Засаг ноён Б.Бадраа “Ду-Юан” компанитай сүжирчээ
2012 оны 12 сарын 26
Өдгөө Монгол Улс, тэр дундаа Өмнөговь аймаг баялгаараа харийнхны бүр тодруулбал хятадуудын шүлсийг асгаруулж байна. Алт, зэс, коксжих нүүрснээс авахуулаад төмрийн хүдрийг нь хүртэл хятадууд ухаад эхэлчихсэн. Баялгийг ухахдаа байгалийг бүр орвонгоор нь сүйтгэж байна. Говийн бүрдийг байтугай гүний цэнгэг усыг нь хүртэл шавхаж гүйцлээ. Үүний тод жишээ нь Өмнөговь аймгийн Номгон сумын нутаг Могойн толгой гэх газарт Хятадын 100 хувийн хөрөнгө оруулалттай “Ду-Юан” компани төмрийн хүдрийн ордыг ухаж, говийн чандмань эрдэнэ болсон гүний усаар хүдрээ баяжуулан эх нутаг руугаа зөөж байна. Гүний усаар хүдэр баяжуулах нь уг нь хуулийн зохицуулалттай аж. Гэтэл эндхийн хятад ноёд хүдрийг нь олборлоод зогсохгүй олборлосон хүдрээ Монголын говийн гүний усаар давхар баяжуулж аваад урагш гаргадгийг нутгийн иргэд төдийгүй уурхайн монгол ажилчид ч эсэргүүцэж байгаа гэнэ. Хятадын “Ду-Юан” компанийн нэрийг монголчилбол “Улаан мөнгө” гэсэн утгатай аж.
    
Тус компани 200 орчим хятад, 40 орчим монгол ажилтантай бөгөөд олборлолт эхэлсэн цагаас хойш нэг монгол ажилчин нас барж, нэг нь хүнд гэмтэл авч тахир дутуу болжээ. Нөгөөтэйгүүр, “Ду-Юан” компанийн Монгол талын нууц ноёнтон нь МАК-ийн Б.Нямтайшир гэх яриа ч бий. Тээврийн зардал энэ тэрийг хэмнэх үүднээс алдарт Бор толгойг хүртэл нүхэлж нүхэн гарц хийхээр тохиролцоонд хүрчээ. Улмаар энэхүү зам Цагаан дэрсийн заставаар дайрч Хятад улсын нутаг дэвсгэр рүү гарах юм.
    
Ёстой л мөнгө цагаан, нүд улаан гэдгийг хар хятадын санаагаар хэрэгжүүлж, баялгийг нь шавхахдаа давхар усыг нь ашиглан баяжуулаад авчихдаг нарийн аргатай гэнэ дээ. Баялгаа төдийгүй ундны нөөцөө шавхуулж байгаа говьчуудын эмгэнэлийг харин аймгийн эрх мэдэлтнүүд өнөөг хүртэл нүдэн балай, чихэн дүлий мэт өнгөрүүлж, мэдсэн ч мэдээгүй дүр эсгэж суудаг аж. Үнэндээ Өмнөговийн удирдлагууд мөнгөтэй хятадуудтай сүлбэлдэн эх нутгаа, иргэдээ хохироож байгааг нутгийн иргэд ярьж байна. Аймгийн Засаг дарга Б.Бадраа энэ компанийн ард байдаг гэх яриа ч гараад авчээ. Тэрбээр Мэргэжлийн хяналтын газрын байцаагч нарын хамт тус компанийн үйл ажиллагаа явуулж буй газарт морилж саатан буцахдаа бүгд л бэлгийн цаасан ууттай хээв нэг машиндаа сууцгаан явж байсныг хэлэх хүн ч байна. Даварсан хятадууд одоо Номгон сумын Орвог гашууны бор толгой орчмоор баяжуулсан төмрийн хүдрээ нутаг руугаа зөөхөөр болжээ. Монголын хамгийн урд цэг хэмээн алдаршсан Орвог гашууны бор толгой маань одоо тэдний хамгийн дөт зам нь болоод байгаа гэнэ. Хилийн зурвасаас 25 километр зайтай хэдий ч ухаж аваад усаар маань баяжуулсан хүдрээ хялбар, ойрхоноор нь тэрхүү “төв цэг”-ээр хил дамжуулахаар санаархаж байгаа аж.
    
Амташсан хэрээ арвангурав дахина гэгчээр хятад эзэд монгол ноёдтой хуйвалдан тохирсон бололтой. Аймгийн удирдлагуудаас гадна УИХ-ын эрхэм түшээд ч бас үүнд холбоотой сурагтай. Говийн нүүрсийг талыг там болтол нь зөөж хөлжсөн эрх мэдэлтнүүдийн нэрс ч энэ асуудалд холбоотой гэдгийг нутгийн иргэд хэлж байна. Хилийн зурвас дамжин хэдэн зуугаараа холхиж, говийн нүүрсийг зөөдөг эрх мэдэлтнүүдийн хамгаалалтад байдаг баттай ар талтай хятад ноёд “Намайг хэн хэлэхэв, нохойг хэн саахав” гэгчээр аашилдаг бололтой. Ямартай ч Монголын төмрийн хүдрийг ухдаг бас зөөдөг Сэлэнгэ аймгийн Ерөө сум дахь “Болд Төмөр Ерөө гол” гэх компани олборлосон хүдрээ хоймор нутгаас урагш төмөр замаар шууд урд нутаг руу зөөдөг бол Өмнөговь аймгийн Номгон сум дахь “Ду-Юан” компани төмрийн хүдрийг маань ухаад зогсохгүй говь нутгийн минь гүнийн усаар угааж баяжуулчихаад бүр давраад хаа дуртай газраараа хямд төсөр замаар хил давуулахаар санаархаж байгаа гэнэ. Говийн төмрийн хүдрийн ордын далд эздийг тун удахгүй бид ил болгох болно. Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Дэргэдээ дадлагажих эмнэлэггүй хувийн 16 анагаах ухааны дээд сургуулийг аттестатчлалд оруулах хэрэгтэй юу?
  • Яаралтай оруулах хэрэгтэй
  • Хэрэггүй
  • Мэдэхгүй