Дэлхийн шилдэг покерчид - Крис Фергюсон
2013 оны 6 сарын 10
Их гарын тоглогчид - Крис Фергюсон

“Есүс” хочит Крис Фергюсон дэлхийд хүлээн зөвшөө­рөгдсөн цөөн тооны шилдэг тоглогчдын нэг. Тэрээр покерын олон тэмцээнд гайхамшигтай амжилтуудыг үзүүлсэн юм. К.Фергюсон Покерын дэлхийн цуврал тэмцээний Main Event, NBS National Heads-up, Circuit Championship Title-ын аваргыг оролцуулаад таван удаа түрүүлж, нийтдээ 7.5 сая доллар хожсон байна.
    
Математик шинжилгээний арга голчлон ашигладаг тэрээр интернэт покерын хувьсгал гарахаас өмнө тог­лох өрсөлдөгчдөө интернетээр судалж, стратегийн төлөв­лөгөөгөө боловсруулдаг байжээ.
    
Урт үс, сахал, ковбой малгай нь түүнийг покерийн ертөнцийн хамгийн содон хүмүүсийн нэг болгосон гэдэг. Покерын шилдгүүдийн нэг болох Фергюсоны өөртөө итгэл­тэй, төлөв даруу байдал аймшигтай мэт харагдуулдаг. Энэ нь өрсөлдөгчдийг нь чипнээс тусгаарлаж орхидог гэж хэлж болно. Ямар нэг тэмцээнд оролцоогүй үедээ тэр өөрийн байгуулсан “Full Tilt Poker”-ийн онлайн тоглолтод оролцож, түүнийгээ хөгжүүлэхэд өөрийн хувь нэмрээ оруулдаг. Крисийг энэ сайтаас “олж” болно.


   
Покерчид Крист ойр байдаг хөгжөөн дэмжигчид түүнийг “Есүс” гэж дууддаг, энэ нь насан туршийнх нь хоч болжээ. “Хэрэв та нар намайг харвал яагаад ийм нэр хочтой болсныг төвөггүй ойлгоно, хэн нэгэн намайг ингэж хочлоогүй, зүгээр л ийм хочтой болсон” гэж Крис хэлж байв. “Ер нь энэ хоч нэлээн түгээмэл байдгийг би сүүлд ойлгосон. Гудамжинд явж байхад албаны хувцастай олон хүн надтай таарч “Сайн уу, Крис, намайг урт үс, сахалтай байхад хүмүүс бас Есүс гэж дууддаг байсан” гэцгээдэг.
    
Крис бүхий л амьдралынхаа туршид тоглосоор ирсэн. Пэсифик Палисайдэст өссөн түүний хүүхэд нас аж жаргалтай, сургууль соёлын асуудал ч тааламжтай байжээ. Тэр өнөөдрийн ихэнх тоглогчдод түгээмэл байдаг ямар нэг хүнд байдал, сэтгэл санааны дарамтгүйгээр амьдралаа өнгөрүүлэв. Түүний гэр бүлийнхэн их дотно, ихэнх цагаа бүгд нийлж тоглоом тог­лодог, покер нь тэр олон тоглоомын нэг байв. Тэрбээр бүр багаасаа покер тоглож сурчээ. Яг хэдэн настайгаасаа эхэлж тоглож сурснаа санахгүй байгаа ч мөнгөний төлөө хэзээ тоглож эхэлснээ тодорхой санадаг. “Дөрөвдүгээр ангид байхдаа ан­гийн­хаа хэдэн хүүхдүүдтэй хамт хичээлийн завсарлага, зарим­даа бүр хичээлээ таслан байж, таван хөзрийн покер тоглодог байснаа” дурсдаг.
   
Нэгэн удаа гурван хатантай байж байгаад флашт хожиг­дож, 35 цент алдан өдрийн хоолныхоо мөнгийг салхинд хийсгэсэндээ ихэд харамсч байсан гэдэг.  
   
Ахлах ангид сурч байхдаа сургуулийнхаа хэсэг хүүхдүүд­тэй хамт тогтмол шахуу тоглож, долоо хоногийн сүүлчээр найзуудын­хаа гэрт ээлжлэн очиж, олон төрлөөр, голдуу 50 центээр өсгөх хязгаар тогтоон тоглодог болжээ. Заримдаа өөрсдөө дүрэм зохиож, түнийгээ дилер нь шийдэн шөнийн хоёр гурван цаг хүртэл тоглохдоо 20 доллар алдах эсвэл хождог байв. Ахлах ангид байхдаа зөвхөн зугаа болгон покер тоглож, хожсон үе нь түүнд сайхан санагддаг байжээ. Гол нь тэр энэ тоглоомд дурласан байсан төдийгүй түүнийг нь өдөөж өгөхөд улам ихээр татагджээ. Тоглоом тоглохдоо бүр эхлэхээсээ л Крис Фергюсон учрыг нь олохыг хүсдэг байж. Тоглоомын мөн чанар нь боломжийг зөв тодорхой ойлгох, тоглоомын математик магадлалыг тооцох явдал гэдгийг тэр сайтар мэдэрчээ.
   
