хорьдог жишиг тогтох вий гэж эмээж байна. Хүний эрхийг зөрчиж, цагдан хорьсон нэр дэвшигчдийг чөлөөлөх ёстой. Хүний эрх, эрх чөлөө гэдэг бол зөвхөн цагдан хориход байгаа зургаан нэр дэвшигчийн асуудал биш. Үндсэн хуулиар хамгаалагдсан хүний эрхийг хэн дуртай шүүгч нь дураараа зөрчөөд байж болохгүй” гэлээ.  

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй