Д.Нямхүү: ХӨСҮТ-д эмчлэгдсэн жирэмсэн эмэгтэй эсэн мэнд амаржлаа
2020-06-30 11:40

Эрүүл мэндийн яамнаас шинэ коронавирус COVID-19-ийн халдварын талаар өнөөдөр ээлжит мэдээллээ хийлээ.

ХӨСҮТ-ийн ерөнхий захирал Д.Нямхүү "Зургаадугаар сарын 29-нд ХӨСҮТ-ийн вирус судлалын хоёр лаборатори болон Дархан-Уул аймгийн салбар лабораторид нийтдээ 357 хүнд шинжилгээ хийсэн байна. Бүгд сөрөг буюу коронавирус илрээгүй.

Үүнийг задалж хэлбэл, ажиглах байранд тусгаарлагдсан 327 хүний давтан шинжилгээг хийлээ. Энэ бол Токио-Улаанбаатарын тусгай үүргийн нислэгээр ирсэн зорчигчид голчлон байгаа.

Мөн ХӨСҮТ-д хяналтад байгаа долоон хүний шинжилгээг хийхэд коронавирус илрээгүй.

Тандалтын зорилгоор УНТЭ, Улсын хоёрдугаар төв эмнэлэг, Баянзүрх дүүргийн өрхийн эрүүл мэндийн төвүүдээс цуглуулсан зургаан сорьцонд шинжилгээ хийхэд коронавирус илрээгүй. 

Алтанбулагийн боомтоор орж ирсэн ачаа тээврийн 23 жолоочийн сорьцонд шинжилгээг хийхэд коронавирус илрээгүй байна.

Нийт батлагдсан тохиолдол 220 байна. Үүнээс 175 хүн эдгэрч гарсан. Одоо ХӨСҮТ-д 45 хүн эмчилгээнд байна. Биеийн байдал хөнгөн 34, хүндэвтэр 11 хүн байна.

Бидэнд бас сайн мэдээ байна. Түрүүн ХӨСҮТ-ээс эмчлэгдээд гарсан жирэмсэн эмэгтэй дараагийн шатны хяналтад сувилал руу шилжилгүй ХӨСҮТ-д үлдэж хяналтад байж байгаад өнөөдөр өглөө 7.20 цагт эсэн мэнд амаржиж, охинтой боллоо. Баяр хүргэе" гэлээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй