НИТХ-ын дарга Д.Баттулга Үүл баатартай барьцалдах дөхжээ
2014 оны 10 сарын 6
Улсын баатар Э.Бат-Үүл өнгөрсөн оны аравдугаар сарын 30-ны өдөр А/980 тоот захирамж гаргаж, 2014 оны хоёрдугаар сарын 20-ны дотор зориулалтын бус газарт автомашины худалдаа эрхэлж буй аж ахуйн нэгж, байгууллага, иргэдийн үйл ажиллагааг зогсоож, газрыг чөлөөлөх ажиллагаанд хяналт тавьж ажиллах ажлын хэсэг байгуулсан билээ. Гэвч Улаанбаатар хотын захирагчийн гаргасан захи­рамжийн хэрэгжилтэд хяналт тавьж ажиллах ёстой Засаг даргын Зам тээвэр, дэд бүтцийн асуудал хариуцсан орлогч Н.Гантөмөр өнөөг хүртэл энэхүү захирамжийг ажил хэрэг болгож чадаагүй. Өгсөн үүрэг даал­гаврыг нь биелүүлээгүй тул Засаг дарга Э.Бат-Үүл ихэд уурсан орлогчоо толгой түрүүгүй загнаад зогсохгүй Нийслэлийн ИТХ-ын дарга Д.Баттулгатай энэ талаар уулзаж ярилцсан гэдэг.
   
Тэдний уулзалт нэлээн ширүүн уур амьсгалд өрнөсөн бөгөөд Э.Бат-Үүл дарга “Авто худалдааны цогцолбор” барьж байгуулах асуудлыг яаравчлахыг шаарджээ. Тэд зарчмын зөрүүтэй яриа өрнүүлсний эцэст хурлын дарга Д.Баттулга Хурлын тэргүүлэгчдээ дуудан ирүүлж хуралдаад 2014 оны 03 дугаар сарын 21-ний өдөр 29 тоот тогтоолыг гаргуулсан аж. Тэрхүү тогтоол дотор “Авто худалдааны цогцолбор” ОНӨААТҮГ-ын эхний ээлжийн ажил болох авто зогсоол, зам талбай, хамгаалалтын хашаа барих ажлуудыг холбогдох хууль журамд нийцүүлэн шуурхай зохион байгуулж, 2014 оны аравдугаар сарын 01-ний дотор хийж дуус­гахыг Улаанбаатар хотын захирагч Э.Бат-Үүлд даалгажээ.
   
Уг тогтоолын хэрэгжилтийг тогтоосон хугацаанд зохион байгуулж, үр дүнг нь НИТХ-д 2014 оны аравдугаар сардаа багтаан тайлагнахыг мөн хотын Э.Бат-Үүлд даалгасан байна. Гэвч өнөөдөр 22-ын товчоонд 70 га газарт байршихаар төлөвлөгдсөн “Авто худалдааны цогцолбор”-ын бүтээн байгуулалтын ажил дөнгөж цэвдэгтэй газар ухах төдийхөн байдалтай байгаа гэнэ. Тэнд 12 мянган машины зогсоол байгуулах ажил ирэх сарын 01 гэхэд дуусах ёстой ч өнөөдөр нэг машины цардмал зогсоол ч байгуулагдсангүй. Тийм байтал НМХГ-ын дэд дарга бөгөөд Улсын ахлах байцаагч П.Бат-Эрдэнэ гэдэг хүн өөрийн мутрыг хайрласан сүртэй тамга тэмдэг бүхий албан шаардлагыг баруун, солгойгүй хүргүүлж, автомашин худалдаалагчдыг дарамталж эхэлсэн сурагтай.
   
Дээрхи 29 тоот тогтоолд Улаанбаатар хотын нутаг дэвсгэрт 2014 оны аравдугаар сарын 01-ний өдрөөс эхлэн нийтийн эзэмшлийн зам тал­бай, бусад зам орчмын ил задгай зогсоол, талбайд автомашин, тээв­рийн сэлбэг, хэрэгсэл худалдан борлуулахыг хориглох, зохих жур­мын дагуу улсын бүртгэлд хамрагдаагүй тээврийн хэрэгслийг замын хөдөл­гөөнд оролцуулахыг хязгаарлах арга хэмжээ авахыг заажээ. Тиймээс байцаагч П.Бат-Эрдэнэ хүчний байгууллагын тусламжтайгаар автомашины худал­даа эрхлэгчдийг хүчээр нүүлгэн шилжүүлэхээ илэр­хийлжээ. Хотын дарга нь нэг өөр юм яриад, түүний орлогч нь бас нэг юм яриад, НИТХ-ын тог­тоол дээр нь огт өөр зүйл заасан байтал түшмэдүүд хэнийх нь үгэнд ит­гэж ажлаа хийхээ мэдэхгүй, нэгдсэн нэг ойлголтгүй өнөөг хүрч байгаа аж.
   
Хэрэв П.Бат-Эрдэнэ тэргүүтэн сүр хүч бадруулан ирвэл өмнөөс нь 29 тоот тогтоолыг харуулаад босно гэдгээ автомашины ченжүүд зоригтойгоор мэдэгджээ. Тэд “Хужаа эзэдтэй арьс, ширний үйлдвэрүүдийг хоёр жилийн өмнө нүүлгэнэ гэж амлаад гарч ирсэн нөхдүүд өнөөдөр тэдний халаасанд орчихоод таг дуугүй болсон. Цаана нь биднийг ундаалдаг Туул гол бохирдож гүйцлээ. Арьс ширний үйлдвэрүүдээ хотын гадна гаргачихаад бидэнтэй юм ярь” хэмээн ярьсан нь үнэний хувьтай юм. Үүл дарга хурлын дарга Д.Баттулгатайгаа ширүүн маргалдсаны нууц энэ буюу.

Эх сурвалж: Маш нууц сонин Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
”Эрдэнэт”-ийн 49 хувийг төр буцааж авах нь зөв үү?
  • Зөв
  • Буруу
  • Мэдэхгүй