Дэлхийн шилдэг покерчид - Жонни Чан
2013 оны 2 сарын 6
Их гарын тоглогчид - Жонни Чан

Жонни Чан бол покерын ертөнцөд үнэхээр домогт хүн. Тэр маш содон өвөрмөц, гоц чадвараа покерын түүхэнд ха­руул­сан. Ж.Чан олон жилийн туршид хамгийн шилдэг гэдгээ харуулсан хэдий ч ирээдүйд түүний өмнө их урт зам бий.
   
Хэзээ ч хүчтэй өрсөлдөгч байдаг тэрээр 1987, 1988 онд Покерын дэлхийн цуврал тэмцээний аваргыг дараалан авсан юм. Ер нь бол гучин жилийн хугацаанд Покерын дэлхийн цуврал тэмцээний 10 бугуйвчийг авсан алдартан. Тэрбээр домогт тоглогч болохоо олон удаа харуулсан. Покерын ертөнцийн хам­гийн ширүүн тэмцээнд төдийгүй маш их мөнгөний бооцоо­той тоглолтуудад тэрбээр тогтмол дээгүүр байр эзэлж, хождог байлаа. Тэр хэзээ ч хаана ч ширээн дээрх уур амьсгалыг бүрэн удирдаж чаддаг.
   
Жоннигийн чадварыг покерын тухай Холли­вудын кинонд хүртэл гаргасан. “Rounders” кинонд 1988 оны Покерын дэлхийн цуврал тэмцээний үеэр Эрик Сайделыг урхинд оруу­лан хожсон тухай тод томруун харуулсан. Түүний покерын хөгжилд оруулсан их хувь нэмрийг үнэлэн 2002 онд Покерын шилдгүүдийн жагсаалт (Poker Hall of Fame)-д оруул­сан билээ.
    
Лас-Вегасын “World” казиногийн (одоогийн Стратосфейр) эзэн Боб Стюпак Америкийн цом гэдэг тэмцээнийг явуулдаг байлаа. Тэр тэмцээний сүүлийн шатанд би бусад есөн тог­логчийн хамт үлдэв. Тэднийг хоёр цагийн дотор л буулгаж авсан. Тэмцээний дараа Боб над дээр ирж “Жонни, чи тэднийг тэнд огт байгаагүй юм шиг л дайраад гарлаа шүү, чи яг л “Дорнын буухиа” шиг байлаа” гэв. Тэр цагаас хойш энэ нэр миний хоч болон үлдсэн юм. Энэ хоч маань миний арга барил болсон. Намайг дэлхийн хамгийн шилдэг тоглогч болоход энэ бүгд их тус болов.



• • •

Магадгүй, миний сурсан хамгийн чухал зүйл бол мөнгөний үнэ цэнийг ойлгосон явдал. Мөнгийг олох, хадгалах, хамгаалах талаар ч их зүйлийг суралцсан. Мөнгийг олох хэцүү харин үрэх маш амархан. Харин алдсан тохиолдолд эргүүлж олж авна гэдэг бүр ч  хэцүү.

• • •


Би покероор маш өндөр амжилтад хүрч чадсан. Дөнгөж покер тоглож эхэлсэн үеэ хэзээ ч мартдаггүй. Манай гэр бүл Хонконгоос АНУ-д 1968 онд намайг 11 настай байхад ирж Финикс, Аризонад суурьшсан юм. Манайхан тэнд хувийн зоогийн газартай байлаа. Гэтэл бидний хэн нь ч англи хэл мэддэггүй байв. Би англиар зөвхөн “тийм” эсвэл “үгүй” гэдэг хоёрхон л үг мэднэ. Ямар ч асуулт асуусан тэр хоёр үгээрээ л хариулах бөгөөд огт хамааралгүй асуулт байсан ч хариулт нь яг ижилхэн. Жишээ нь, хэн нэгэн “Жонни, Хонконгт өсч томроход хир байсан вэ?” гэж асуухад “Тийм ээ” л гэж хариулна.
   
Манай сургуулийн мянга гаруй хүүхдүүдээс би ганцаараа хятад байсан учир яах ч аргагүй бусдаасаа ялгарна. Эхэн үедээ англи хэл сурна гэдэг маш хэцүү байлаа. Хүүхдүүд намайг гайхан харцгаан, миний аялгаар шоолж ярьцгааж, бөөн инээд наргиан болно. Намайг гадуурхаж, дээрэлхэх явдал их гаргадаг ч би тэдэнд огт гомдоллодоггүй байсан. Энэ хэрсүүжилт маань намайг хатуужуулж өгсөн юм. Хэдийгээр надад хэлний бэрх­шээл байсан ч хичээлдээ би сайн байсан. Миний хамгийн дур­тай хичээл маань математик байлаа. Математик бол ер нь хэнд ч ойлгомжтой байдаг шүү дээ. Үнэн шүү. Тоо бодоход англи хэлийг төгс мэдэх шаардлагагүй шүү дээ.
   
