МАН-ын Н.Төмөрхүүгийн “Өндөр буянт холдинг” компани иргэдийн газрыг үнэгүйдүүлж байна
2013 оны 5 сарын 27
Нийслэлд энэ жилээс барилга, хорооллын бүтээн байгуулалтууд эрчимтэй өрнөж, гэр хорооллыг барилгажуулах хөтөлбөр үндсэндээ эхлэж байгаа. Гэхдээ хууль зүйн орчин муутай, үндсэн гэрээ тохиролцоогүй энэ ажлын хохирогч нь иргэд болж үлдэхийн ирмэг дээр байна. Өвөрхангай аймгаас УИХ-ын сонгуульд нэр дэвшин иргэд сонгогчдод “Чокопай” тарааж паянгаа тарьсан Н.Төмөрхүүгийн “Өндөр буянт холдинг” компани Нийслэлийн хэд хэдэн газрыг үнэгүйдүүлэн луйвраар авсан гэдэг. Гэтэл “А” зэрэглэлийн бүс гэж нэрлэгддэг Зурагт орчим буюу Чингэлтэй дүүргийн наймдугаар хороо, Баруун Тасганы овоо, Зүүн тасганы овоо, усан сан орчмын иргэдийн газруудыг тус компани өөрийн мэдэлдээ маш хямд зардлаар оруулахаар улайран дайрч байгаа аж.

Угаасаа энэ орчмын айлуудын дийлэнх нь өндөрлөг газарт оршдогийн дээр ихэнх айлуудын газар нь 0,07 га-д хүрдэггүй, маш бага талбайтай гэнэ. Анхнаасаа хотын захиргаанаас энэ хавийн газар дээр бүтээн байгуулалт хийнэ гэж зөвшөөрөл авахдаа “Өндөр буянт холдинг” компани иргэдийн газрыг доод тал нь 70 сая төгрөгөөр үнэлж авна гэж тохирсон аж. Гэтэл одоо болохоор нэг метр квадрат газрыг 100 ам.доллараар үнэлсэн бөгөөд иргэдийг гэрээгээ хурдан хийхийг шаардаж эхэлсэн байна. Тус хорооны зөвхөн Зүүн тасганд л гэхэд 140 гаруй хашаанд 300 орчим айл өрх амьдардаг. Эдгээр хашааны эздийн 50-иас дээш хувь буюу 75 айл нь дэмжиж гэрээ хийн гарын үсэг зурвал энэ үнээрээ батлагдах аж. Харин айлууд тус компанийн үнийн саналыг эрс эсэргүүцэж байгаа юм.

Иргэн н.Оюунтуяа:
- Иргэд бидэнд байгаа ганц баялаг, өмч гэвэл энэ багахан газар маань. Манайх л гэхэд 0,07 гад хүрдэггүй. 198 метр квадрат талбайтай. Энэ талбайгаа “Өндөр буянт” компанийн санал болгож байгаа үнээр өглөө гэж бодоход бидэнд дээд тал нь 26 сая төгрөг ногдож байгаа. Манайх хүргэнийхээ хамтаар хашаандаа амьдардаг. Гэтэл хоёр өрх нийлээд 26 сая төгрөгөөр яах юм бэ? Нэг өрөө байр ч авч хүрэхгүй мөнгө шүү дээ. Манайд энэ багахаан газраас маань өөр баялаг, өмч хөрөнгө байхгүй. Энийгээ 26 саяар өгчихөөд гудамжинд гарах уу? Ингэж байснаас өгөөгүй нь дээр. Угаасаа ч манай энэ хавийн иргэд энэ үнийг хүлээн зөвшөөрөхгүй эсэргүүцэж байгаа.

Иргэн Байгальмаа:
- Манай газрыг энэ компани анх 75 саяар авна гэж байсан. Манайх 300 орчим метр квадрат газартай. Нэг давуу тал нь бүх зөвшөөрөл бий. Усан сан орчмын айлууд өндөрлөг газарт байдаг болохоор зарим ганц нэгхээн айл газраа өгье гэж очиж гэрээ байгуулсан гэсэн. Гэхдээ үнэн, худлыг нь мэдэхгүй байна. “Өндөр буянт” компанийн эзэн Н.Төмөрхүү гэгч бидэнтэй ирж өөрийн биеэр уулздаггүй хэрнээ манай компани дээр ирж гэрээгээ хурдан хий гэж шахдаг. Хотын захирагч газрыг үнэд хүргэж зараарай гэж бидэнтэй ирж уулзахдаа хэлсэн. Тэгсэн хэрнээ энэ компаниудыг хямдхан ав гэчихсэн юм уу? Мэдэхгүй юм. Ямартай ч бид газраа 100 ам.доллараар үнэлж өгөх боломжгүй. Эсвэл өөр компанид үнэ хүргэж зарсан нь дээр. Энэ байдлыг холбогдох хүмүүст нь уламжлаад, хэлж яриад өгвөл сайн байна. Энэ амралтын өдрүүдээр уулзалт хийж байгаа ч багагүй маргаан үүсч байна.

Зурагт орчмын иргэд ийнхүү ярьж байна. Тусгаар тогтнолын ордны барилгыг барьсан, Оргил рашаан сувиллын газрыг луйвардсан, хятад ажилчдыг бөөн бөөнөөр нь оруулж ирдэг, өвөл барилга барьсанаас болж хүний амь насанд хүрч байсан гээд тус компанитай холбоотой олон таагүй мэдээлэл байдаг. Угаасаа Н.Төмөрхүү гэгч нь МАН-ын Бага хурлын гишүүн, өөрөө сонгуульд нэр дэвшихдээ Сонгуулийн хууль зөрчиж байсан хүн иргэдийг юман чинээ тоохгүй ийнхүү өөрт нь байгаа ганцхан хөрөнгө болсон газрыг нь үнэгүйдүүлэхээр улайрч байгаа байдалд холбогдох албаны хүмүүс нь анхаарлаа хандуулах биз ээ. Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Үндсэн хуульд нэмэлт өөрчлөлт оруулахыг та зөв гэж бодож байна уу?
  • Тийм
  • Үгүй
  • Мэдэхгүй