Трамп: Төсөв миний эрх чөлөөг хасдаг
2017 оны 6 сарын 7
Дональд Трампын "ХӨГЖИЛ ДЭВШИЛД ХҮРЭХ ЭХНИЙ 90 ХОНОГ" номоос...

“БИ ТӨСӨВ ЭРХЛЭХИЙГ ХҮСЭХГҮЙ” ГЭДЭГ САНХҮҮГИЙН АВТОМАТЖУУЛСАН СИСТЕМИЙГ ХЭРЭГЛЭ

Жон Бэрли

Энэ бол санхүүгийн хувьд амин чухал зүйл. Төсвөө барих хэрэгтэй бүхэнд, хүн нэг бүрт чухал зүйл.


Зардлаа багасгах ёстой гэдэг үгэнд олон хүн, түүний дотор би дургүй. Тэр ч байтугай “төсөв” гэдэг үг тэдэнд таалагддагүй. Төсвийн тухай яриа өрнөмөгц надад сонсогддог дургүйцлийн зарим үгийг дурдвал:
    • Төсөв дэндүү хатуу, намайг хязгаарлаж байдаг. Төсөв миний эрх чөлөөг хасдаг.
    • Төсөв дэндүү хэцүү. Түүнийг дагахад хүнд байдаг.
    • Төсөв үнэн хэрэг дээрээ үр ашиггүй. Төсөв бүтэлгүйтэл рүү чиглүүлдэг.
    • Төсөв шударга бус. Төсөв маргаан үүсгэдэг.
    • Төсөв эрхлэгчийг хараад дургүй хүрдэг. Мөнгийг би хичнээн муу захиран зарцуулдагаа мэдэхийг хүсэхгүй байна.
   
Энэхүү жагсаалтыг цааш үргэлжлүүлж болно. Та ч гэсэн өөрийн дургүйцлээ дурдаж болно. Тийм ч учраас би төсвийн тухай огт өөрөөр ярихыг эрхэмлэдэг юм. Төсөв нь таныг мөнгөний төлөө ажиллах болгодог. Дээр дурдсан зүйлсийн оронд таны мөнгийг би таны тусын тулд зарцуулагддаг болгодог “санхүүгийн системийн” тухай, эцсийн дүнд төсвөөс бидний хүлээж байдаг чухам тэр зүйлийн тухай ярина.  
   
Дунд зэргийн амьдралтай гэр бүлийн хувьд төсвийн тухай ойлголт, бүр чухал нь түүнийг хэрэглэх явдал энгийн байх ёстой. Олон гэр бүл зардлаа хянахын тулд төсөв зохиодог, гэхдээ тийм төсөв урт хугацааны ирээдүйтэй байх нь ховор. Төсөв нь бас гэр бүлийн гишүүдийн харилцааг хурцатгадаг. Заримдаа төсөв нь мөнгөний эргэн тойронд өрнөдөг тэмцлээс болж гэр бүлийн санхүү, олон тохиолдолд харилцааг устгахад хүргэдэг байна. Төсвийн товч намтар ийм байна, харамсалтай нь хичнээн сайн сайхан юм төлөвлөлөө гэсэн төсөв олонхи гэр бүлд зөвхөн бүтэлгүйтэл авчирдаг юм.
   
Энгийнээр хэлбэл, төсөв нь санхүүгийн зорилгоо ажиглан хянах, түүнд хүрэх, түүнийгээ дэмжиж байхад тань танд тус­лагч хэрэгсэл л байх ёстой. Төсөв буюу санхүүгийн систем таныг захирах биш танд үйлчлэх ёстой. Энд “ёстой” гэдэг үг гол зангилаа үг байна.
   
Олон жил би төсөвт тун ч дургүй байсан учир түүнгүйгээр болох арга замыг олохыг хүртэл оролдсон билээ. Төсөвт захирагдалгүйгээр амжилт олсон компанийн ядаж ганц жишээг олвол би ч гэсэн түүний боол болохгүй гэж өөртөө амлаж байлаа.
   
Ямар үр дүнд хүрснийг таасан уу? Санхүүгийн тогтоосон хязгаарлалтгүйгээр амжилт олдог компани гэж ганц ч байдаггүй нь хэдэн жилийн дараа надад тодорхой болсон юм.
   