Гэр бүл маань 1973 онд Хьюстон руу нүүлээ. Хьюстон ч хөгжихийн хэрээр тэндхийн ази хороолол улам томорсоор байлаа. Тэнд манайх Хой Сай Гай гэдэг том зоогийн газар нээв. Англиар “Аугаа эргүүлэг” гэсэн үг л дээ. Ази заншлаар хүүхдүүд нь гэр бүлийнхээ бизнест туслалцдаг уламжлалаас би ч бас гажаагүй. Олон цагаар ажиллаж, хийх ёстой бүхнийг нь хийдэг байлаа. Шал угаана, жорлон цэвэрлэнэ, ширээ цэвэрлэнэ, заримдаа хоол хүртэл хийдэг байв. Манай гэрийнхэн бүгдээрээ л байдгаараа зүтгэцгээсэн дээ. Тэр үед л би энэ бол миний хийх ажил биш юм байна, үүнийг насан туршдаа хийхгүй гэдгээ ойлгож авсан юм. Гэхдээ ингэж хүнд ажилд нухлагдсанаар маш олон зүйлд суралцсан. Тиймээс ч тэр бүх чанарууд на­майг өдий хүртэл авч яваа билээ. Тэр бүхнээс миний сурсан хамгийн чухал зүйл бол мөнгөний үнэ цэнийг ойлгосон явдал. Мөнгийг олох, хэмнэх, хадгалах, хамгаалах талаар ч их зүйлд суралцсан даа. Мөнгийг олох хэцүү харин үрэх амархан. Харин алдсан тохиолдолд эргүүлж олж авна гэдэг бүр ч  хэцүү.
   
Ахлах сургуульд суралцаж байх үед гэр бүлийнхээ зоогийн газарт байнга л ажиллаж байлаа. Дараа нь Хьюстоны Их Сургуульд орсон үедээ хүртэл ажилласан юм. Коллежид зочид буудлын удирдлагын чиглэлээр суралцсан ч энэ мэргэжлээрээ амьдралынхаа туршид явахгүй гэдгээ ойлгож билээ.
   
Тэрхүү зоогийн газарт ажиллаж байхдаа би анх удаагаа покер тоглож үзэв. Өнөөгийн маш олон залуус онлайнаар покер тоглож сурсан байдаг. Намайг анх покер тоглож сурч эхэлж байхад онлайн гэдэг юмны сураг ч байгаагүй. Амралтын өдрүүдэд ажлын цаг дууссаны дараа зоогийн газраа хааж бай­гаад анх тоглоцгоож билээ. Дилерийн сонголтоор 50 доллараас нэг долларын дүнгээр Др.Пеппер, бэйсбол, Мексикийн дөрвөл­жин, Холд’ем, Омаха гээд олон тоглоом тоглодог байв. Би эхнээсээ л олон төрлийн тоглоомыг зэрэг сурсан нь өдгөө янз бүрийн тоглоомын олон төрлийн тэмцээнд ямар нэгэн хүндрэл бэрхшээлгүй тоглох гол үндэс суурь минь болсон юм.
   
Тоглоомд ихэвчлэн манай зоогийн газрын ажилчид, үйлч­лүүлэгчид, найз нар тоглоно. Зарим сайн тоглосон үедээ 20 доллар хожно. Энэ нь арван хэдхэн настай хүүхдэд бол их мөнгө байсан. Тоглолт шөнөжингөө үргэлжилнэ. Үүр цайнгуут тоглоомоо дуусган хажуугийн Дэннис кафед орж, өглөөний цайгаа ууцгаана. Хожсон нь бүх хүний хоолны төлбөрийг даадаг байлаа. Энэ нь маш аз жаргалтай сэтгэгдэл төрүүлэх төдийгүй төлбөрийн тооцоог авна гэдэг нэг ёсны бахархал байж билээ.
   
Тун удалгүй тоглоом зөвхөн зоогийн газрын хүрээнээс гарч, Хьюстоны эргэн тойронд тоглоомын газрууд дэлгэрэв. Хувийн байшингууд дахь тоглолтууд ч бий болов. Тэр бүхэнд би байнга оролцдог байсан төдийгүй тоглоомдоо ч бас нухацтай ханддаг болсон. Эхэндээ задгай мөнгөний төлөө тоглодог байснаа богинохон хугацааны дараа нэлээд их хэмжээний мөнгөний төлөө тоглодог болсон юм.
   
Би үнэхээр байнга хождог болсноор хуримтлал цуглуулж эхлэв. Ингээд л “Пөөх, би үнэхээр покер тоглоод мөнгө олж байна гэж үү?” хэмээн бодох болсон юм. Хаанаас ч олж мэд­сэнийг бүү мэд, ямартаа ч тэндхийн аяллын нэг компани Лас Вегасын Лэндмарк зочид буудал руу үнэгүй аялал зохион байгуулдаг болохыг мэдэв. Тэднийх Лас Вегас руу тусгай аяллыг хүмүүст санал болгохдоо тэнд очоод заавал мөрийтэй тоглоно гэсэн болзолтойгоор уг аялалд хамруулдаг байлаа. Дөнгөж 16 настай хүүхдэд онгоцоор нисч, тансаг өндөр зэрэглэлийн зочид буудалд бууж, бусад хүмүүст “VIP” буюу “онцгой хүн” хэмээн хүндлүүлэх нь үнэхээр итгэмээргүй байсан. Энэ аялалд оролцохын тулд 2500 долларын урьдчилгаа төлж, гурван шөнө, дөрвөн өдөр аялах эрхтэй болох байлаа. Үүнд ирж, очих онгоцны тийз, өрөө, хоол унд бүгд багтана. Покер тоглож олсон мөнгөөрөө аяллынхаа төлбөрийг төлөөд хэсэг нөхдийн хамт явлаа.
   
