Д.Нямхүү: Нурсултанаас ирсэн хүнээс 19 хоногийн дараа коронавирус илэрлээ
2020-06-29 11:35

Эрүүл мэндийн яамнаас шинэ коронавирус COVID-19-ийн халдварын талаар өнөөдөр ээлжит мэдээллээ хийлээ.

ХӨСҮТ-ийн ерөнхий захирал Д.Нямхүү "Зургаадугаар сарын 28-нд ХӨСҮТ-ийн вирус судлалын хоёр лаборатори болон Дархан-Уул аймгийн салбар лабораторид нийтдээ 216 хүний сорьцонд шинжилгээ хийхэд 215-д нь коронавирус илрээгүй байна.

Харин нэг хүний сорьцонд коронавирус илэрлээ. Энэ нь зургаадугаар сарын 10-нд Нурсултан-Улаанбаатарын тусгай үүргийн нислэгээр ирсэн зорчигчийн гуравдахь давтан шинжилгээнд илэрлээ. Ирсэн өдөр нь авсан шинжилгээ буюу 11-нд шинжилгээний хариу сөрөг гарсан. 22-нд давтан шинжилгээ хийхэд мөн сөрөг гарсан байна. Үндсэндээ 19 хоногийн дараа коронавирус илэрлээ гэсэн үг.

Ер нь Нурсултан-Улаанбаатарын тусгай үүргийн нислэгээр ирсэн зорчигчдоос нийтдээ 10 хүнд коронавирус илрээд байна. Зургаадугаар сарын 11-нд гурван хүн, зургаадугаар сарын 22-нд дөрвөн хүн, зургаадугаар сарын 23-нд хоёр хүн, өнөөдөр нэг хүнд коронавирус нэмж илэрлээ.

Бусад шинжилгээнүүдийг танилцуулья. Ажиглах байранд тусгаарлагдсан 196 хүний давтан шинжилгээ, тандалтын зорилгоор УНТЭ, Өмнөговь аймгийн нэгдсэн эмнэлгээс цуглуулсан хоёр сорьцонд шинжилгээ хийхэд коронавирус илрээгүй. 

Алтанбулагийн боомтоор орж ирсэн ачаа тээврийн 14 жолоочийн сорьцонд шинжилгээг хийхэд коронавирус илрээгүй байна.

Сэлэнгэ аймагт тусгаарлагдсан дөрвөн хүний давтан шинжилгээг хийхэд мөн коронавирус илрээгүй.

Ингээд Монгол Улсад нийт батлагдсан тохиолдол 220 боллоо. Үүнээс 175 хүнийг эмчилж эдгэрүүлсэн байна. Одоо ХӨСҮТ-д 45 хүн эмчилгээнд байна. Биеийн байдал хөнгөн 36, хүндэвтэр есөн хүн байна" гэлээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй