“Зууны луйвар” хэмээх ШО-гийн тухай баримтат кино хүүд нь цохилт болох уу?
2011 оны 12 сарын 5
- О.СОДБИЛЭГИЙН СОНГУУЛИЙН ПИАР АЛЬ ЭРТ ЭХЭЛЖЭЭ -

МҮОНТелевизийн захирал Ц.Оюундарь тэртээх 2000 оны сонгуулийн өмнөхөн Эрдэнэтийн ГОК-ийн захирал агсан Ш.Отгонбилэгийн тухай “Зууны луйвар” нэртэй захиалгат баримтат киног хийж шуугиан тарьж байсныг уншигчид мартаагүй байх. Хэрэг хуучирдаггүй гэдэг. Тэгвэл үүний дараахан УИХ-ын гишүүн агсан Ш.Отгонбилэг “МИ-8” нисдэг тэрэгний ослоор Увс аймгийн Малчин сумын нутагт таалал төгсч, харин сэтгүүлч бүсгүй Ц.Оюундарь АНУ-г зорьж нэг хэсэгтээ л тэнд сурч, амьдарсан билээ.
   
Талийгаачийг ирээдүйд Монгол улсын Ерөнхий сайд болох хүн ч гэж намынхан нь үнэлж дүгнэж байсан хэдий ч Ерөнхийлөгч Н.Багабандийн дотны анд түүнийг эрхэм нөхрийнх нь хамт улс төрөөс гаргах том тоглоом аль эрт эхэлчихсэн байсан юм. Шо-г нас барсаны дараа Завхан нутгийн сонгогчид түүний эхнэр Д.Туяаг нь дэмжиж УИХ-ын гишүүн болгосон бөгөөд эм зүйч мэргэжилтэй тэрээр ЭМ-ийн сайдаар томилогдож байлаа. Харин тэрээр Завханчуудын итгэлийг алдсан тул дахиж тэндээс сонгогдох боломжгүй болсон билээ. Нөгөөтэйгүүр, өсч төрсөн Дорноговь аймагтаа нэр дэвшсэн ч дахиж гишүүн болж чадаагүй юм. Монголын улс төрд хуучны хаант засгийн үе шиг цус ойртох явдал газар авч, нас барсан гишүүдийн эхнэр, хүүхэд, эгч, ах, дүүс нэр дэвшдэг сонин үзэгдэл дэлгэрсэн нь харин ч амжилттай хэрэгжиж, өрөвчхөн сэтгэлтэй монголчууд маань тэдний толгойг илж, сонгодог жишиг тогтоод удаж байгаа билээ.
   
Тэгвэл Ш.Отгонбилэг агсаны барагдашгүй их хөрөнгийг өвлөж үлдсэн хүү О.Содбилэг нь ирэх 2012 оны УИХ-ын сонгуулиар МАН-д хангалттай хандив, өргөл барьц тушааснаар Орхон аймагт нэр дэвших эрхээ авсан сурагтай. Үүнийгээ ч НИК компанийн дэд захирал тэрбээр хэвлэлээр нэг ПИАР-даж олонд зарласан билээ. Хамгийн гол нь нэр дэвших тойргоо сонгох асуудал нэг хэсэг эргэлзээ төрүүлж байсан бол УИХ-д сонгогдох цорын ганц боломж Орхон аймагт л байна гэж тооцоолжээ. Тэгээд ч Шо дарга цагтаа Эрдэнэтийн ГОК-ийг хөл дээр нь босгосон тул сайн эцгийнхээ нэрийг ашиглан гишүүн болох боломж тэнд л байгааг анзаарчээ. О.Содбилэг захирал сонгуулийн тогтолцооны талаар хүчтэй дуугарч улмаар Орхончуудад зориулж нэгэн өвөрмөц бэлэг, сюрприз бэлдэж байгаа гэнэ шүү. Содоо хүү эцгийнхээ амьдрал болон ГОК-т ажиллаж байсан үеийн тухай өгүүлсэн баримтат кино хийж, дурсамжийн номыг нь эрхлэн гаргаад Эрдэнэтээр нэг тарааж, “Би ийм л хүний хүүхэд шүү. Сонгохоос өөр гарц та нарт үгүй” хэмээн аль хэдийн УИХ-ын гишүүн болсон мэт сэтгэх болжээ. Тэгвэл түүний өрсөлдөгч нар ч гараа хумхилгүй сууж, алдарт “Зууны луйвар” баримтат киноны эрэлд хатаж, бичлэг энэ тэрийг нь одооноос хөөцөлдөж эхэлжээ. Бодвол сонгуулийн өмнө Эрдэнэт болон хотын бүхий л сувгаар “төлбөртэй” гэдэг нэрийн дор цацах гэж байгаа биз ээ. 
Ө.ХЭМХ /www.wikimon.mn/


Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Үндсэн хуульд нэмэлт өөрчлөлт оруулахыг та зөв гэж бодож байна уу?
  • Тийм
  • Үгүй
  • Мэдэхгүй