Лэндмаркт ирсний дараа нэрийг маань бичсэн энгэрийн зүүлт өгөв. Түүнийг зүүхэд үнэхээр “онцгой хүн” шиг л санагдаж байлаа. Зүүлтийг нь цамцандаа хадаад казинод орж, шууд явсаар блэкжекийн ширээнд очив. Ширээний менежер над руу харж, нэрийн хуудсыг минь гүйлгэж уншаад нас болон бичиг баримт асуулгүйгээр “Ноён Ч. танд хэдий хэмжээний мөнгө хэрэг­тэй вэ?” хэмээн асууж билээ. Тэр үед казиногийнхон хэдэн настай эсэхийг асуух ямар ч сонирхолгүй байсан юм. Тэд зөвхөн бооцооны хэмжээг л сонирхож, хэдий хэмжээний мөн­гөөр тоглох гэж ирснийг л асууна. Би энд 1970-аад оны Лас Вегасын тухай ярьж байна. Тэр үед тэндхийнхэн “Та мөнгөтэй хэдий ч үнэмлэхгүй байж болно. Энэ бол асуудал биш. Та ийшээ явна уу” хэмээн урьж оруулдаг байсан.
   
“Танд хэдий хэмжээний мөнгө хэрэгтэй вэ?” гэж түүнийг үргэлжлүүлэн асуухад нь би “За, бүгдийг нь авья” гэснээр миний урьдчилгаанд өгсөн 2500 доллараа тэдэнд тушаасан хэрэг байлаа.
   
Орой долоон цагийн үед блэкжекийн ширээнд суув. Тэнд тийм ч сайнгүй байсан болохоор 15 минутын дараа шооны ширээн дээр очиж тоглоход мөн адил амжилт олсонгүй. Тэг­сээр байгаад долоо хагасын үед надад байсан бүх мөнгө болох 2500 доллараа бүгдийг нь алдсан юм. Юу ч үгүй болж, хүнд байдалд оров.
   
Ингээд Лас Вегаст дампуурч эхэлсэн дээ. Санхүүгийн хувьд төдийгүй сэтгэл санааны уналтад оров. Би маш их уур­лан бухимдаж, гонсойн гутарч, ичгүүртэй байдалд орж, яахаа мэдэхээ болив. Та төсөөл дөө. Хэрэв мөнгөгүй л бол таны тэр “онцгой хүн”-ий нэр хүнд болоод бусад бүх зүйл цөм утга учиргүй болно. Хамаг зүйл баларч, дээрээс нь бүхэл бүтэн чилий­сэн гурван өдөр үлдсэн байлаа. Бүх зүйл төлөвлөснөөр болоогүй тул би гадагш гарч алхахаар шийдэв. Тэр л миний хийж чадах цорын ганц зүйл байлаа. Буудлаасаа гарч хотын төв рүү чиглэв. Зуны Лас Вегасын агаарын халуун ямар гэж санана. Гэвч тэр үед би түүнийг огт анзааралгүй, мэдрэх ямар ч сөхөөгүй явсаар л байлаа. Хэрэв тэр үед цас орсон бол мөн адил мэдрэхгүй л байхсан болов уу.


• • •

Би явахаар бэлдэж эхлэв. Гэтэл казиногийн удирдлага өөр төлөвлөгөөтэй байсныг жаахан хүүхэд би яахин ойлгох билээ. Тэгээд ч Лас Вегасын казинонууд их хэмжээний мөнгө хожсон хүнийг зүгээр нэг явуулчихна гэдэг байж боломгүй зүйл.

• • •

Эцэст нь би Голден Наггетад тулж очоод дотогшоо орж хартал нүдэндээ ч итгээгүй юм. Тэнд покер тоглож байв. Би казинод покер тоглодог гэдгийг ерөөсөө мэдээгүй. Тэнд уламж­лал болсон блэкжек, шоо, рулет зэргийг л тоглодог гэж бодож байлаа. Хэрэв покер тоглодог гэдгийг мэдсэн бол Лэндмаркт хамаг мөнгөө алдахгүй байсан даа хэмээн бодсоор, тэнд тоглож байгаа хүмүүсийг хэсэг хугацаанд ажиглаж зогсов. Тэд нэг их сайн тоглодоггүй болох нь мэдрэгдэв. Би ч тоглохыг үнэхээр үхэн хатан хүсч байлаа. Та миний бяцхан асуудлыг төсөөлж байгаа биз дээ. Надад даанч мөнгө байгаагүй. Цөхрөнгөө барах­даа, яаж мөнгө олох вэ? хэмээн хэсэг бодсоны эцэст гэнэт 200 долларын хязгаартай Мастер зээлийн карттай болохоо гэнэт санаж билээ. Гэвч урьд өмнө нь хэзээ ч зээлийн карт ашиглан мөнгө авч байгаагүй учир мөнгө сольдог цонхон дээрх хүнтэй тун найрсгаар харьцаж, эвийг нь олж, эвтэйхэн асуух хэрэгтэй хэмээн бодсоор очсон юм. Би түүнтэй ямар ч тохиролцоо хийхэд бэлэн байдалтай дөхөж очив.
   
“Уучлаарай, хатагтай. Надад энэ зээлийн карт байна. Тэгээд...” хэмээн асууж эхэлтэл тэрээр миний яриаг таслан “Та тэгээд бүгдийг нь авах уу” гэв. Энэ нь маш амархан бүтэв. Зээлийн картын компани зээлийн хүү 19 хувь хэмээн мэдэгдэж, бас дээр нь ийм ч юмны шимтгэл, бас өөр хураамж гэх мэтээр баахан юм ярихыг нь би бараг сонсоогүй. Ер нь 100 хувийн хүүтэй байсан ч огт хамаагүй би авах л байсан.