Коллежид байхдаа тэр үргэлжлүүлэн тоглож, интернэтийн эхний хувилбар болох IRC сувгаар покер тоглодог байжээ. Гэхдээ мөнгөөр тоглодоггүй байсан учир Лас Вегас руу үе үе очиж, 1-4 долларын ширээн дээр тоглодог байв. Чингээд хэрэв би хүлээцтэй байж, зөвхөн маш сайн хөзөр ирсэн тохиолдолд орвол нэг цагт дөрвөн доллар хийж болох юм байна гэдгийг ойлгосон ажээ. Покер тоглон мөнгө олж, түүгээрээ амьдарч болох уу? гэсэн асуултыг өөртөө тавьж, цагт дөрвөн доллар олж түүгээрээ амьдарч болно гэж тооцвол, би амжилттай байж болох юм байна гэсэн дүгнэлтэд хүрэв.

• • •
Тоглоом тоглож эхлэхээсээ өмнө Крис Фэргюсон тоглоомынхоо учрыг нь олохыг хүсдэг. Тоглоомын мөн чанар нь боломжийг зөв тодорхой ойлгох, тоглоомын математик магадлалыг тооцох явдал гэдгийг тэр мэдэрчээ.
• • •
    
1994 оноос эхлэн покерт хандах Крисийн хандлага өөрч­лөгдөж эхэлжээ. Тиймээс  покерт нухацтай хандаж, тоглоомын мастер болохоор шийдсэн байна. 1994-2000 оны хооронд тэр покер тоглогч л байсан. Тоглох хугацаандаа математикийн онолд тулгуурлан өөрийн авъяас чадварыг хөгжүүлэхэд ан­хаарч, компьютер загварчлалын тусламжтайгаар хэрхэн ам­жилттай тоглох тактикаа боловсруулахыг хичээж байв. “Мянга мянган хувилбарыг компьютерээр боловсруулж, хам­гийн боломжит стратегийг олохыг” оролдож байснаа ч бас өгүүл­жээ. Тэрбээр мэдээллийн технологийн шинжлэх ухааны доктор (Ph.D) цолтой, покерын мастер болохдоо хамгийн шилдэг аргыг компьютер ашиглан боловсруулж байжээ.

• • •
Маш олон хүн покер тоглоход зугаатай байдаг гэдэг ч над шиг нарийн судалж, шинжилж, түүнээсээ таашаал авдаг хүн тун ховор.
• • •

Маш олон хүн покер тоглоход зугаатай байдаг гэдэг ч над шиг нарийн судалж, шинжилж түүнээсээ таашаал авдаг хүн тун ховор. Ер нь ихэнх хүмүүс покер тоглохдоо хүнээр, эсвэл багшаар заалгасан байдаг. Харин Крисийн хувьд тэр өөрөө сурсан. Энэ тохиолдолд өөрөө өөртөө багшилсан, мянга мянган хувилбаруудыг тооцоолон өөрийн аргачлалыг боловсруулжээ. Одоо хүртэл Крис покер тоглодог олон найзтай, тэднээсээ зөвлөгөө авч, тоглоомноосоо өөртөө таашаал авдаг гэдэгтээ итгэдэг. Мөн “покер тоглодог хүн бүр өөрийн дотны зөвлөхтэй байх хэрэгтэй, аливаа асуудлыг харилцан зөвлөж байх нь дээр. Гэхдээ даанч надад тийм хүн байгаагүй, байсан ч болоосой гэж би боддог. Бодоод үз л дээ, найзтайгаа зэрэгцэн суугаад хөзрөө харуулаад яаж ийм болов, юу болчихов, яаж болох байсан бэ гээд хоорондоо зөвлөн ярилцахад их олон зүйлийг хурдан хугацаанд сурна даа “ гэж тэр хэлэв.
    
Фергюсон Лас Вегас, Калифорни орчмоор тэмцээнд орол­цож байхдаа ч математик аргачлалаа туршин боловсруулж байв. “1994, 1995 онд томоохон тэмцээнд оролцолгүй, мате­матик загварчлалаа улам боловсронгуй болгож, туршиж үзсэн. Математик шинжилгээ нь байж болох боломжуудаас илүү тодор­хой нөхцөлд яаж тоглох ёстойг харуулсан. Олон тоглогч хөзрийн тодорхой хослолуудтай үе дэх боломж, магадлалыг мэддэг ч тэдгээрийн ихэнх нь тэрхүү шинжилгээг дараачийн түвшинд гартал нь судалж чаддаггүй” гэж Крис өгүүлэв.
    
Дэлхийн шилдэг мэргэжлийн покерчид өөрсдийнхөө хэм­жээнд тоглож чаддаггүй гэдгийг Крис анзаарчээ. “Компьютер загварчлалын тусламжтайгаар тухайн нөхцөлд яаж тоглох вэ гэдгийг би аль хэдийнэ боловсруулсан” гэж тэр хэлсэн удаатай. Тэгэхэд тэдгээр шилдэг тоглогчид яг ийм нөхцөлд том алдаа гаргадаг. Энэ нь маш их мөнгө хийдэг хүмүүст хүртэл сайжрах боломж их байгааг хэлсэн хэрэг. Заримдаа Крис шилдэг тоглогчидтой ярилцаж, алдааных нь тухай зөвлөхөд, тэд хүлээж авдаггүйгээр барахгүй өөрсдийн хуучин аргатайгаа тас зууралдан үлддэг байна. “Математик аргаар тайлбарлан батлаад, миний зөв байхад хүртэл үл ойшоодог. Сайн тоглогчид тухайн нөхцөлд яахаа мэдэхгүй байхад дөнгөж эхлэн суралцаж байгаа хүмүүс миний зөвлөгөөг огт ойлгодоггүй юм” гэжээ.

• • •
Учир нь мөнгөний тоглоомд оролцож болох ч тэнд өндөр чадвартай тоглогчдын өмнөөс тоглох, тэдэнтэй өрсөлдөх боломж байгаагүй, өрсөлдөж ч байгаагүй.
• • •
 
Покер тоглох чадвараа сайжруулахын тулд та яагаад мөн­гөний тоглоомоос тэмцээнийг илүү гэж үзсэн бэ? гэсэн асуултад, “1990-ээд оноос миний гол зорилго бол хамгийн өндөр төвшинд покер тоглож сурах байлаа, үүний хамгийн шилдэг хувилбар нь мөнгө олох зорилгоор биш тэмцээнд оролцох явдал байсан. Учир нь мөнгөний тоглоомд оролцож болох ч тэнд өндөр чадвартай тоглогчдын өмнөөс тоглох, тэдэнтэй өрсөлдөх боломж байгаагүй, өрсөлдөж ч байгаагүй” гэжээ.
    
Бага хэмжээний шагналтай тоглоомд мэдээж их мөнгө хожихгүй ч тэнд цагийг зугаатай өнгөрөөх гэсэн хүмүүс л бай­даг. Тэдний зарим нь покерыг бараг сайн мэдэхгүй, маш олон хөзөр дуудна, худлаа хэтэрхий их хөөргөнө, сонин хос­лолоор олон удаа азаа үзнэ. Ийм тоглоомноос түүний чад­вар сайжрахгүйг тэр ойлгожээ. Тэмцээн бол үүнээс өөр, бүх утга учрын хувьд. Бага хэмжээний шагналтай тэмцээнд хүртэл оролцогчид бүгд ажил хэрэгч, зүгээр нэг цаг өнгөрөөх гэсэн байдалтай биш байдаг. Тэмцээнд оролцогчид нь мөнгөө хаяж азаа үзэгчид биш, тэд бүгдээрээ хожих хүсэлдээ автсан хүмүүс юм. Хэрэв тэд алдвал маш хүнд тусган авдаг, яг ийм л хүмүүстэй, тэдгээрийн эсрэг тоглох хүсэлтэй байв.
   
Крис 90-ээд оны дунд үеэс тоглож сурах гэж нэлээд хэдэн бодит алхмыг хийж эхэлжээ.  Эрчимтэй өсөлт хэрэгтэй гэж үзсэнээс тухайн үеийн шилдэг тоглогчидтой тоглох ёстойг ухаарав. Гэвч тэдгээр шилдэг тоглогчид бага шагналтай тэмцээнд бараг ордоггүй байж. Том тоглогчид том мөнгөөр, том шагналтай тэмцээнд л оролцоно. Тэр үед Крист том тэмцээнд орох мөнгө байсангүй, тиймээс тэр багахан мөнгөн шагналтай тэмцээнд оролцдог байв. Нэлээн сайн тоглогчид хүртэл тухайн үед тиймэрхүү тэмцээнд оролцдог байжээ.

• • •
Покерын талаар их зүйл сурахын тулд би хамгийн хүнд тоглоомыг, хамгийн шилдэг тоглогчидтой хамт тоглохыг хүсдэг байсан. Энэ нь зардалгүй, үр дүнтэй арга биш байж болох юм, гэхдээ үүнийг дагаарай гэж покер сурч байгаа хүмүүст зөвлөж чадахгүй ч энэ арга миний хувьд их тус болсон юм.
• • •

Крис өөрийн сонголтыг хийж шилдэг тоглогчидтой хамт тог­лохоор тэмцээнд орж эхлэв. Тэр үед томоохон мөнгөтэй тэм­цээнүүд цөөхөн байлаа. Жилдээ 10 мянган долларын шагналтай тэмцээн хоёр удаа, 5000 долларын тэмцээн хэдхэн удаа болдог, өнөөдрийнх шиг олон тэмцээн байгаагүй юм. Өнөөдрийн покерын ертөнцийн хувьд сайн тоглогчдыг жижиг тэмцээнээс олохгүй, харин 90-ээд оны дундуур том тэмцээн цөөхөн болдог байсан учраас шилдэг тоглогчдыг жижиг тэмцээнүүдээс амархан олж болдог, тэдэнтэй хамт тоглохыг тэрээр хүсч байв.
    
Ингэж тоглосноор Крис өөрийн стратегийг шинэ түвшинд гаргаж чадсан байна. Мэргэжлийн гэгдэх Т.Ж.Клаутиэр, Мастер Мен, Фил Хэлмут зэрэг хүмүүстэй тэр тоглож байжээ. Покерын мэргэжилтнүүдийн дүгнэлтээр, ихэнх покерчид амархан тог­лолтыг мөрөөддөг, тэд өрсөлдөгчдөөсөө хялбархан аргаар мөнгийг нь салгаж авахыг хүсдэг. Гэвч түүний хувьд энэ ар­гыг гол болгоогүйгээс гадна хялбар аргаар покер тоглохыг бодолгүй, зөвхөн суралцах зорилготой байлаа. Тоглоомын тухай бүгдийг мэдэхийг хүсч байсан Крисийн энэхүү арга нь зөв логиктой байсан учир шилдэг сургалтыг шилдгүүдээр заалгаж чадсан байна. Тэр үүндээ хамгийн бага мөнгө зарцуулжээ.
    
2000 оноос Крисийн тоглоомын түвшин шинэ шатанд гарав. Тэр хүртэл тэрбээр өөрийнхөө амьдралын хагасыг UCLA-д таван жил бакалавр, 13 жил дараагийн шатанд сурч өнгөрөөв. 1999 онд Мэдээллийн технологийн шинжлэх ухааны доктор (Ph.D) цол хүртэв. Тухайн үедээ ирээдүйн зорилгоо хөрөнгийн биржийн арилжаалагч болно гэж төсөөлж, компьютер шинжилгээний чадвараа санхүүгийн ертөнцөд ашиглана гэсэн бодолтой байлаа. Арилжаалагч гэсэн ажлаар хэсэгхэн хугацаанд ажилласан нь Крисийн покерын огцом өсөлтөөр дуусгавар болов. Ажлаасаа олсон мөнгөөр тэмцээнд оролцох хураамжийг төлж байжээ.
   
Ингээд тэрбээр амжилт олж, жилийн дараа Покерын дэлхийн цуврал тэмцээний Main Event-эд түрүүлжээ.

• • •
Одоогоос хэсэгхэн хугацааны өмнө интернэтээр тоглодог сайн тоглогчдыг Покерын нийгэмлэгт тийм сайнаар хүлээн авдаггүй байв. Тодруулж хэлбэл, “интернэтээр тоглогч” гэдэг нь”‘тааруухан” гэсэн далд ойлголтыг төрүүлдэг байжээ.
• • •

Түүнийг маш олон хүн, найзууд, гэр бүлийнхэн, багш нар нь өчнөөн жил сурч, мэдээлэл технологийн шинжлэх ухааны доктор зэрэгтэй болчихоод покер тоглоход бүх цагаа зарцуулах болсонд ихэд гайхацгааж байв. Энэ талаараа Крис “яг үнэндээ би өөрөө ч гайхаж, тэднээс түрүүлж үүнийг хүлээн авах гэж нэ­лээн удаж байсан” тухайгаа дурссан байдаг. Покерын дэлхийн цуврал тэмцээний ялалтын дараа Крис өөрийгөө мэргэжлийн тоглогч гэж хүлээн зөвшөөрөхөд бэлтгэгдээгүй байв. Крисийн хувьд покер нь хобби, өрсөлдөөн, судлах дуртай сэдэв байснаас жин­хэнэ мэргэжил нь болсон гэж хэлэгдэх болоогүй байв. Хоёр жилийн дараа дахин томоохон тэмцээнд түрүүлснээр тэр мэр­гэжлийн тоглогч гэж хүлээн зөвшөөрөгдөв. Найзууд маань на­майг мэргэжлийн покер тоглогч гэж танилцуулахад эхэндээ тат­галздаг байснаа, сүүлдээ гэнэт өөрөө өөрийгөө мэдэрч, “Би бол мэргэжлийн покерчин” гэж танилцуулах болсон. Үүнийг Крис тэр агшинд л хүлээн зөвшөөрсөн юм. Өнгөрүүлсэн амьд­ралын­хаа туршид мэргэжлийнхээ замналыг хайж байсан ч покер түүний амьдралын нэг хэсэг байсныг тэр байнга хэлдэг юм.
    

