Ж.Мөнхбат: Зээл төлөх хугацааг сунгахаар ярилцаж байна
2017 оны 1 сарын 6

Манай улс ирэх гуравдугаар сард 580 сая еврог бондын зээлд төлнө. Тус зээлийг хэрхэн төлөхөөр Засгийн газар ажиллаж байгаа талаар Засгийн газрын Хэрэг эрхлэх газрын дарга Ж.Мөнхбатаас тодрууллаа.

-Манай улс ирэх гуравдугаар сард 580 сая евро бондын зээлийг төлнө. Энэ зээлийг төлөх санхүүжилт хайж байгаа ч зээл хүссэн орнууд манай улсад зээл өгөхөөс татгалзсан гэсэн. Тэгэхээр энэ зээлийг хэрхэн төлөх вэ?

-Манай улсад энэ зээлийг төлөх гурван гарц байна. Нэгдүгээрт, зээл авч зээлээ төлөх, хоёрдугаарт зээлийн хугацааг сунгах, гуравдугаарт энэ зээлээ төлж чадахгүй гэдгээ олон улсад зарлах. Гэхдээ төлж чадахгүй гэдгээ зарлана гэдэг улс орны хувьд хүнд байдал үүснэ. Тиймээс дундын хувилбар буюу зээл төлөх хугацааг сунгах нь өнөөдрийн манай улсын нөхцөл байдалд хамгийн зөв хувилбар гэдэг дээр ярьж байна. Гэхдээ энэ асуудалд эцсийн шийдвэр гараагүй. Удахгүй ОУВС-гийн баг манай улсад ирж уулзалт хийнэ. ОУВС-аас зээл авах эсэх нь энэ сардаа багтаад эцэслэн шийдэгдэнэ.

-Энэ зээлийг МАН-ын Засгийн газар ажиллаж байхдаа авсан гэсэн. Яг юунд зарцуулсан юм бэ. Хэрвээ төсөл, хөтөлбөр санхүүжүүлсэн бол төсөл хөтөлбөрөөр нь эргэн санхүүжүүлээд зээлээ төлж болохгүй юу?

-Ер нь бондын мөнгө, Хөгжлийн банкны санхүүжилтүүд нэлээд асуудалтай зүйлүүд байна. Өнгөрсөн дөрвөн жилийн хугацаанд Хөгжлийн банкан дээр хууль зөрчсөн, сахилга, хариуцлага алдсан. Энэ нь эдийн засаг хүндрэх, авсан зээлээ буцаан төлж чадахгүйд хүрэх нөхцөл байдалд оруулсан.

-УИХ-ын дарга өнгөрсөн сард ОХУ болон Арабын улсуудад айлчиллаа. Энэ үеэрээ ОХУ-аас зээл авах хүсэлт тавьсан боловч зээлээ юунд зарцуулах нь тодорхойгүй гэж үзээд зээл өгөхөөс татгалзсан гэсэн мэдээлэл байна. ОХУ манайд зээл өгөхөөс татгалзсан гэсэн нь үнэн үү?

-Ийм асуудал болсон гэдгийг мэдэхгүй байна. Харин хэвлэлээр янз бүрээр л бичиж байна. Гэхдээ эдийн засгийг босгож ирэхийн тулд, тогтвортой хэвийн байлгахын тулд яалтчгүй гаднын зээл тусламж, хөрөнгө оруулалт авах зайлшгүй хэрэгтэй байгаа. Энэ тал дээр Засгийн газрын гишүүд өөр өөрсдийн шугамаар, чиглэл бүрээр ажиллаж байгаа. Хөгжлийн банк, Чингис бондын эргэн төлөлт, БНХАУ-ын Ардын банкны своп зээл гээд маш их хэмжээний өртэй улс орныг МАН хүлээж авсан. Үүнээс гаргах асуудлыг бүх талаас ярьж, хөөцөлдөж байна.

-Тэгэхээр Засгийн газар энэ зээлийг төлөх хугацааг хойшлуулах хувилбарыг сонгож байгаа гэж ойлгож болох уу?

-Зээл төлөх асуудлыг нэг өдөр яриад ч юм уу, нэг талын тавьсан саналаар шийдэхгүй шүү дээ. Олон удаагийн уулзалт, яриа хэлэлцээр хийж байна. Тиймээс удахгүй шийдэгдэнэ.
Эх сурвалж: itoim.mn
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Монгол Улсын Үндсэн хуульд нэмэлт, өөрчлөлт оруулах нь зөв үү?
  • Зөв
  • Буруу
  • Мэдэхгүй