• • •

Үнэхээрийн ялагч болохын тулд хамгийн түрүүнд мөнгөө алдсан хүн ямар байдгийг сайтар ойлгох хэрэгтэй гэдэгт би хатуу итгэдэг болсон. Хожсондоо сэтгэл ханамжтай байхыг мэдрэхээсээ өмнө эхлээд бүх мөнгөө алдсаны дараа ямар байдгийг мэдрэх нь хамгийн чухал гэдгийг би ойлгосон.

• • •

 
Би 200 доллараа барин шууд покерын ширээн дээр очсон. Тэнд 10-20 долларын хязгаартай Холдем тоглоомд хоёр багц улаан (5 ам.долларын) хасаа аван сууж тоглож эхэлсэн. Тэгээд бараг гурван өдөр зогсолтгүй покер тоглоод 30 мянган дол­лартай болсон. Арван хэдхэн настай хүүхэд 1970-аад оны үед халаасандаа 30 мянган доллартай байна гээд төсөөлөөд үз дээ. Би дотроо машин, үнэт эдлэл, өөр бусад олон зүйлс авна хэмээн бодож эхэлсэн. Хурдхан гэртээ харьж энэ тухайгаа гэрийнхэндээ болон найзууддаа хэлэхийг яарч байлаа.
   
Би явахаар бэлдэж эхэлсэн. Тэгтэл казиногийн удирдлага өөр төлөвлөгөөтэй байсныг хүүхэд би яахин ойлгох билээ. Тэгээд ч Лас Вегасын казинонууд их хэмжээний мөнгө хожсон хүнийг зүгээр л явуулчихна гэдэг байж боломгүй зүйл.
   
Тиймдээ ч тэд намайг зүгээр хаалгаараа алхаад гаргуулчи­халгүй хэсэг хугацаанд үлдэж, ахиад тоглохыг санал болгосон. Казиногийн босс нь надад “Ноён Чан, бид танд том өрөө, хоол, лимузин, Лас Вегаст болох ямар ч тоглолтыг үнэгүй үзэх эрх олгож байна” гэхэд “VIP” буюу “онцгой” зэрэглэл, хүндлэл бүхэн намайг эзэмдэн тэр саналыг хүлээн авсан юм. Би хожиж бол­сон юм чинь дахин давтан хожих нь тийм ч их хэцүү асуудал биш. Зөв биз дээ? Буруу.
   
Хэсэг хугацаанд сайхан байсан. Мэдээж хэрэг, тэнэг жаа­хан хүүхэд мөнгөний үнэ цэнийг яаж ойлгох билээ. Олсон хамаг мөнгөө бүгдийг алдсан. Тэгээд гэртээ хоосон, урам хугар­сан байдалтай ирсэн. Покерын ширээний ард би бусдаас илүү байд­гаа мэддэг боловч олсноо бүгдийг нь алдсандаа өөртөө маш их уурлаж байсан. Хамгийн гол дутагдал нь би алдаанаасаа су­рал­цаагүйд байсан юм. Өөрийгөө хянаж чаддаг­гүй энэ том алдаагаа ойлгох хүртлээ нэлээн хэдэн ка­зиногийн аялалд явж багагүй мөнгөө алдсаны дараа л ухаар­сан. Үнэхээрийн ялагч болохын тулд хамгийн түрүүнд мөнгөө алдсан хүн ямар байдгийг сайтар ойлгох хэрэгтэй гэдэгт би хатуу итгэдэг болсон. Хожсондоо сэтгэл ханамжтай байхыг мэдрэхээсээ өмнө эхлээд бүх мөнгөө алдсаны дараа ямар байдгыг мэдрэх нь хамгийн чухал гэдгийг би ойлгосон.
   
Лас Вегаст өнгөрүүлсэн аялал дуусч, Хьюстонд эргэн очиж сургуульдаа суралцаж, зоогийн газартаа ажиллаж эхлэв. Мэдээж хажуугаар нь хотын эргэн тойронд покер тоглож байлаа. Гэвч бүх зүйл ондоо, тэс өөр болсон байв. Миний их мөнгө хожсон туршлага амьдралын тухай бодох бодлыг минь тэр чигээр нь өөрчилсөн. Лас Вегаст их хэмжээний мөнгөө алд­сан ч гэсэн тэнд маш их хэмжээний мөнгө хийх боломжтой, бас хожих ч болно гэдгээ би мэдэж байсан. Гол нь хэзээ яаж вэ? гэдэг зөвхөн цаг хугацааны л асуудал байлаа.
   
Манай гэрийнхэн намайг Хьюстоны Их сургуулийн зочид буудлын менежментийн ангид оруулж өгсөн боловч тэнд би нэг их удаагүй. Учир нь аль хэдийнэ их хэмжээний мөнгөний амтанд орчихсон байсан юм. Сургуульд сурна гэдэг миний оюун бодлоос хол, хамгийн мухарт байлаа. Суралцаж байх хугацаандаа зочид буудлын удирдлагын чиглэлээр ажиллавал жилд ердөө 30 мянгыг л хийх боломжтойг тооцоолов. Гэтэл би Наггетад ердөө долоо хоног хүрэхгүй хугацаанд л түүнийг хийж байсан шүү дээ хэмээн бодсон.
   