Тэмцээнд оролцохын хажуугаар тэр онлайнаар Full Tilt Poker сайтаар байнга тоглоно. Одоогоос хэсэгхэн хугацааны өмнө интернетээр тоглодог сайн тоглогчдыг покерын нийгэм­лэгт тийм ч сайнаар хүлээн авдаггүй байв. Тодруулж хэлбэл “интернэтээр тоглогч” гэдэг нь “тааруухан” гэсэн далд ойлголтыг хүмүүст төрүүлдэг байжээ. Одоо бол бүгд өөрчлөгдсөн. Онлайн тоглоом покерт хувьслыг авчирсан төдийгүй Крисийн амжилт энэхүү хувьслын анхдагч болсон. Крис бүр 1989 оноос эхлэн онлайнаар тоглож эхэлсэн. Тэр үед өнөөгийнх шиг өнгөт график, тусгай бүрдэл, амьд орчин шиг шийдэл байхгүй, компьютерийн дэлгэц нь зүгээр л үгээр илэрхийлж, тоонд үндэслэсэн энгийн хэлбэртэй, хоорондоо шууд харилцах боломжгүй байлаа.
   
Гэсэн хэдий ч Крис хязгааргүй Техас Холдемийн талаар нэлээд мэдлэгтэй болсон байв. 1989 оны үед хязгаартгүй тог­лолт тийм ч түгээмэл байгаагүй, хэрэв аз таарвал нэг юмуу хоёр л тохиолдол тааралддаг байжээ. Ингэж онлайнаар тоглох нь бодит тоглолтын ширээн дээрх хувилбарыг нэгд нэгэнгүй түүнд харуулахаас гадна бусад тоглогчдийг бодвол Крист маш их давуу тал, туршлагыг өгчээ.

• • •
Бодоод үз дээ, математик хэзээ ч худлаа хэлдэггүй л байхгүй юу. Жишээ нь нэг тамга ирсэн гэж бодъё, тэгтэл хоёр тамга эргэлээ, эндээс чи нэг тамга хаа нэгтээ үлдсэн гэдгийг баттай мэднэ, гэхдээ ганцхан үлдсэн гэдгийг. Үйлдэл бол түүнээс огт өөр үргэлж худлаа хэлдэг.
• • •
 
Покерчид кибер ертөнцөөс орж ирж байгаа залуучуудад чанга хатуу, үл ойшоосон байдалтай ханддаг. Харин Крисийн хувьд онлайн супер одуудыг анхнаасаа л хүлээн зөвшөөрч, тэднийг удалгүй цахиур хагална гэдэгт итгэдэг. Учир нь өөрөө онлайнаар их олон зүйлийг сурсан болохоор тэр.
   
Крис өөрийн туршлагаас интернэт тоглогчид ширээн дээр тоглох тоглогчдоос хамаагүй олон хүмүүстэй хамт тоглодгийг мэднэ. Нэг тохиолдолд Крис бүр гарган байж 300 хүнтэй хамт тогложээ. Энэ нь цагт 300 шинэ аргад суралцах боломж туршлагыг түүнд олгосон байна. Хэрвээ ширээний болон интернэт тоглогчид яг ижил хэмжээний мэдээлэл авдаг гэж тооцвол интернэт тоглогчид ширээн дээр тоглосноос тав дахин хурдан суралцана. Жишээ нь, 22-той интернет тоглогч олон ширээн дээр зэрэг тоглосноор хэдхэн жилийн дотор Дойл Брансоны амьдралынхаа туршид олж авсан туршлагыг эзэмших боломжтой.
   
Олон тоглогчид өөрт ирсэн хөзөр болон өрсөлдөгчөө унших чадварын аль аль нь тийм ч чухал биш гэж үздэг. Крисийн хувьд покерын үндсэн зорилго амжилтад зайлшгүй хүрэх нь чухал гэдэгт итгэдэг. Зарим тоглогчид үйлдлийг чухалчилдаг бол Крис өөрт ирсэн хөзрөөр үндсэн түвшинд яаж тоглох вэ гэдгийг чухалчилдаг. Энэ нь өөрийн хөзрөө өрсөлдөгчийнхөө үйлдлээс хамаарч, сөргүүлэн тавихаас өөр асуудал юм.
   
Бодоод үз дээ, математик хэзээ ч худлаа хэлдэггүй л байхгүй юу. Жишээ нь нэг тамга ирсэн гэж бодъё, тэгтэл хоёр тамга эргэлээ, эндээс чи нэг тамга хаа нэгтээ үлдсэн гэдгийг баттай мэднэ, гэхдээ ганцхан үлдсэн гэдгийг шүү. Үйлдэл бол түүнээс огт өөр, үргэлж худлаа хэлдэг.
     
Тоглогчид байнга өөрийгөө нуудаг, бас хуурамч үйлдэл зохиодог. Тэд чамайг хуурахыг оролдоно. Харин математикийг бол хуурч чадахгүй. Шинэ тоглогчдод өгөх Крисийн зөвлөгөө нь эхлээд тоо сур гэдэг. Ер нь онлайнаар тоглодог тоглогчид хүчтэй байдгийн нэг үндсэн шалтгаан нь энэ юм.
   
