07.26, Saturday
21
Хуримын ордон үнээ нэмж, залуу хосуудыг гонсойлгов
2013 оны 6 сарын 25
Ямарваа нэгэн эд зүйлсийн сезоны үе эхлэнгүүт хэдэн ченжүүд нь үгсэн хуйвалдаж үнээ нэмдэг жишиг төрийн үйлчилгээнд ч нэвтэрч эхлэх шиг боллоо. Наадам дөхөж төлөг үнэд хүрдэг шиг хуримын ид сезоны улирал эхлэж байгаа энэ үед Гэрлэх ёслолын ордон үнээ нэмэх шийдвэр гаргажээ. Нийслэлийн өмчит гэгдэж явдаг Гэрлэх ёслолын ордоны өмнөх дарга Х.Оюунчимэг нь санхүү мөнгөний хэрэгт холбогдон, нэг хэсэг шалгагдаж 2012 оны сүүлээр ажлаасаа чөлөөлөгдсөн бол одоогийн шинэ дарга С.Үүрийнтуяа гэгч хатагтайн шийдвэрээр хуримын ордон ийнхүү үнээ нэмж байгаа аж.

Гурваас дөрвөн жилийн өмнө 10-20 минутын гэрлэх ёслол үйлдэхэд 450-500 мянган төгрөг байсан хуримын ордны үйлчилгээний хөлс 2011 оноос 750-850 мянган төгрөг болжээ. 10-20 минут ёслоод өнгөрөх төдийд бараг сая шахам төгрөг төлнө гэдэг залуучуудын хувь чанга үнэ. Гэтэл С.Үүрийнтуяа дарга 850 мянган төгрөгийг юман чинээ тоодоггүй хүн бололтой. Наймдугаар сарын нэгнээс үнээ нэмж байгаагаа танилцуулаад “хүний амьдралд ганц олдох боломж учир 850 мянган төгрөгийг тийм их мөнгө гэж бодохгүй байна” хэмээн хариулсан юм.

Гэтэл өнөөдөр 850 мянган төгрөг бүү хэл 8500 төгрөггүй хүмүүс олон байна. Жилд манай улсад 10-12 мянган хос гэр бүл болдог, тэдний 80 гаруй хувь нь Гэрлэх ёслолын ордонд батлуулах сонирхолтой байдаг ч ачаалал ихтэй, хугацаа богино, төлбөр өндөр гэсэн шалтгаанаар чадахгүй тохиолдол их байдаг аж. Ялангуяа намрын дунд сарын шинийн 17 гэхчлэнгийн тоотой хэдхэн сайн өдөр гэрлэх хосын тоо хэд дахин нэмэгддэг учир хуримын ордон монопольдож ийнхүү үнээ нэмжээ. Уг нь Нийслэлийн өмчит тус ордоны үйлчилгээний үнэ Нийслэлээс зохицуулах, иргэдийнхээ боломж, бололцоог харж байж амьдралд нийцсэн үнэ тогтоож болмоор. Харамсалтай нь үнэ нэмэгдсэн үйлчилгээ нь  хөлс шигээ  чанартай биш,  хангалттай үйлчилгээ үзүүлдэггүй гэдгийг хэлэх хүн ч олон байна.  Гэр бүл бололцох төрийн болон уламжлалт ёслол, магтаалч, морин хуурчид ерөөлөө хэлж, 10-25 минутын бичлэг,  22 ширхэг зургийг  цомог хийж өгнө, хосуудын машиныг чимэглэж өгнө.  Дээрх үйлчилгээ дээд тал нь 150 мянган төгрөгт багтана. Харин үлдсэн мөнгө нь зүгээр л Гэрлэх ёслолын ордоны халаасанд орж байгаа юм. Тэгэхээр  нэгэнт мөнгийг нь авч байгаа юм чинь сайхан үйлчилгээ үзүүлэх ёстой.

Яг чинээнд тултал үйлчилгээ үзүүлж чаддаггүйн дээр жил бүр ийнхүү үнээ огцом өсгөсөөр дөрвөн жилийн дотор 50 хувиар үнээ нэмсэн хэрэг нь тус ордонд захиалга өгөхөөр явж байгаа хүмүүст таалагдахгүй байна гэж зовлонгоо хуваалцаж байсан юм. Гэр бүлийнхээ сайн сайхныг бодож, ёс уламжлалаа дагаж гал голомтоо бадраахдаа уур уцаартай, загнуулсан, яарч сандарсан орчинд хийхийг хүсэхгүй нь тодорхой. Хүний гал голомтыг ингэж унтрааж боломгүй гэдгийг хэлэх хүмүүс байсан юм.  35 жилийн түүхтэй, 25 мянган хосын хурим баталсан туршлагатай гэж үнээ нэмэх нь утгагүй л баймаар. Тэгээд ч байр савны хүрэлцээ муутай энэ ордоны үйлчилгээ, харилцааны соёлын талаар зарим иргэд бухимдалтай байдаг. Гэрлэх ёслолын ордон нийслэлийн өмчит газар арай л дэндүү амьдралд нийцэхгүй шийдвэр гаргажээ. Энэ шийдвэр наймдугаар сарын нэгнээс хэрэгжинэ, үүнээс өмнө шинэчлэлийн гэгдэх сайд дарга нар анхаарлаа хандуулахгүй бол найр хуримын цагаар олон хүмүүс бухимдаж мэдэхээр болоод байна. Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Эдийн засгийг эрчимжүүлэх 100 хоногоор эдийн засаг сайжирсан уу?
  • Тийм
  • Үгүй