21 нас хүрүүтээ сургуулиасаа гарч, хэзээ ч унтдаггүй хотод очиж, мэргэжлийн покерчин болохоор шийдэв. Би амьд­ралын­хаа туршид зоогийн газар ажиллахыг хүсээгүй. Би зөвхөн өөрөө өөртөө эзэн байхыг хүссэн. Мэдээж би үүнийхээ хажуугаар хэзээ ч зогсохгүй адал явдал, бас хамгийн чухал нь хорхой хүргэм мөнгөний амтанд хэдийнэ орчихсон байсан юм. Энэ тухайгаа гэрийнхэндээ хэлтэл тэд маш их уурлаж, бужигнажицгааж билээ. “Жонни, Лас Вегас бол нүгэл хилэнцэт бузрын хот” гэж тэд хэлээд “Чи юу бодож байгаа чинь энэ вэ?” гэж намайг мөрийтэй тоглохыг эсэргүүцсэн юм. Тэд надад хайртай учир миний төлөө санаа зовнин ингэж хэлсэн хэрэг. Тэр үед надад эд нар намайг хянахыг оролдож байна гэсэн бодол төрөв. Лас Вегасын мөрийтэй тоглоомчдоос маш цөөхөн хүн л үлддэг гэдгийг тэд мэдэж байсан. Тэр ч бүү хэл, аав маань “Хэрэв чи явах л юм бол дахиж хэзээ ч битгий ирээрэй” гэж хэлснийг санаж байна. Энэ үгс үнэхээр сэтгэлийг минь их зовоосон. Намайг л муу зүйлээс хамгаалахын тулд түүнийг ингэж хэлснийг нь би мэдэж байсан ч энэ бүхэн гэр бүлийнхнийгээ гомдоосон, үргэлжийн сэтгэл зовоосон асуудал байсныг би ойлгосон юм. Тэдний зөв ч байж мэднэ гэж би бодов. Лас Вегас хот олон хүний амьдралаар тоглосныг ч бас мэднэ. Жилд хичнээн хүн Лас Вегаст очиж, нүд ирмэхийн зуур баян болно гэсэн мөрөөдөлтэй яваад буцаж ирэхдээ толгойгоо гудайлган, сүүлээ хавчин мөлхөж ирдэг билээ дээ. Ийм хүмүүсийн тоо хэдэн мянгаар тоологдоно. Би бүсээ дахин нэг шатаар чангалахыг хүсч байна уу? гэж өөрөө өөрөөсөө асуусан. Тэгээд оролдоод үзэж болох юм гэж бодсон. Би орол­доод үзэхээр шийдсэн байлаа. Энэ бол миний амьдралын хувьд хонх цохиж байна гэдэгт би итгэлтэй байсан.


• • •

Тэр ч бүү хэл, аав маань “Хэрэв чи явах л юм бол дахиж хэзээ ч битгий ирээрэй” гэж хэлснийг би санаж байна. Энэ үгс үнэхээр сэтгэлийг минь их зовоосон доо. Намайг муу зүйлээс хамгаалахын тулд түүнийг ингэж хэлснийг нь би мэдэж байсан ч энэ бүхэн гэр бүлийнхнийгээ гомдоосон, үргэлжийн сэтгэл зовоосон асуудал байсныг би ойлгосон.

• • •


Гэрийнхнийгээ ингэж хэлсэн тэр мөчид надад эргэж буцах ямар ч зам байхгүй болсон юм. “Аав, та ингэж хэлсэндээ гэм­ших болно шүү” гэж аавдаа хэлээд “Би нэг л өдөр дэлхийн аварга болно, бас их мөнгөтэй баян болно. Би үүнийг хийж чадна. Тэгээд ч би санасандаа хүрэхийг хүсч байна” гэв.
   
Хувийн хэрэглэлүүдээ машиндаа ачиж аваад Лас Вегас руу явахаар хөдлөв. Хуучин “Камаро” машин маань л харин очих ёстой газраа хүрч чадах болов уу гэдгээс ихэд айж байлаа. Би огтхон ч эргэж харалгүйгээр гэрийнхээ үүднээс хөдлөв.
   
Лас Вегаст ирсний дараа эхэндээ нэлээд хүндрэлтэй байлаа. Тэр бүхэн нь миний муу зуршлын гай байсан юм. Покер тоглон мөнгө хожиж байсан ч олсон мөнгөө блэкжек, шоо, спортын тэмцээнд бооцоо тавьж алдана. Эсвэл хэтэрхий удаан тоглосноос тэвчээр барагдаж, буруу шийдвэр гаргана.
   
Сэтгэлийн хөдөлгөөн бол покерын туршлагатай тоглогчдын өмнө чамайг маш хурдан сүйрүүлэх гол шалтгаан нь болдог. Би бүрэн ялалт байгуулахын тулд эхлээд өөрийнхөө зан авираа хянаж сурах хэрэгтэй гэдгийг сайтар мэдэж байлаа. Гэвч ингэж хэлэхэд амархан боловч хэрэгжүүлэхэд гол учир бий. Сэтгэл хөдлөлөө хянаж сурахаас минь өмнө сэтгэл хөдлөл намайг эзэмдэж байсан болохоор олон тохиолдолд би алдаж байсан.

