Туул голд хоёр хүн осолджээ
2020-06-29 10:35

Туул голд хоёр хүн осолдсон харамсалтай хэрэг явдал өчигдөр болжээ.

Тодруулбал, нийслэлийн Баянзүрх дүүргийн 20 дугаар хорооны нутаг дэвсгэр, Туул голд хоёр хүн живсэн тухай дуудлага өчигдөр үдээс хойш 15:16 цагт Онцгой байдлын газарт ирсэн байна.

Дуудлагын дагуу, Аврах ангийн алба хаагчид очиж Дархан-Уул аймгийн харьяат иргэн 19 настай, эрэгтэй Э-ийн цогцсыг голын эргээс олж тус дүүргийн Цагдаагийн 3 дугаар хэлтсийн алба хаагчдад шилжүүлэн өгчээ.

Харин 20 настай, эрэгтэй С-г олоогүй тул 22:25 цагт эрэн хайх ажиллагааг түр зогсоож, өнөөдөр өглөөний 06:30 цагаас дахин эхлүүлжээ.

Ойрын өдрүүдэд усанд осолдсон дуудлага бүртгэгдсээр байна.

Тухайлбал:

Энэ сарын 26-ны өдөр Хэнтий аймгийн Баянмөнх сумын Жаргалант гэдэг газар иргэн 32 настай, эрэгтэй Г, 31 настай, эрэгтэй М, 20 настай, эрэгтэй Н нар Хэрлэн голын усанд осолдсон тухай дуудлагыг Онцгой байдлын газар хүлээн авсан.

Дуудлагын дагуу, тус аймгийн Онцгой байдлын газрын Эрэн хайх, аврах салбар болон бусад хүмүүс Хэрлэн голоор 24 км-т усаар болон голын эрэг дагуу эрэн хайх ажиллагааг зохион байгуулсан ч үр дүнд хүрээгүй тул эрэн хайх ажиллагаа үргэлжилж байна.

Түүнчлэн зургаадугаар сарын 24-ний өдөр Хэнтий аймгийн Дадал сумын Цагаан чулуут гэдэг газар 39 настай, эрэгтэй малчин Б, 5 настай, эмэгтэй С нар Хярхан голд живсэн байж болзошгүй тухай дуудлагыг Онцгой байдлын газарт бүртгэгдсэн.

Тухайн өдөр голын эргээс тухайн иргэдийн унаж явсан мотоциклыг нь олсон бөгөөд Хярхан голын дагуу 32 километрт эрэн хайх ажиллагааг зохион байгуулж, 4 удаагийн гүний шумбалт хийсэн ч үр дүнд хүрээгүй байна гэж Онцгой байдлын ерөнхий газраас мэдээллээ.

Иймд иргэдийг голын усны түвшин нэмэгдэж, үерийн байдалд шилжсэн үед зориулалтын гарцтай газраар зорчих, бага насны хүүхдийг гол усны ойролцоо тоглуулахгүй байж хараа хяналт, анхаарал болгоомжоо сайжруулахыг анхааруулж байна.​

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй