10.21, Tuesday
-10
Ургийн гажиг аюулын харанга дэлдэж байна
2012 оны 11 сарын 20
Монгол Улсын хэмжээнд өнөөдрийн байдлаар 1000 гаруй ургийн гажигтай хүүхэд аж төрж байна. Сүүлийн жилүүдэд гаж хөгжилтэй, уруул нь сэтэрхий, хэвлий хэсэг нь хөгжөөгүй буюу гэдэс нь цоорхой, зүрхний гажигтай, илүү хуруутай бөгсний нүхгүй тархигүй хүүхдүүд төрөх нь анхаарал татахуйц хэмжээнд нэмэгдэж байгаа нь эмч, мэргэжилтнүүдийн гаргаж өгсөн тоо баримтаас ил харагдаж байгаа юм. Хамгийн харамсалтай нь эдгээр ургийн гаж хөгжилтэй хүүхдүүдийг эмчлэх мөн нийгэмшүүлэх сургууль, цэцэрлэг Монгол Улсад байдаггүй юм. Ургийн гажигтай хүүхдүүд хорвоод мэндэлж, айдас авчирч байгаа нь хэд хэдэн шалтгаантай. Нэгдүгээрт, уул уурхайн хөгжил манай улсын төсвийн авдрыг түнтийлгэж байгаа ч хойч үед сөрөг үр дагавраа авчирч байна. Нөгөөтэйгүүр, манай улсын хүн амын хүнсний хэрэглээ хэтэрхий аюултай байгаа юм. Химийн бордоогоор тарьж ургуулсан жимс ногоо мөн хадгалалтын хугацаа нь дууссан хүнсний бүтээгдэхүүн дэлгүүрийн лангуун дээр өрөөстэй байгаа ийм цэвүүн цаг хүүхдүүдэд сүүдрээ тусгаж байна.

Өөр нэгэн хүчин зүйл нь баар, цэнгээний газар тоогоо алдаж, архидалт хавтгайрч байгаа энэ үзэгдэлд бэлгийн замын халдварт өвчин хүн амын 30 хувьд нь ядууралтай адил амь бөхтэй гэгч нь оршсоноос ургийн гаж төрөлт нэмэгдэж байгаа юм. Ургийн гажигтай хүүхдүүд төрүүлэхгүйн тулд Монгол Улсын төр яг ямар ажил хийж байна вэ? Энэ асуултад Эрүүл мэндийн яамнаас хариулахдаа “Бүртгэлжүүлж байгаа” гэх юм. ДОХ-той хүн  шинээр нэмэгдэхэд ахин нэг тохиолдол илэрлээ гэж нэг ёсондоо баярын мэдээ дуулгаж байгаа мэтээр мэдээлдэг шиг яг үүнтэй адил  гажигтай хүүхдүүдийг ч мөн ахин нэмэгдлээ гэж мэдээлж чадаж байна. Өөр нэгэн тэмцэж байгаа арга нь хатуухандаа хэлэхэд  гажигтай ургийг гэдсэнд байхад амийг нь хөнөөж байгаа нь хаашаа ч хазаахгүй үнэн. Энэ мэтчилэн олон ч хүүхэд хорвоод  энэ биеэ олоогүй байхдаа чимээгүй хашгирсаар  одож байна. Ургийн гаж хөгжил манай улсын түвшинд анхаарал татахуйц хэмжээнд хүрээд байгаа учраас цаашид үүнтэй төрийн бодлогоор тэмцэх ёстой гэдгийг ч цагаан нөмрөгтнүүд хэлж байна. 

Монгол Улсад Сиамын ихэрийн тохиолдол гурван ч удаа бүртгэгдлээ. Нүдгүй, тархигүй, хэвлийгээрээ, толгойгоороо нийлсэн гажигтай хүүхэд төрөх нь анхаарал татахуйц хэмжээнд өссөн гэх хар мэдээ ч бий. Тиймээс ургийн гажигтай үрсийн ирээдүй болоод эрүүл мэндэд анхаарал тавих тусгай эмч, мэргэжилтэн бэлтгэх шаардлагатай байгаа юм. 1995 оноос хойш ургийн гажигтай хүүхдүүдийг бүртгэх болсон. Одоо үндсэндээ эрүүл мэндийн салбарынхан ургийн гажигтай тэмцэх ажил гэж байхгүй, бүртгэх ажил үүрэг гүйцэтгэж байгаа нь дэндүү өрөөсгөл байна гэдгийг шүүмжлэх нэгэн байна. Монгол Улсын хэмжээнд Эх, хүүхдийн эрүүл мэндийн үндэсний төвд ганцхан тасаг нь ганцхан эмчтэй, ургийн гажигтай хүүхдүүдийг оношилж, эмчлэх боломжтой гажигийг хяналтандаа авч эмчилдэг гэсэн.

Ер бол 1000 амьд төрөлтөд 3 хүүхэд ургийн гажигтай төрдөг гэсэн тоон судалгаа байдаг юм байна. Гэхдээ энэхүү магадлал аль 2007 оных буюу аль дөрвөн жилийн өмнөх тоо баримт гэнэ. Аюулын харанга дэлдэж байгаа, айл өрх бүрийн хаалгыг тогшиж байгаа ургийн гажигийг Монгол Улсын Засгийн газраас 5 жилд нэг удаа л тоолж судалж үздэг байх юм. Албаны хүмүүсийн өгсөн мэдээллээр бол 2007 оны тоо баримтаар 148.187 хүүхэд мэндэлснээс улсын хэмжээнд 85 хүүхэд төрөлхийн болон олдмол гажигтай байгаа юм. Нийгмийн айдсыг дагуулж байгаа хамгийн сүрдэм мэдээлэл  нь төрөлхийн гэхээсээ илүү олдмол гажигтай хүүхдүүд төрөх нь нэмэгдэж байгаа явдал. Эмч, мэргэжилтнүүд ургийн гажигийг хаа хол төр, засгийн буруу гэхээсээ илүү хүүхэд төрүүлэх гэж байгаа ээж та өөрөөсөө буруугаа хайж, эрхтхэн ээж болох бэлтгэлээ хангах ёстой гэж үзэж байгаа юм. Ургийн гажиг ингэтлээ өсөөд байгаа нь нөгөө талдаа энэ тухай эхчүүд нь ч тэр, эмч нар ч тэр хүний эрхтэй холбоотой асуудал гэж маш их нууцалдаг байх юм. Нууцын ард талд цэцэглэж байгаа айдсыг ил гаргаж, ургийн гаж төрөлттэй нялх үрсийг ханын цаана байлгасаар байвал чимээгүй өрнөх энэ тахал газар авахаар байна. Эх сурвалж www.wikimon.mn
Сэтгүүлч Г.Тэгшжаргал
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Өвөл утаа багасах уу?
  • Багасна
  • Үгүй
  • Бага зэрэг
  • Хэлж мэдэхгүй