Хэд хэдэн удаа дампуурч, хүнд байдалд орсон учир мөнгө олохоор цагийн ажил хүртэл хийв. Хотын төвд байх “Фрэмонт” казинод тогоочоор ажиллаж эхлэв. Зууш хийгээд шигшиж байхад покерын ширээний ард хасаа хурааж байгаа мэт санагд­даг байлаа. Ажлаа дуусангуут гал тогооноос шуудхан покерын өрөө рүү очдог болов. Эхлээд бага мөнгөөр гурваас зургаан долларын хязгаартай Холдем тоглоно. Мөнгө багатай байсан учир гурваас зургаан долларын тоглоом хуримтлал цуглуулах зөв зам байлаа. Миний зорилго бол нэг тоглолтоос 50-100 доллар хожиж, хангалттай мөнгө цуглуулаад дараагийн өндөр бооцоот тэмцээнд тоглох явдал байлаа.
   
Энэ нь надад сэтгэл хөдлөлөө барих, тоглолтоо хяналтдаа байлгах боломжийг олгов. Ингэж сэтгэл хөдлөлөө дарж, хя­налт­­даа байлгахын тулд нэлээд хугацаа зарцуулав. Маш их туршлага хуримтлуулсны дараа би Лас Вегаст мэргэжлийн тоглогч болж үлдсэн юм. Тоглохоос өмнө сэтгэл зүйгээ зөв чиглүүлж өгөх хэрэгтэй. Хамгийн гол нь сэтгэл хөдлөлөө ил гаргахгүй байх, дараалан алдсан тохиолдолд сэтгэл санаагаа зөв удирдах, бас хожсон үедээ хэтэрхий сэтгэл хөөрөхгүй байх зэргийг сурав. Ажиглаад байхад даруухан, өөрийгөө хянаж чадсан хүн л голдуу хождог болохыг анзаарч билээ.
   
Нэг өдөр би ерөөсөө алдаагүй, гэхдээ яг хэзээ вэ гэдгээ тодорхой санахгүй байна. Тэр өдрөөс эхлэн хожиж эхэлсэн дээ. Маргааш нь бас хожсон, түүний дараачийн өдөр гэх мэтээр хожсоор байлаа.
   
Дорнын буухиа галт тэрэг нэгэнт хөдөлснийг би мэдэж бай­сан. Бүр хамаг хурдаараа урагшилж байлаа. 1985 онд 300-400 хүнийг хожиж, анхны алтан бугуйвчаа хүртэв. Шагналд нь 185 мянган доллар авч байлаа. Яг тэр мөчид би хийж чадсанаа мэдсэн.
    
Энэ бүх амжилт маань нүд ирмэхийн зуур болоогүй. Туулж өнгөрүүлсэн энэ бүх цаг хугацааны дараа манай гэр бүлийнхэн бодлоо өөрчлөн намайг хүлээн зөвшөөрч бүр дэмждэг болсон юм. 1987 оны Покерын дэлхийн цуврал тэмцээний Main Event-д түрүүлсний дараа Хьюстоны сонинд миний тухай нийтлэл гарах үед манай гэрийнхэн “Энэ бол манай хүү!” хэмээн хүмүүст хэлцгээж байлаа. Түүний дараа намайг амралтаараа Хьюстонд очих болгонд тэд хамаатан садан, найз нөхөд рүүгээ утасдаж “Жонни ирсэн, хүрээд ирцгээ, хамтдаа хооллоё” хэмээн дууддаг болсон юм.
   
Покерын тэмцээнд зөвхөн хожсоноор Лас Вегас дахь бүх юм дуусаагүй. Энэ бол хангалттай зүйл биш. Үүнээс гадна хожсон мөнгөө би хадгалж сурсан юм. Бусад муу зуршлаар даган алдахгүй байхыг сурах хэрэгтэй байлаа. Намайг бусдад зөвлөгөө өг гэвэл би өөрийн туулсан сургамжаас үндэслэж, хэрэв мөнгөтэй болсон бол түүнийгээ хамгаалж сур гэж л хэлнэ. Лас Вегаст байгаа залуу тоглогчдод анхаруулж хэлэхэд, тэр хавиар дүүрэн шунал бий. Хэрэв чи өөрийгөө сайтар хянахгүй бол хэдхэн хормын дотор дампуурна. Энэ бол зөвхөн казиногийн тоглоомд ч биш. Ер нь шийдэх ёстой ганц асуудал чинь юм гэдгийг санаж яв.
   

Лас Вегас бол мөрийтэй тоглоомын эх орон. Мөрий тавиг­сад кино театр, уушийн газар, зоогийн газар, дэлгүүр гээд ер нь хаа сайгүй бий. Жишээ нь, зоогийн газарт хоол идээд сууж байхад хамт хооллож байгаа хүн чинь зурагтаар гарч байгаа тэмцээнийг хараад шууд л “Энэ тамирчин талбайгаа давуулан цохино гэдэгт 100 доллараар мөрийцөх үү” гэнэ. Эсвэл хаа нэгтээгээс сонгон авсан зүйлээ хэлж мөрийцөх санал тавина. Ийм маягаар ямар ч авцалдаагүй гэнэтийн зүйлсээр хэдэн арав, зуун мянган доллараар мөрий тавьцгаадаг юм. Энэ жил болон ирэх жилд хэдэн бугуйвч авах вэ гэдгээрээ хүмүүс сая доллараар мөрийцөж байхыг би харсан. Энэ бол тийм сайхан санаа биш. Би покер тоглохдоо хамаг анхаарлаа төвлөрүүлэхийг л чухалчилдаг. Харин морь, шоо, болон элдвийн мөрийнөөс аль болох хол байхыг боддог. Юунд сайн түүнийгээ хий, дэмий сул зүйлстэй битгий орооцолд.
   
