08.30, Saturday
18
Орон сууц санхүүжилтийн корпораци чанаргүй барилгуудыг яах вэ?
2012 оны 8 сарын 20
Орон сууц санхүүжилтийн корпорациар дамжин худалдан авагчдаа төвөггүй олж, Засгийн газраас мөнгөө бэлнээр авч хөл дээрээ тогтсон барилгын компаниуд тухайн үедээ маш хямд материалаар чанаргүй барилга барьж байгааг тухайн үедээ хэвлэл мэдээллийнхэн зогсоо зайгүй шүүмжилж байсан. Тэр үед ам нээж хариулт өгөх хүн байхгүй байсан ч энэ бүхний үр дагавар хоёрхон жил хүрэхгүй хугацаанд нэгэнт ил болж, олон барилгууд хананы цууралт өгч, хөгцөрч, мөөгөнцөртсөөр байгаа билээ. Үүний нэг тод жишээ нь өнгөрөгч амралтын өдрүүдээр “Да хүрээ” авто захын хойд талд байрлах “Да Хүрээ” хотхонд борооны ус айл өрхүүд рүү нэвт урсаж ихээхэн хэмжээний хохирол учруулсан тохиолдол юм.

Анхны удаа биш ч гэсэн энэ удаагийн олон хоног үргэжилсэн бороотой өдрүүдэд тус хотхоны айл өрхүүд ямархуу зутруухан байдалтай байгааг Орон сууц санхүүжилтийн корпорацийнханд хэвлэлээр дамжуулан мэдээ илгээхийг хүсч сэтгүүлчдэд мэдээлэл өгсөн юм. Ашиглалтад ороод хоёр жил болоогүй хэрнээ хана, тааз нь цуурч эхэлсэн тус хотхонд бороо болон хур тунадас орох үед айлууд руу давхар алгасалгүй ус орж амьдрах аргагүй болгодог ажээ. Тухайн үедээ боломжийн үнэтэй байсан тус барилгын гүйцэтгэлийг “Мануул трэйд” гэх компани хийжээ. Дундаж хоёр өрөө байрны сарын мөнгө 80 орчим мянган төгрөг гардаг байхад тус хотхоны айлууд сарын байрны мөнгө гэж доод тал нь 150 мянга, дээд тал нь 300 мянган төлдөг аж. Ийм байтлаа хэрэглээний халуун усгүй энэ барилгад Мэргэжлийн хяналтаас ордер гаргаж, комисст хүлээж авах боломжгүй гэсэн хариу өгсөн ч айлууддаа өнөөдөр, маргааш ордероо өгнө хэмээн тайтгаруулж нүүлгээд өнөөдөр ийм байдалтай хаяад явчихсан байна.

Ганц “Да Хүрээ” хотхон ч биш Нийслэлд ашиглалтад ороод удаагүй ч эвдэрч сүйдэж, чанаргүй сантехникээс болж айлууд, оршин суугчдыг хохироож байгаа барилгууд олон байгаа ч энэ бүхэнд хариуцлага тооцох, анхаарч хяналт тавих хүмүүс байхгүй байсаар байгаа юм. Орон сууц санхүүжилтийн корпораци л гэхэд өнгөрөгч тавдугаар  сард “Байдлыг газар дээр нь очиж үзэж танилцана. Холбогдох арга хэмжээг авна” хэмээн “Да Хүрээ” хотхоны оршин суугчдыг тайвшруулсан ч өнөөдрийг хүртэл нэг ч удаа ирээгүй ажээ. Өнгөрсөн хаврын салхиар СХД-т шинэ орон сууцны барилгын гадна хавтан нурж золоор хүн даруулаагүй, мөн Нийслэлийн Захирагчийн ажлын албанаас бариулж байгаа хоргодох байр барилгынхаа явцад нурсан...

Энэ мэтээр чанаргүй хямд материалаар, чанаргүй, хурдан хугацаанд сүндэрлэсэн үнэ өртөг өндөртэй барилгын салбарт хэн хариуцлага тооцож, үүнийг хэн хянах вэ? Өнөөдөртөө Орон сууц санхүүжилтийн корпораци буруутай гэж байгаа ч Мэргэжлийн хяналтын газар болон Барилга, хот байгуулалтын яам энэ бүхэнд хариуцлага тооцох эрх бүхий үндсэн чиглэлийн газрууд юм. Барилгын салбарт чанаргүй барилга үйлдвэрлэж гаршсан компаниудыг цэгцлэх цаг нь хэдийн болсныг ар араасаа асуудал үүсгэж байгаа сантехник, бүтээн байгуулалт туйлын муутай орон сууцнууд харуулсаар байна.
У.Сарнай (www.wikimon.mn)

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Эдийн засгийг эрчимжүүлэх 100 хоногоор эдийн засаг сайжирсан уу?
  • Тийм
  • Үгүй