Түрээсийн орон сууц хөтөлбөрт 200 айлыг шинээр хамруулна
2017 оны 1 сарын 11

Төрийн орон сууцны корпораци /ТОСК/-иас “Буянт-Ухаа II” хорооллын гурван өрөө бүхий 200 айлын байрыг иргэдэд түрээслүүлэхээр болжээ. Байр түрээслэх хүсэлтэй иргэдийг хоёрдугаар сард сугалаагаар тодруулах юм байна. Гэхдээ өнгөрсөн жил орон сууц түрээслэхээр ТОСК-д өргөдөл өгсөн 2000 иргэний дунд л зөвхөн сугалаа явуулах аж. Өөрөөр хэлбэл, түрээсийн орон сууц хөтөлбөрт хамрагдах өргөдөл, хүсэлтийг иргэдээс шинээр авахгүй гэсэн үг.

Чингис бондын санхүүжилтээр боссон “Буянт-Ухаа II” хорооллын 50 хувийг иргэдэд түрээслэх шийдвэр гаргаж байсан билээ. Тэгвэл шинэ оны өмнөхөн Ерөнхий сайд Б.Эрдэнэбат дээрх хувь хэмжээг 70 болгож, иргэдэд түрээслэхээр өөрчилжээ. Тус хороололд борлогдоогүй байгаа гурван өрөө байруудыг 200 өрхөд мКв-ыг нь 5500 төгрөгөөр түрээслүүлэх аж. “Буянт-Ухаа II” хорооллын гурван өрөө байр нь 70 орчим мКв талбайтай гэж тооцвол иргэд гурван өрөө байрыг нэг сард 385 мянган төгрөгөөр түрээслэх нь ээ.

Сүүлийн үед Засгийн газар иргэдтэй тохиролцож хашаа байшинг, зарагдаагүй орон сууцаар солино гэсэн мэдээлэл цацагдах болсон. ТОСК-ийн тухайд Хан-Уул дүүрэг, Яармаг явах зам дагуу “Мөнххада” төвийн хойно байрлалтай 140 айлын хашаа байшинг, “Буянт-Ухаа II” хорооллын байраар сольж, оруулжээ. Орон сууцаар сольсон газраа удахгүй дахин орон сууц барих төлөвлөгөөг албаныхан гаргасан байна. Өмнөх Засгийн газрын үед түрээсийн орон сууцыг иргэдтэй тохиролцож, сарын түрээсийн төлбөрөөс гадна урьдчилгаа мөнгөө давхар төлбөл, тухайн байрыг нь орон сууцны зээлд хамруулж худалдана гэж ярьж байсан. Энэ асуудал цааш хэрхэн үргэлжлэх, яаж шийдэх гэдэг нь одоогоор яригдаагүй, тодорхойгүй байгааг ТОСК-ийн Дэд захирал Б.Цээпилдорж ярилаа.

Одоогоор Улаанбаатар хотод  590, орон нутагт 900 орчим  айл түрээсийн орон сууц хөтөлбөрт хамрагдаж, ТОСК-тай гэрээ байгуулан амьдарч байна. Нийслэлд “Буянт-Ухаа II” хороолол болоод “Хангай” хотхоны байруудыг иргэд таван жилийн хугацаатай амьдрахаар, түрээслэжээ. ТОСК 2020 он хүртэл жил болгон 2000 өрхийг түрээсийн орон сууцад хамруулах төлөвлөгөө боловсруулан ажиллаж буй гэлээ. Гэхдээ эдийн засаг уналтад орсон ийм үед төсвийн мөнгөөр биш, гадаадын хөрөнгө оруулалтыг татаж, шинээр орон сууц барих аж. Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Гарцгүй газраар зам гарвал 20 мянгаар торгохыг та дэмжиж байна уу?
  • Дэмжиж байна
  • Дэмжихгүй