Өрсөлдөгчөөсөө хонзон авах гээд өөрийгөө тоосгоджээ
2016 оны 11 сарын 5

Анд нөхөд байгаад атаатан дайснууд болсон түүх хүний ертөнцийн буурал замд өчнөөн бий. Бидний хамгийн сайн мэдэх Тэмүжин, Жамух хоёр байна. Гэхдээ Тэмүжин хар багын андынхаа мууг үзэж, бахаа хангах гэж улайрдаггүй. Тэр бүү хэл өөртэйгөө хамтарч дэлхийн дайдад энхжинг тогтоох санал тавьдаг. Энэ мөн чанараараа, энэ мөс чанараараа Тэмүжин аугаа их хүн гэдэг төрөлд зуун хувь тэнцэж чадсан ажаам.
Харин нөхөрлөлдөө цэг тавьсан даруйдаа түүнийг өршөөн хэлтрүүлэхийн оронд өсөрхөн занаж, мунхаг бузрын илдийг далайж явах нь хүнийг хүн биш адгийн муу аалзнаас ч долоон доор болгодог байж мэдэх юм.

Энэ бяцхан хэрэг явдал дээрх санаанд хангалттай хариулт болохгүй ч байж мэднэ. Гэхдээ мэргэн уншигчийн шийдэх асуудал энэ болох тул болсон явдлын талаар л өгүүлэх нь зөв байх. Дорлигжав, Банди хоёр нэг жил жолоо төгсч тэр үеийнхний хэллэгээр “Жолооны гурав”-тай салжээ. Шинэ жолоочийг хуучин муу ямбий машин л хүлээж байх ёстой тийм жишиг тогтсон үе байлаа. Дорлигжав талын нэг тарж, тоногдсон муу машинтай гурван сар ноцолдож байж нэг юм хөдөлдөг болгоод баазын хашаанаас “салж” анхныхаа замд гарчээ. Түүний замд хамт жолоо төгссөн Банди нь болзсон юм шиг цоо шинэ машин уначихсан явж таарчээ.

Банди их л дээрэлхүү болчихсон байв. “Чамайг баазын манаач өвгөний орлогч болсон гэж сонссон юм” гээд машин руу нь шоглонгуй харж “Та хоёр минь тэгээд хаа хүрэх гэж яваа юм дээ?” гэж хорыг малтжээ. Ямбий болсон машинтай нь түүнийг ихэрлүүлж “Та хоёр минь” гэсэнд Дорлигжав дургүйлхэж “Чам шиг арын хаалгаар гүйдэг албин чөтгөр би биш. Анхны замд минь яасан гоё үг хэлж тааралдах юм” гэжээ. Банди ч “Зам бол  хол явна аа. Та хоёр тэр гүвээг давчихвал ч Москва орсонтой адилхан гэж бод” гэж хөхөрснөө машинаа хэдэнтээ хүнгэнэтэл хаазлаад давхиж оджээ. Дорлигжав түүний хойноос нулимж “Онхолдож үхмэр!” гэж жолооч хүний амнаас гарамгүй хар муу үг хэлжээ. Ёстой юм шиг Бандийн хэлсэн гүвээг давж чадалгүй машин нь эвдэрч баазаас машин дуудаж, чирүүлэн мөнхийн зогсоолд нь нөгөө эвдэрхий тэргээ тавьсан Дорлигжав нэг курсын Бандитай тангараг тасарсан байна.

Шинэ машин байтугай хуучин ч олдохгүй хоёр жил слесарь хийж, архаг жолооч нарын нэргүй зарц болж яваагаа тэр  Бандиас болсон гэж бодон бүүр түүндээ үнэмшчихсэн байлаа. Бандийн машиныг арчлах тослохдоо зарим эд анги, эрэг шургийг нь суллаж орхино. Түүндээ сэтгэл нь ханахгүй. “Муу новшийг сайн чадах юмсан” гэж амандаа “маань” уншиж явдаг болов.

Бүүр Бандийг алчихвал түүнд шинэ машин өгчих юм шиг санагдах болсныг яана. Баазынхан шинэ жилээ тэмдэглэж оройтож тарахад Дорлигжав Бандиас олон сар, хоногоор хадгалж ирсэн өс хонзонгоо авахаар шийджээ. Банди жилийн ажлаараа тэргүүлсэн нь бүүр ч дургүйг нь хүргэж байв. Дорлигжав Бандийн хойноос сэмхэн дагажээ. Замдаа тоосго авч ханцуйлаад булан тойроход нь цохихоор шийджээ. Урд талд нь амандаа дуу аялан алхаж яваа Банди уурандаа шатаж үхэх шахсан Дорлигжавт өөр шиг нь харагджээ. “Аа, тэгнэ вий” гэж байдаг чадлаар Бандийн толгой руу тоосгоороо буулгаад авсан Дорлигжав эмнэлгийн орон дээр ухаан оржээ. Бандийн мэдүүлснээр түүнийг харьж явахад нэг хүн гүйж ирээд эргэж харах зуур толгой руугаа тоосгоор цохиод муухай орилон ухаан алдан унажээ. Гайхсан Банди түүнийг татаж үзэхэд Дорлигжав байсан гэнэ. Энэ хэрэг чамгүй хугацаанд цагдан сэргийлэхээр мөрдөгдөж, хүн хэзээ ч өөрийгөө тоосгодохгүй. Бүүр ар дагз руугаа цохино гэж байхгүй гэж үзсэнээр танхайн хэргээр Бандийн машиныг хурааж, ажлаас нь хөөх арга хэмжээ авчээ. Дорлигжав атаа хорсолдоо дэндүү автаж, бузар муухай хэрэг хийх гэснийг нь хэн нэгэн ч юм уу, бурхан ч юм уу зохицуулсан байж болох юм. Сүүлд Дорлигжавыг жолооч нар “Наадах чинь бусдыг байтугай өөрийгөө тоосгоддог хүн шүү. Болгоомжтой бай” гэж баазад шинээр ажилд орогсдод хэлж тоглоом наргиан үүсгэдэг байж. Муу санаа биеэ отно гэдэг үг ч байдаг.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Ерөнхийлөгч Ц.Элбэгдоржийг хугацаанаас нь өмнө огцруулахыг та дэмжиж байна уу?
  • Дэмжиж байна
  • Дэмжихгүй
  • Мэдэхгүй