Сарлагт эмгэний сүнстэй ноцолдсон Самдан
2016 оны 10 сарын 22
Өвөг эцэг маань тээр жил ингэж ярьсан юм. “Шинэ” Самдан хэмээх хижээл насны хар хүн байх. Манай нутагт нас ойролцоо нэгэн бэлэвсэн эхнэртэй цайгаа хувааж уухаар нэг гэрт орсон юм билээ. Манай суманд Самдан нэртэй хүн олон учраас түүнийг “шинэ” Самдан хэмээн бусдаас ялгасан юм.

... Нутгийн олондоо “Сарлагт” эмгэн гэж ганц охинтой, цөөн хэдэн сарлагтай хөгшин байж байгаад хорвоогийн жамаар бурхан болжээ. Гэтэл удалгүй “Сарлагт” эмгэн тонилохгүй байна гэж нутгийнхан мэр сэр ярилцах болов. Тэр үед төр, засаг өөрчлөгдөж улаан хувьсгалчид ид дүвчигнэж байсан үе аж. Хүмүүс дэмий л айн зэвүүрхэж “Сарлагт” эмгэний гэр хотын орчмоор орой үдшээр явж болохгүйг хүүхэд багачууддаа захина. Харин зарим нь дэгсдүүлж, давслах дуртай нэг нь талийгаачийг сэтэрхий хамартай бөөр алаг сарлаг унаад, шидмэсээр дөрлөчихсөн, хөсөр олсоор дөрөө хийгээд сэмбэлзүүлэн давхиж явахыг харсан ч гэх шиг үнэн худал нь мэдэгдэхгүй явган яриа газар авчээ. Удалгүй “Сарлагт” эмгэний ганц охин нь гэгээн цагаан өдөр гэнэт нас барж олныг бүүр ч цочроов. Түүнийг гэрээс нь гаргаж хөдөөлүүлэх хүн бараг байсангүй. Нутаг хошуугаа бузарлуулахгүй гэсэн хэдэн гүжирмэг эрс хөөрхий талийгаачийг хөдөөлүүлсэн болжээ.

“Сарлагт” эмгэний амиа тавин хайрлаж байсан хэдэн сарлаг нь уул хадаар тэнэж “хээрийн нохойн” хоол болж, үлдсэн нь үхэж үрэгдэж дуусчээ. Дөрвөн ханатай өөвгөр бор гэрийг нь төлийн пүнзэнд хураасан боловч ганц шөнө хаанаас ч юм бэ, бүү мэд их гал гарч хайлснаар газар дээр ганц шон ч үлдсэнгүй. Тэгсэн атлаа “Сарлагт” эмгэн явахгүй, түүгээр үл барам “Шинэ” Самдангийн хот айлыг түйвээгээд амар заяа үзүүлэхээ больжээ. Самдангийн хоточ ноход нь цагаан гэгээ тасрахын алдад хотоо тойруулаад хий юм хөөгөөд л хазаж авах мэт хунгар цас руу хамраар шурган унах нь айдастай ч юм шиг, инээдэмтэй ч юм шиг санагдана. Харин “Шинэ” Самдан гуай ташуурынхаа сагалдаргыг буруу харуулж бариад гогцоорсон нүхээр нь харж байснаа,
- “Сарлагт” эмгэн золиг л саваагүйрхэж явна гээд ер тоодоггүй гэнэ. Хаврын анхны ногооноор “Шинэ” Самдан гуай хотоос ирсэн дүүгээ дагуулан зэгсэн халамцуухан давхиж явснаа мориноос гэнэт буун харайж цулбуураа дүүдээ атгуулаад хормойгоо шуун бүсэндээ хавчуулаад ганцаараа сүртэй гэгч ямар нэгэн юмтай барилцаад авчээ.

Дүү нь учрыг нь олж ядан “Энэ ах чинь арай...” гэсэн шүү юм бодон гайхан харж байтал “Муу сарлагт нохой одоо хүртэл тонилохгүй юугаа хийгээд байгаа юм бэ? Ганц охиныхоо толгойг залгилаа, хэдэн сарлагаа барлаа. Гал голомтоо хийсгэлээ. Одоо чамд юу хэрэгтэй юм бэ?” гээд л далдын юмтай ноцолдоод байжээ. Удсан ч үгүй үхрийн туруу сайран дээр шижигнэж дэрстэй тойрмын тийш үхэр унасан хүн уйлагнаад сүүтэгнээд яваад өгчээ. Самдан гуай завилж суугаад тамхиа нэрэнгээ “Ёх, сарлагтыг арайхийн явуулаа” гээд хөлсөө шударч байжээ. Түүнээс хойш “Сарлагт” эмгэний сүг сүүдэр бүрмөсөн арилсан гэнэ лээ. Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Цаазын ялыг сэргээх нь зөв үү?
  • Зөв
  • Буруу
  • Насаар нь хорих хэрэгтэй
  • Мэдэхгүй