“Сод Монгол”-ын Ц.Анандбазар сэрүүн зүүдэлж явна
2012 оны 4 сарын 12
2004 оноос л УИХ-д нэр дэвших санаа нь сонин хэвлэл болоод МАН-ын арга хэмжээнүүд дээр цухалзах болсон тэрбээр өнгөрсөн хугацаанд өөрийнхөө бизнесийг намынхаа улс төрийн нөлөөн дээр бэхжүүлж чадсанаар мөнгө, нэр хүнд, албан тушаал гурваар өвч зэвсэглэн 2012 оны УИХ-ын сонгуульд нэр дэвшихээр улайрч Дорноговь аймгийг хэдэнтээ тойрч явна. Тус аймагт “Сод Монгол Боловсрол сан” гэгчийг байгуулан түүнийхээ далбаан дор Дорноговь аймгийн бүх сумдын сургуулийн захирал, багш нарыг Улаанбаатарт авчран “Ган зам” буудалд буулган сургалт, семинар нэрийн дор сонгуулийнхаа багийг бүрдүүлж оны өмнөхөн нижгэр Шинэ жилийн баярыг тэмдэглэж байсан билээ.

Тэр ч бүү хэл өөрийн зардлаар урд хөршид олон хүнийг амрааж, нэг ёсны сонгуулийн хэсэг хороонд ажиллах хүмүүсийг баттай халааслаад байгаа ажээ. Мөн өнгөрсөн жил “Сод Монгол” групп Дорноговь аймагт нефть боловсруулах үйлдвэрийн шавь тавьж, олон зуун залуучуудыг гадаадад сургах амлалт өгч, 500 саяар сүм хийдийг сэргээн, найр наадам үүсгэж нэг ёсны мөнгөөр өөрийнхөө нэр хүндийн пирамидыг босголоо хэмээн данхалзаж явна. Гэтэл түүний энэ их мөнгөний эх үүсвэр бохир буюу улс төрийн нам доторх эдийн засгийн ашиг сонирхол бүхий бүлэглэлээр олж авсан мөнгө гэдэг нь тухайн үеийн олон нийтийн мэдээллийн хэрэгслээр бичигдэж, шүүхдэлцэж байсан ч бүх зүйлийг өөрийн талд шийдүүлдэг шидэт увдистай нөхөр болсон. Одоо улсын мөнгөөр огцом баяжсан олигархи болоод байгаа Ц.Анандбазар говь нутгийнхны сайхан сэтгэл, тарчиг амьдрал дээр нэр төр хөөцөлдөж УИХ-д сонгогдохоор сэрүүн зүүдлэн давхиж явна.
Ч.Отгоо (www.wikimon.mn)

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Үндсэн хуульд нэмэлт өөрчлөлт оруулахыг та зөв гэж бодож байна уу?
  • Тийм
  • Үгүй
  • Мэдэхгүй