Олон хүмүүс математик тийм чухал биш, покер бол ердөө л хоёр хөзрийн хослол хоёр хөзрийн нөгөө хослолыг дийлдэг жирийн л хувилбар гэцгээдэг. Нэг талаас харахад үнэхээр тийм чухал зүйл биш гэдэг үнэн ч тоглоомын онол бол математикийн нэг хэсэг юм. Үүнийг ашиглан өөрт ирсэн хөзрөөр яаж тоглохоо зөв шийдэж чадвал энэ нь үндсэн суурь болж өгнө. Математик чухал биш гэж зарим хүмүүс хэлж байгаа нь математикийн тухай ойлголтгүй хүмүүсийн яриа.
   
Гаднаас нь ажиглаад Крисийг сургуулиа хаясан покерын бусад тоглогчидтой харьцуулахад тун хэцүү. Ахлах сургуулиа бүрэн төгсөөгүй, зарим нь коллежид ч орж үзээгүй тэднийг Фергюсоны мэдээллийн технологийн шинжлэх ухааны зэрэгтэй яаж харьцуулах юм бэ? гэж зарим хүмүүс асууж болох юм. Түүний хариуд тэр нэг л зүйлийг үргэлж хэлдэг. “Шилдэг тог­логчид бол сургуульд сурсан, сураагүй маш ухаантай хүмүүс байдаг. Тэд аваргын төлөө тоглох тоглолтод маш ухаантай байж л оролцоно. Би 18 жил сурсан, энэ нь хүнийг боловсролтой л болгодог болохоос ухаантай болгодоггүй. Дээд түвшинд тоглож байгаа хүмүүс өндөр боловсролгүй байж болно, гэхдээ тэд бол ямар нэг хэмжээгээр маш ухаантай хүмүүс” гэж тэр хэлдэг.
   
Крис өөрийн “Full Tilt” сайтаар тэгээс эхлэн 10 мянган доллар хүртэл тоглохдоо покерын тухай маш их зүйлийг суралцсан байна. Жишээ нь, мөнгөө өсгөх, бууруулах зэргээр хэрхэн удирдах, алдсаныхаа дараа бооцооны мөнгөний хэмжээг багасгах, хожсоны хэрээр бооцоогоо өсгөхгүй байх зэрэг олон зүйл дээр туршлагажсан аж. Алдсаныхаа дараа тоглох мөнгөө багасгаж сурах, үүнд зохицох нь аливаа тоглогчдод маш хэцүү байдаг ч ингэснээрээ өөрт байгаа мөнгөө хадгалж үлдэж чадна.
   
Маш олон тоглогчид яг үүний эсрэгээр тоглодог. Тэд их мөнгөөр орж эхэлдэг. Тэр нь өөртөө эрдсэн байдал. Үүнээс гадна бас хувь хүний, эсвэл өөр ямар нэгэн хүчин зүйл нөлөөлөөд байдаг юм уу бүү мэд, алдсаныхаа дараа тэд алдсан мөнгөө эргүүлж хурдхан олж авахын тулд бүр ч их мөнгөөр тоглодог. Гэвч хүн болгонд тийм боломж таардаггүй.
   
Тэгээс 10 мянган доллар хүртэл тоглохдоо бас нэг зүйл сурсан нь тэрбээр мөнгөнийхөө таван хувиас илүү хэзээ ч гарган тоглодоггүй. Энэхүү стратегийн хүчээр 10 мянган доллараас их мөнгө хийсэн. Цааш бас улам нэмэгдүүлсээр байсан. Хэрэв та нар хүсч байвал өнөөдөр ч гэсэн ChrisFerguson.com гэсэн сайтаар орж тэгээс 10 мянга хүргэдэг түүний арга барилаас суралцаж, бас туршаад үзэж болох юм.  “Энэхүү систем намайг алдсан үед бага мөнгөөр тоглоход чиглүүлэн тохируулагдсан” гэж Крис хэлсэн. “Хэрэв би 2000 доллартай бол 100 долларын хэмжээнд л тоглох боломжтой, хэрэв 200 доллартай бол 10 доллараас дээш тоглох боломжгүйгээр тохируулсан” гэжээ.

• • •
Өдөрт 14 цаг ширээний ард суун тоглосны дараа ганцхан буруу шийдвэр тэмцээнийг дуусгавар болгодог учир жижиг зүйлүүдийг хүндээр тусган авах хэрэггүй.
• • •
   
Крисын бас нэг итгэдэг зүйл нь покерыг мэргэжил бол­госноор тоглогчид эрх чөлөөтэй болдог. Тэд юу хүсч байгаа­гаа хэзээ, хаана, хийхээ өөрсдөө л сонгодог. Тэдэнд эзэн гэж байхгүй. Өөрөө өөртөө эзэд нь юм.
   
