07.25, Friday
13
Сүү, сүүн бүтээгдэхүүнд жишиг тогтооё
2012 оны 9 сарын 13
Монголын мянганы хөгжлийн зорилт 2015 оноос хэрэгжиж эхлэнэ. Энэ зорилтын гол хэсгийг сүү, сүүн бүтээгдэхүүний үйлдвэрлэл эзлэх юм. Өөрөөр хэлбэл, зорилт хэрэгжиж эхлэхэд хоёр жилийн хугацаа үлдсэн гэсэн үг. Энэ хугацаанд сүү, сүүн бүтээгдэхүүний салбар өөрөө маш олон гажуудалтай байгаа юм.

Жишээ нь, 40.2 сая толгой малтай хэр нь том, жижгээр нь нийлүүлээд Монголд 2.6 сая хүн байгаа гэж ихээр тооцоо гаргаад үзэх юм бол дотоодын нийт сүү үйлдвэрлэж байгаа хүмүүс улс, орныхоо хэрэгцээг хангахгүй, савлагаатай сүүний сонголт төдийлөн сайн биш учир арга буюу компаниуд гадны удаан хугацаагаар хадгалалт, тээвэрлэлт хийхэд зориулан бүтээгдсэн төрөл бүрийн химийн бодистой, меламинтай сүүнүүдийг оруулж ирж хүн ардын эрүүл мэндийг аажмаар сөнөөж байгаа юм.

Өнгөрсөн хавар гуравдугаар сард ч мөн меламинтай сүү гаалиар их хэмжээгээр орж ирсэн тухай мэдээлэл тархсан ч Мэргэжлийн хяналтын газраас ямар хариу гарсан нь мэдэгдэхгүй, хэрэг тэгсгээд намжсан. Мэдээж энэ сүүг бүгдийг нь асгаж, эсвэл Хятад руу нь буцаачихаагүй нь тодорхой. Тэгэхээр ямар нэгэн байдлаар зах зээлд худалдаанд гарсан байж таарах гээд байгаа юм. Нөгөөтэйгүүр, улсын хэмжээгээр сүү, сүүн бүтээгдэхүүн боловсруулах 20 гаруй үйлдвэр ажиллах боломж нөхцөл байгаа ч өдгөө энэ боломжийг бид ашиглаж чадахгүй байгаа аж. Манай улсын хувьд үйлдвэрийн аргаар бэлдсэн сүүний эзлэх хувь бага байгаа бол хэрэглэгчид ийм төрлийн сүүг хэрэглэх соёл, сонирхол ихтэй болсон нь аргагүйн эрхэнд гаднаас орж ирсэн сүүг хэрэглэх шаардлага тулгардаг биз ээ.

Судалгаанаас харвал нэг хүн жилд дунджаар 145.2 литр сүү хэрэглэж байгаа гэсэн тооцоолол бий. Яг үнэн чанартаа бол суурингийн хүн ам 68.4 литр сүү гэсэн тооцоо гарч нормынхоо 49 хүрэхгүй хувийг хангаж байхад хөдөөгийнхөн 232 литр сүү хэрэглэж, хотынхноос 3.4 дахин илүү байдлаар хэрэгцээгээ хангадаг гэж ойлгож болох нь. Манай улс жилдээ 6.2 сая литр сүүг үйлдвэрийн аргаар боловсруулан үйлдвэрлэж, хэрэглэгчдэд хүргэдэг бол гаднаас орж ирж байгаа сүү үүнээс дөрөв дахин их байгаа юм.

Мөн сүүн бүтээгдэхүүний гол нэр төрөл болох цөцгийг дотооддоо 100 хувь үйлдвэрлэж, хэрэглэгчдээ хангах боломжтой хэрнээ жилийн жилд гаалиар гаднаас орж ирэх цөцгийн хэмжээ нэмэгдэж 200 орчим тонн болсон байх жишээтэй. Энэ бүхнээс харахад монголчууд өөрсдийнхөө бүрэн хүчин чадлаар үйлдвэрлэх боломжтой зүйлсийнхээ зах зээлийг ихэвчлэн гадныханд алдсан байгааг харж болно. Тэр дундаа бага насныхан хэрэглэж байгаа сүү, сүүн бүтээгдэхүүний үйлдвэрлэлд дэвшилтэт техник, технологи, арга барил нэвтрүүлэх шаардлага цаг үеийнхээ дагуу тулгарч байгааг энэ мэдээллээр дамжуулахыг хүслээ.
Г.Ертөнц (www.wikimon.mn)

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Эдийн засгийг эрчимжүүлэх 100 хоногоор эдийн засаг сайжирсан уу?
  • Тийм
  • Үгүй