09.02, Tuesday
27
“Нийслэл өргөө” компанийн барилга ямар ч зөвшөөрөлгүй
2013 оны 11 сарын 6
- Нар хаасан барилгыг нураахыг иргэд хүсч байна -

Баянзүрх дүүргийн хоёрдугаар хорооны нутаг “Оргилуун” худалдаа, үйлчилгээний төвийн зүүн талд хэнийх нь мэдэгдэхгүй таван давхар барилга сүндэрлэж эхэлсэн аж. Энэ барилга газрын зөвшөөрөлгүйгээр үйл ажиллагаа эхлүүлж, Мэргэжлийн хяналтын газраас үйл ажиллагаагаа зогсоох шийдвэр гаргаж байсан нь цаасан дээр хараар бичигдэн үлджээ. Хэсэг хугацаанд үйл ажиллагааг нь зогсоосон ч амралтын өдрүүдээр хүний нүд хариулж байгаад барилгын ажил нь явагдаад байгааг тус барилгаар нар үзэх эрхээ хасуулж буй 37А байрныхан мэдээлж байна.

Барилгын ажил өнөөдрийн байдлаар зогссон ч халаалт, дулааны техникийн нөхцөл аваагүй, мөн нураах барилгуудын жагсаалтад орсон энэ барилга ирэх хавраас үргэлжлэн баригдахгүй гэсэн баталгаа алга юм. Энэ барилгыг барьж буй компани нь “Нийслэл өргөө”. Тус компанийн захирал Б.Ганзоригийн эхнэр нь “Оргилуун” төвийг хариуцаж ажилладаг бөгөөд ийнхүү тус төвтэй залгаад Барилгын тухай хуулийг зөрчин байгууламж барьж эхлүүлсэн нь энэ.

Хот байгуулалт, дэд бүтцийн хяналтын албанаас өгч байгаа мэдээллээр бол Б.Ганзориг эзэнтэй “Нийслэл өргөө” компанийн энэхүү барилга дээр “Сүүб” гэх авто сургууль, мөн иргэн Чойнямбуу, Магадүнэн гэсэн хүмүүс хамтарсан бөгөөд подвалтай, 30х12 метрийн хэмжээтэй тус барилга хаанаас ч, ямар ч зөвшөөрөл аваагүй аж. Тус барилгын ажлыг эхлүүлэх зөвшөөрлөө эрхбиш хөөцөлдсөн ч маш олон зөрчилтэй байсан учраас тус компанид холбогдох газрууд барилгын ажил эхлүүлэх зөвшөөрөл олгоогүй гэнэ. Гэтэл өөрсдөө дур мэдэн барилгаа барьж эхлүүлэн өдгөө таван давхарт хүргээд байгаа юм.

Тус барилгын хувьд нийтийн эзэмшлийн талбай буюу Сансарын “Туул жин пан” компанийн урд байрлах 37А байрны тоглоомын талбай дээр, тус байрныхны нарыг хааж, байрнаас 10 гаруйхан метрийн зайд подвалтай барилга барьж эхлүүлжээ. Энэ барилга нь дахиад үйлчилгээний чиглэлээр баригдаж байгаа гэх бөгөөд одоо ч “Оргилуун” төвийн эргэн тойронд архичид цугларч, агсам согтуу тавьдаг нь оршин суугчдын тав тухыг алдагдуулсаар байдаг аж. Дахин нэг ийм барилга зөвшөөрөлгүйгээр сүндэрлэхийг хүсэхгүй байна гэж иргэд хэллээ.

Хотын дарга Э.Бат-Үүлийн гаргасан хууль бус барилгуудын тоонд нэгэнт багтсан энэ барилга нэг мэдэхэд л ханаа битүүлээд, үйл ажиллагаа явуулаад эхлэх вий гэхээс айж буй иргэд “Нийслэл өргөө” компанийн дээр хууль, хариуцлага гэж байдаг бол хурдхан хэрэгжүүлж, тус барилгад арга хэмжээ авах, цаашлаад бүр нураах шаардлагатай байна хэмээн хэллээ. Тэгээд ч холбогдох албанаас ямар ч зөвшөөрөл аваагүй ийм барилгуудыг хотын хаа нэгтээ бариулаад байх нь төдийлөн зөв зүйл биш биз ээ. Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Эдийн засгийг эрчимжүүлэх 100 хоногоор эдийн засаг сайжирсан уу?
  • Тийм
  • Үгүй