Покерын ширээнээс гадна Крис нийтийн бүжгийн үнэнч шүтэн бишрэгч аж. “Ер нь бараг сурвалжлагч бүхэн энэ талаар асуудаг шүү, урд нь долоо хоногт таван удаа бүжиглэдэг байв. Харамсалтай нь Лас Вегаст даанч нийтийн бүжгийн дугуйлан байдаггүй, хэрэв байгуулагдах л юм бол мэдээж би байнгын зочин нь байх болно” хэмээн тэр өгүүлж байсан билээ. Крис жилийн өмнөөс гольф тоглож эхэлсэн боловч түүндээ тийм ч их сонирхол нь татагдаагүй байна. Иймд тэрбээр одоо болтол ямар нэг сонирхолтой зүйл хийхээр эрэлхийлэн хайсаар байгаа юм.
   
Тэмцээнд оролцохын тулд аяллаар нэлээн явдаг нь түүнд багагүй асуудал үүсгэдэг байна. “Сүүлийн үед покерын тэм­цээнүүд дэлхий даяар явагддаг болсон. Тэмцээнд орол­цогсод маш сонирхолтой газруудаар явдаг гэж та нар бодож байгаа байх. Үнэндээ бол жуулчдын явдаг газраар явж, сонирхолтой зүйлс үзэхээсээ илүү, онгоцны болон зочид буудал, покерын ши­рээний ард ихэнх цаг маань өнгөрдөг. Ингэж аялахад би маш их ядардаг, иймд аяллын хуваариа багасгаж, цөөхөн тэмцээнд оролцдог болсон” гэж тэрбээр өгүүлжээ.
   
Покерын мэргэжил Крист зөвхөн эрх чөлөөт байдлыг авч­­раагүй, хэцүү зүйлтэй тулгарахад түүнтэй яаж харилцах талаар ч сургасан байна. “Хэдэн жил хязгааргүй Техас Холд’ем тоглосноор аливаа зүйлсийг хэрэгтэй цагт нь зөв байранд нь тавьдаг болов. Өдөрт 14 цаг ширээний ард суун тоглосны дараа ганцхан буруу шийдвэр тэмцээнийг дуусгавар болгодог учир жижиг зүйлүүдийг хүндээр тусган авах хэрэггүй. Бараг 20-иод жил покерын тэмцээнд тоглосны дараа аливаа нэг жижиг зүйлээс болж, бүх зүйл буруугаар эргэхэд түүнд их санаа зовдоггүй” гэж тэрбээр хэлсэн нь бий. Тэрбээр цааш нь хэлэхдээ “Покер нь хүнд хэцүү байдалтай байнга тулгардаг, иймд покерын ширээн дээрх хүндрэлтэй учирсны дараа түүнийг даван туулж, түүнд “мастер” болж чадвал, өөр хаана ч гэсэн “мастер” болж чадна гэв. Өөрөөр хэлбэл, покерын ширээн дээрх асуудалд “мастер” болж чадахгүй бол амьдралын өөрчлөлтийн бусад нөхцөлд ч “мастер” болж чадахгүй юм” гэжээ.

• • •
Крис цааш хэлэхдээ “Покер нь хүнд хэцүү байдалтай байнга тулгардаг иймд покерын ширээн дээрх хүндрэлтэй учирсны дараа түүнийг даван туулж, түүнд “мастер” болж чадвал өөр хаана ч гэсэн “мастер” болно. Өөрөөр хэлбэл, покерын ширээн дээрх асуудалд “мастер” болж чадахгүй бол амьдралын өөрчлөлтийн бусад нөхцөлд ч “мастер” болж чадахгүй юм гэжээ.
• • •
 
Крис покероос маш их сэтгэл ханамж, тааламжийг авч байдаг ч бусдад өөрийнхөө мэргэжлийн талаар зөвлөдөггүй. Мэргэжил бүхэнд байдаг шиг хүмүүс зөвхөн тоглоомд дурлах биш, түүнээс илүү олон зүйлийг хийх чадвартай гэдэгт тэр итгэдэг. Хэрэв өндөр түвшинд тогломоор санагдвал ур чадвараа байнга дээшлүүлэх хэрэгтэй.
   
Хүмүүс Крисээс түүнийг яаж ширээний ард ингэж амжилт олж байгааг олонтаа асуудаг. Тэдгээрийн дотроос түүний намтрыг мэддэг зарим хүмүүс амжилтыг нь “тооны ухааны мэдрэмж”-тэй нь холбож үздэг. Тийм ч байж магадгүй. Учир нь түүний хувьд тооны ухааны торгон мэдрэмж нь илүү их  хөгжсөн гэж хэлж болно. Аав, ээж хоёр нь хоёулаа математикийн ухааны докторууд юм. Гэвч эцэг, эхээс улбаатай авъяас гэж бүрэн хүлээн зөвшөөрөхөд итгэлтэй биш байгаагаа Крис хэлдэг. Эцэг нь түүнд покерын математик аргачлалыг заахад их тусалсан хэдий ч тэрбээр өөрийнхөө авъяас чадвараар покерыг тооны ухаан талаас нь илүү эзэмшиж чадсанаараа амжилтад хүрсэн юм. Математик чухал гэж хүлээн зөвшөөрдөг боловч зөвхөн дангаараа юунд ч хүрэхгүй. Магадлалыг ойлгоно гэдэг чухал, мөн аливаа явцын логикийг ойлгох нь чухал. Эдгээрийг сайн эзэмшиж чадвал амжилттай тоглогч болоход эргэлзэх зүйлгүй билээ.
   
