Хар хэрээ гуаглахад ерөөсөөр 9 хүүхэдтэй болжээ
2016 оны 10 сарын 8

Хэрээг муу ёрын шувуу гэдэг. Гэхдээ тэр ёр зөнг нь сайнаар тайлбал тас хар тэр шувуу цав цагаан болох нигуур бий гэнэм. Дорждэрэмийнх гэдэг айл хүүхэдгүй.

Хөдөө газар хүүхэд төрүүлээгүй эр, эм хоёрыг үздэггүй. Муу ёр шүглэсэн, үрийн заяа зайлсан айл гэх зэргээр дархан аварга цолтой бөхийн цол гуншингаас урт үгс үргэлжилнэ. Дорждэрэмийн эхнэр Цэнд-Аюушийг хормой султай, нутаг нугынхаа эр сүвтэй болгоны нурууг маажиж, нууц юмыг нь үмхэж үлгэж явсан гэж ярилцдаг байлаа. Энэ дэмий үг үрийн мөрөөс болсон эр, эм хоёрын чихний хажуугаар өнгөрөх мэт боловч мэдээж хөөрхий хоёр их л шаналж зовдог байлаа. Цэнд-Аюуш яагаад ч юм хар хэрээнд хүн болгоноос өөрөөр хандана. Бараг тэр бараан зүстэй шувууг түүнээс өөр хайрлаж онго тахилга болгон шүтэх хүн Ховд аймгийн Буянт суманд байсангүй. Цэнд-Аюуш хар хэрээ гуаглах бүр “Хурай, хурай. Есөн цагаан өндөгтэй болоорой” гэж ерөөнө. Есөн цагаан байхдаа яахав. Ямар есөн цагааны бэлгийг өндөр богдод барьж байгаа биш дээ гэж дооглох хүн зөндөө. Гэсэн ч Цэнд-Аюуш энэ “ерөөлөө” хар шувуунд хайр гамгүй “өгдөг” байлаа.

Тэгэхдээ тэр дотроо “Есөн цагаан хүү төрүүлж хайрла” хэмээн сүслэнэ. 40 хол гарсан царайлаг, мярайлаг Цэнд-Аюуш улам таргалж эхлэхийг харсан ойр хавийнх нь охид, хүүхнүүд “Аргагүй ш дээ. Сул хэвтэж, сувай үхэр шиг хэвдэг нь дэндэж байгаа хэрэг” гэж бас л хов живийн яриа хөөрөө хөвөрнө. Гэтэл эвэртэй туулай үзсэн юм шиг юм болжээ. Сувай Цэнд-Аюуш нярайлж гэнэ. Энэ үг тэр сум орны хүн болгоны нүдийг духан дээр нь гаргаж орхисон байгаа юм.

Дорждэрэмийн хүүхэд бус хэрээний өндөг Цэнд-Аюушийн цавьнаас унасан буй за гэж ярих хүн ч байв. Гэтэл үүнийг үгүйсгэж 5 жилийн дотор дөрвөн ихэр хүүхэд төрүүлж, тавин насны босго руу алхах үедээ Дорждэрэмийнх гэдэг айл есөн сайхан хүүхэдтэй болов. Тэдний тав нь хүү, дөрөв нь охин байлаа. Хүний бодож, шүтэж ярьдаг зүйл бодитой болдгийн жишээ энэ гэж болох байх аа.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
МАН-ын шинэ даргад хэн нь тохирох вэ?
  • Ж.Эрдэнэбат
  • Ц.Нямдорж
  • У.Хүрэлсүх
  • Н.Энхболд
  • Ө.Энхтүвшин