Д.Оюунхорол: Халаагуур, тоолуур зэргийг лизингээр олгоно
2017 оны 1 сарын 9

Нийслэлийн утааг бууруулах зорилгоор иргэдэд цахилгаан халаагуур зэргийг хөнгөлөлттэй зээлээр олгох талаар БОАЖ-ын сайд Д.Оюунхорол мэдээлэл өгчээ.

Тэрбээр "Нийслэлийн агаарын бохирдлыг бууруулах зорилгоор 2017 оны нэгдүгээр сарын 01-ний өдрөөс эхлэн гэр хорооллын айл өрхийн шөнийн цагт ахуйн зориулалтаар хэрэглэсэн цахилгааны үнийг тэглэлээ. Энэ хөнгөлөлтөд 146 мянган хэрэглэгч хамрагдах боломжтой.

 Гэр хорооллын айл өрхүүд энэ боломжоо зөв, бүрэн ашиглаж чадвал маш сайн үр дүн гарна. Иргэдээс, айл өрхөөс хамаарах зүйл их л дээ. Жишээ нь, гэр хорооллын нийт хэрэглэгчдийн 75 хувь нь тарифт тоолууртай байна. Гэхдээ өнөөдөр ард иргэд маань бүгд  цахилгаан халаагуур авах боломжгүй. Тиймээс цахилгааны тарифыг хөнгөлсөн нь нөгөө талдаа стандарт бус цахилгаан халаагуур хямд авах, борлуулах боломжуудыг нээчих вий, галын аюул дагуулах вий гэдэг болгоомжлол байна.

Тиймээс БОАЖЯ, нийслэлийн ЗДТГ хамтран 9, 10-ний өдрүүдэд “Агаарын бохирдлыг бууруулах технологийн үзэсгэлэн”-г Монголын Үндэсний худалдаа аж үйлдвэрийн танхимд зохион байгуулах гэж байна. Дулаан алдагдал болон агаарын бохирдлыг бууруулах технологийн шийдлүүдийг танилцуулах зорилготой энэ үзэсгэлэнд 50 гаруй аж ахуйн нэгж оролцоно. Энэ үзэсгэлэнд төрөл бүрийн цахилгаан халаагуур, шалны халаалт, гэрийн дулаалга, сайжруулсан түлш болон шингэрүүлсэн хий, сэргээгдэх эрчим хүч, агаар цэвэршүүлэгч, бохирдол бууруулах төхөөрөмжүүдтэй танилцаж, нэг дороос сонголтоо хийх боломжтой.

Мөн БОАЖЯ-наас Монголын банкуудын холбоотой хамтран гэрийн цахилгаан халаагуур болон шөнийн тарифт тоолуурыг лизингээр авах боломжийг бүрдүүлэхээр ажиллаж байна. Өнөөдөр бэлэн мөнгөөр цахилгаан халаагуур болон шөнийн тарифт тоолуур худалдан авч чадахгүй байгаа айл өрхүүд хөнгөлөлттэй зээлээр шөнийн тарифын хөнгөлөлтдөө хамрагдах боломжийг бүрдүүлж өгнө" гэжээ.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Монголд нефть боловсруулах үйлдвэр байгуулах хэрэгтэй юу?
  • Хэрэгтэй
  • Хэрэггүй
  • Мэдэхгүй