Крисийн бас нэгэн чухал чанар бол хүмүүс түүнийг уншихад маш хэцүү байдаг. Аливаа үйлдэл, зан төлөвөө арилгахын тулд маш шургуу ажилладаг тэрбээр ингэснийхээ хүчинд гартаа ирсэн сайн хөзрүүдээ зүгээр алдчихдаггүй. Ихэнх тоглогчид олон хүмүүсийн дунд, эсвэл зурагтын дуран­гийн өмнө тоглохоороо жирийн байдлаа алддаг. Крисийн хувьд сүүлийн шатанд тоглож байвал зурагт болон олон үзэгчдийг хайхардаггүй, зөвхөн тоглоомдоо л бүх анхаарлаа төвлөрүүлдэг байна. Түүгээр ч зогсохгүй бусад тоглогчдоо сайн уншиж чаддаг, ялангуяа тэдний худлаа хэлж байгааг тэр даруйд нь мэдэрч, ойлгож чаддаг. Намуухан, сэтгэлийн хөдөлгөөнгүй байдал нь домог болсон төдийгүй түүний тоглолтын чухал бүрэлдэхүүн хэсэг нь болдог. Ихэнх тоглогчид бүр заримдаа шилдэг тоглогчид хүртэл ямар нэг зүйл буруугаар эргэн алдахад маш ихээр уурлацгаадаг, харин Крис Фергюсон хэзээ ч тайван байдлаа алддаггүй.

• • •
Магадлалыг ойлгоно гэдэг чухал, мөн аливаа явцын логикийг ойлгох нь чухал. Эдгээрийг сайн эзэмшиж чадвал амжилттай тоглогч болоход эргэлзэх зүйлгүй билээ.
• • •
 
Тэрбээр зөвхөн тэмцээний тоглогч болсны дараагаар зарим­даа өөрийгөө покерын ертөнцөөс гадуурх хүн шиг боддог. Ихэнх шилдэг тоглогчид тэмцээний дараа нөхөрлөцгөөн, тэр суусан бүрэлдхүүнээрээ бүхий л шөнийн турш бэлэн мөнгөөр тоглодог, харин Крис мөнгөөр тоглодоггүй зөвхөн тэмцээнд оролцдог.
    
Покерын ширээний хувьд энэ нь түүнд чимээгүй, намуухан орчинг бүрдүүлж өгдөг гэж хэлж болно. Гарт ирсэн хөзөртөө тэр анхаарлаа бүрэн чиглүүлж тоглодог. Энэ бүхэн нь покероос тааламж таашаал авдаггүй гэсэн үг огт биш. Харин хурц зантай, хэл амаар их довтолдог хүмүүстэй тэр хамт тоглохдоо дуртай байдагт нь гайхмаар. Бие биендээ бүдүүлэг хандах нь түүний уурыг хүргэдэг цорын ганц зүйл төдийгүй покерт тийм орон зай байх учиргүй гэж тэр үздэг.
    
Крис Фергюсоны гадаад байдал нь намуухан, тайван ч тэрбээр маш чанга хатуу өрсөлдөгч. Хэзээ ч бууж өгдөггүй, өөрт ирсэн хөзрийн хэмжээнд хамгийн дээд түвшинд тоглодог. Тэр их, бага хэмжээний шагнал гэж ялгадаггүй. Зарим тоглогчид бага хэмжээний шагналтай тоглолтод оюун ухаан нь аль хэдийнэ буугаад өгчихсөн байдаг. Харин Крис хасаа бариад сууж байвал өөрт байгаа бүх хүч чадлаа дайчлан тоглодог. Тэр  бас ингэж тоглохоо ч амладаг. “Хүмүүс өөр өөр зүйлд хөтлөгдөн амжилтад хүрдэг, миний хувьд дуртай зүйлээ маш сайнаар гүйцэлдүүлэх нь чухал гэж үздэг” хэмээн тэрбээр хэлж байв.
   
Түүний тухай ChrisFerguson.com гэсэн сайтаас мэдээлэл авч болохоос гадна fulltiltpoker.net сайт руу орж түүнтэй тоглож болно.
    
Эдүгээ Крис хүүхдийн төлөө байгууллагыг дэмжиж Америк болон дэлхий даяар хүүхдэд хэрэгтэй зүйлд нь туслах зорилгоор ажилладаг байна.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Дэргэдээ дадлагажих эмнэлэггүй хувийн 16 анагаах ухааны дээд сургуулийг аттестатчлалд оруулах хэрэгтэй юу?
  • Яаралтай оруулах хэрэгтэй
  • Хэрэггүй
  • Мэдэхгүй