Лас Вегаст мэргэжлийн покерчин байхдаа сурсан бас нэг зүйл бол биеийн эрүүл мэндээ анхаарч сурсан явдал юм. Анх Невадад ирэхэд биеийн эрүүл мэнддээ нэг их анхаардаггүй байсан. Эрүүл мэндээ анхаарах нь покерт их чухал гэдгийг ойлгохын тулд нэлээн хэдэн жил зарцуулсан. Биеийн байдал муу үед сайн тоглоно гэдэг огт бүтэхгүй зүйл байсан. Покер тог­лоход удаан цагаар суух хэрэгтэй болдог. Удаан хугацаанд гүнзгий төвлөрнө. Үүнийг миний бие даахгүй болж эхлэв. 1970-аад онд бараг л хүн бүр тамхи татна, согтууруулах ундаа хэ­рэглэнэ, эрүүл бус хооллоно, тэр тусмаа биеийн тамираар хичээл­лэнэ гэж огт боддоггүй үе байлаа. Би ч мөн адилхан. Хэдэн жил ингэж явсаар ядарч, бие муудаж эхлэв. Тамхи, буруу хоол­лолт, хөдөлгөөний дутагдал зэрэг нь удаан хугацааны тэм­цээ­ний явцад миний тоглолтод тодорхой хэмжээгээр нөлөө­лөв. Ингээд амьдралын хэв маягаа өөрчлөхөөр шийдэж, өдөрт дөрвөн хайрцаг тамхи татдагаа зогсоож, архи уухаа больж, эрүүл хооллож, дасгал хийж эхэлснээр олон тэмцээнд амжилттай орол­цох боломжийг бүрдүүлсэн билээ. Ингэснээр эрүүл, гоо­лиг, аз жаргалтай Жонни Чан дээд түвшинд хүрэх алхмаа хийж эхэлсэн юм. Байнгын дасгал хөдөлгөөн, зөв хоол­лолт, хан­­галттай сайн унтаж амрах зэрэгтээ ихэд анхаарах болов. Үүний үр дүнд эрүүл амьдралын давуу талыг олж мэдсэнээр “Хүч чадлын ус” гэсэн нэртэй хийжүүлсэн ундаа үйлдвэрлэх биз­несээ эхлэв. Энэ ундаа одоо ч бүхэл бүтэн 14 цагийн турш хяз­гааргүй Холдемийн тэмцээнд оролцож байгаа покерчдод хүнд хэцүү үед нь цовоо сэргэлэн байдлаа хадгалахад тусалдаг юм.
   

Өнгөрсөн хэдэн жилийн туршид надтай уулзсан бараг бүх хүн “Роундерс” киноны тухай асуудаг. Покер олон жи­лийн туршид том мөнгөний тоглоом байсаар ирсэн. Гэвч маш олон хүн “Роундерс” киног үзсэний дараа хязгааргүй Техас Холд’емийг үндэстний хэмжээнд авч үзэх болсон юм. “Роундерс” киноноос өмнө Жонни Чан миний бие покерчдын хүрээнд л танил бөгөөд зөвхөн тэдэндээ л хүндлэгддэг байлаа. Харин Сиэттл, Питсбургт очиход хэн ч намайг мэддэггүй байв. Харин мэдлээ гэхэд магадгүй ганц нэг амжилтын тухай сониуч мэдээллээр бага зэрэг хальт мульт мэддэг байх. “Роундерс”-ыг гарсны дараа дэлхий даяар покер тоглодог, тоглодоггүй хүн бүр Жонни Чаныг таньдаг болсон юм. Хэзээ ч покер тоглож байгаагүй хүн хүртэл над дээр хүрч ирээд “Та чинь Техас Холд-ап тоглодог залуу мөн үү?” хэмээн асуудаг.
   
“Роундерс” кино миний амьдралыг үндсээр нь өөрчилсөн юм. Би нэг шөнийн дотор л од болж хувирсан. Түүний дараа хандив, хүлээн авалт, нээлт зэрэг олон ажиллагааны үүд хаалга нээгдэв. Эрик Сайделыг ялсан миний ялалтын дараа тэд кино зураг авахаар над руу ойртож ирээд асуухад нь, би баярлаж талархсанаа илэрхийлээд нэг бяцхан болзол тавь­сан юм. Кинонд зөвхөн би л тоглоно гэв. Кинонд намайг уялдуулахын тулд тэд Матт Дамоны дүртэй миний дүрийг холбох зорилгоор покерын ширээн дээр надтай тэмцэлдэж байгаа миний жижигхэн зураглалыг киноны төгсгөлийн нэмж хэсэгт оруулсан юм.


• • •

“Роундерс” кино миний амьдралыг үндсээр нь өөрчилсөн. Би нэг шөнийн дотор од болов.. Түүний дараа хандив, хүлээн авалт, нээлт зэрэг олон ажиллагааны үүд хаалга нээгдсэн. Эрик Сайделыг ялсан миний ялалтын дараа тэд кино зураг авахаар над руу ойртож ирээд асуухад нь, би баярлаж талархсанаа илэрхийлээд нэг жижигхэн нөхцөл тавьсан.

• • •
   

Би зургаан хүүхэдтэй. Миний сайн аав гэдэг нэр хүнд маань покерчин гэдэг нэр алдраас хамаагүй илүү. Манай хүүхдүүдээс нэг нь ч мэргэжлийн покерчин болоогүй. Тэд онлайнаар тоглодог. Бид заримдаа гэр бүлээрээ зөвхөн зугаагаа гаргах маягаар хамт тоглоно. Би тэдэнд хэзээ ч покер тоглож болно, эсвэл болохгүй гэж хэлдэггүй. Энэ асуудлыг би тэдэнд нээлтэй үлдээсэн. Харин тэдэнд сайн боловсрол олж авахыг зөвлөдөг. Хамгийн том хүү минь үл хөдлөх хөрөнгийн брокер, хүч чадлын ундааны бизнесийг маань авч явдаг. Хэрэв тэр өөрөө шийдвэр гаргаж, би мэргэжлийн покерчин болно гэж шийдвэл, мэдээж би түүнд покер яаж тоглодгыг зааж өгнө. Гэвч тэрээр одоо хүртэл өөрийнхөө сонирхлыг илэрхийлээгүй л байна. Би ч түүнийг өөрийнхөө амьдралаа өөрчил гэж хэзээ ч зөвлөхгүй. Тэр маань одоогийн амьдралдаа ханамжтай байгаа.
   
Цаг хугацааны сорилтыг давж туулж дээд амжилтуудын эзэн болсон тоглогч гэдгээрээ би түүхэнд дуурсагдана гэдэгтээ ит­гэдэг. Гуч гаруй жилийн хугацаанд 10 бугуйвч авснаас гадна миний нэр покерын ертөнцийн түүхэнд хамгийн их олонд ал­даршсан юм. Цаг хугацааны туршид ингэж тэсэн үлдэнэ гэдэг тийм амар зүйл биш. Хэрэв надад итгэхгүй бол Мөнгө хүү­лэгч хочит Крис, Жимми Голд нараас асууж болно. Тэр хоёр хоёулаа покер ертөнцийн хамгийн дээд түвшинд хүрсэн төдийгүй покерын үндсэн тэмцээнүүдэд ялсан тоглогчид юм. Дээд түвшинд гарна гэдэг ямар хэцүү болохыг тэд мэднэ. Харин тэр орой дээрээ тэсч үлдэнэ гэдэг түүнээс бүр ч хүнд хэцүү гэдгийг тэд бас хэлж чадна.
   
Дойл Брансон, Фил Хэлмут бид нар цаг хугацааны шалгар­лаар шалгарч үлдсэн покерчид юм. Даниел Нигрэану, Аллен Каннинхам, Фил Айви нар бол залуу тоглогчдын төлөөлөл. Тэд нэг их ухаан гаргалгүйгээр покерын алдартнуудын эгнээнд орцгоосон юм. Тэд анхаарлаа сайн төвлөрүүлж, түүнийгээ хад­галж, сэтгэл хөдлөлөө барьж, мөнгөө зөв удирдан тоглож чаддаг юм.

   
Гучин жил мэргэжлийн покерчин явсан хугацаагаа эргэн ха­рахад, покер надад үргэлж ивээлээ хайрлаж байжээ. Мэргэж­лийн покер надад хувийн эрх чөлөө, өөрөө өөртөө эзэн болох боломжийг олгосон юм. Амьдралын бүхий л замаар намайг хөтлөн авч явсан. Би аялах, дэлгүүр хэсэх, тансаг зоогийн газарт хооллох, усанд сэлэх, дасгал хийх дуртай. Би покер тоглох дуртай. Цаашид ч дуртай хэвээр байх болно. Гэвч тэр миний улиг болсон бодол биш. Би долоо хоногт заавал долоо, зургаа, тав, эсвэл дөрвөн өдөр ажиллана хэмээн өөртөө зорилго тавиагүй. Би одоо тоглох тэмцээнээ сонгохдоо нэлээд няхуур ханд­даг болсон. Хэрэв тогломоор санагдвал оролцоно, тоглох сэт­гэл төрөхгүй бол түүнийг алгасна. Заримдаа покерчид над дээр ирж, яаж илүү сайн тоглох вэ хэмээн асуудаг. Тэдэнд би “Өөрийнхөө хожиж чадах тэмцээндээ оролц. Ширээн дээр суу­гаад тоглож байгаа үедээ хүндрэл саадыг өөрөө төсөөл, өөрийгөө хяна. Хожих боломжтой байна уу, эсвэл ялагдахаар байна уу гэдгээ тодорхойл. Дараа нь өөрөөсөө асуух хэрэгтэй. Хэрвээ хожигдохоор байвал яагаад тоглож байгаагаа, харин хожих боломжтой санагдвал яагаад түүнээс алгасах ёстой гэж… ” хэмээн зөвлөдөг.
   
Жоннитой JohnnyChan.com гэсэн сайтаар зочлон уулзаж болно. Бас AllinEnergy.com сайтаар орж зочилж болно. Жонни Чан АНУ-ын залууст олон нийтийн боловсролыг олгоход ту­сал­даг Андре Агассигийн Сан (www.AgassiFoundation.org)-г санхүү­жүүлэн дэмждэг юм.

Үргэлжлэл бий

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
УИХ тарахыг та дэмжиж байна уу?
  • Тийм
  • Үгүй
  • Мэдэхгүй
  • Бусад