Санхүүгийн урт хугацааны эрх чөлөөг олж авахын тулд би ч гэсэн мөнгөө захиран зарцуулах системийг боловсруулан хэрэг­лэх болсон билээ. Гэхдээ миний хувьд төсвийг үнэнч шударга, нягт нямбай, амжилттай баримтлах нь өөр зүйл байлаа. Энэ шинэ систем хуучин системээс тэс ондоо болох ёстой байв. Уг систем нь:
    • Хэрэглэхэд энгийн, тохиромжтой байх
    • Их цаг авахгүй байх
    • Аятайхан, зохистой зарцуулалт хийх эрх чөлөөг хангах
    • Хялбархан байх, цент бүрийг нүд цавчилгүй хянаж байхыг надаас шаарддаггүй байх
    • Үр дүнгээ даруй өгдөг байх
    • Эцсийн дүнд үлдсэн бүх амьдралд хүрэлцэх мөнгө өгөхүйц хөрөнгө оруулалт хийхэд хэрэгтэй мөнгөтэй болгох
    • Миний хэрэглээний бүх өрийг зохистой хугацаанд төлөх
    • Сонгосон өглөг буяны үйлсэд хандив өгөх бололцоо олгох
    • Жинхэнэ, урт хугацааны санхүүгийн эрх чөлөөг хангаж өгөх
    • Ажиллаж эхэлмэгц нь түүний байгааг мартахаар тийм авто­матжсан, энгийн байх ёстой.
    Бүхэлдээ надад хэрэглэхэд хялбархан санхүүгийн систем хэрэгтэй. Энэ систем өөрийнхөө хувийн санхүүгийн өсөлтийн төсвийг тогтоох бололцоог надад олгох ёстой. Би энэ системийг “төсөв эрхлэхийг хүсэхгүй” гэдэг Санхүүгийн автоматжуулсан систем гэж нэрлэсэн юм.

САНХҮҮГИЙН АВТОМАТЖУУЛСАН СИСТЕМ
Миний семинарт суудаг оюутнуудад би санхүүгийн авто­мат­жуулсан системээ танилцуулахдаа, та нар төсөвт хэрхэн ханддаг вэ гэсэн асуултаас яриагаа эхэлдэг юм. Ёолж гаслах нь дууссаны дараа би тэдэнд та нартай санал бүрэн нийлж байна гэж хэлдэг. Тэгээд асуудал төсөвт тулаад ирэхлээр би “санхүүгийн төлөвлөлтийг эсэргүүцэгч” болдог. Тэгээд “Төсөв бол новшийн эд” гэж хэлдэг.
   
Дараа нь би энэ бол санхүүгийн нэртэй хүний үг гэдгийг танилууддаа ярьж, энэ бол ёстой үнэн болохыг батласан бүх шалтгааныг чөлөөтэй тоочихыг тэдэнд зөвшөөрдөг.
   
Дараа нь тэд суудлаасаа босч, нударга зангидан гараа дээш өргөн аянга ниргэх мэт чанга дуугаар нэгэн зэрэг “Төсөв бол новшийн эд!” хэмээн хэд хэдэн удаа хашгирдаг юм. Энэ нь хичнээн тэнэг харагдаж, сонсогдовч уг дасгал нь маш ашигтай. Энэ дасгал таны амьдрах хэв маягийн хувьд төсөв гэж юу болох тухай түрүүчийн бодлоос ангижрахад туслана. Төсөв зохиох хичнээн хэцүү, уламжлалт төсвийг хэрэглэж, дагахад хичнээн бэрх тухай сөрөг төсөөллөөс ангижрахад уг дасгал туслана.
   
Одоо та ч гэсэн зарим нэг сөрөг бодлоосоо ангижирч болно. Гурав тоолоход босоод нудрага зангидан гараа дээш өргөж, “Төсөв бол новшийн эд!” гэж чанга дуугаар хашгираарай!

   
Харин одоо ертөнцийг үзэх шинэ үзэл эзэмшихэд бэлтгэ. Миний систем гагцхүү таашаал, эрх чөлөөнд чиглэсэн юм, учир нь тэгшитгэлийн сөрөг(зардлын) талд (дашрамд энэ бол уламж­лалт төсвийн анхаардаг цорын ганц тал) таны тавьдаг ан­хаа­ралтай харьцуулвал, эерэг талд (ашиг, хадгаламж, хөрөнгө оруулалт) илүү хүчтэй анхаарна гэдэг ганцхан энгийн зарчмыг баримталдаг юм. Энэ балансыг хангаж чадвал төсөв таны өөрийн санхүүгийн өсөлт, таны үнэхээр эзэмшихийг хүсч буй баялгийг бүтээх явдалд зориулагдсан төсөв байх болно. Энэ бол таны систем ч, ингэхлээр тэр танд баяр баясгалан авчрах ёстой. Та хүсч байгаа бүх юмаа золиослох хэрэгцээ байхгүй, үнэн хэрэгтээ энэ систем нь таашаал авах зарим орон зайг өөртөө үлдээж байгаа учраас танд тохирч байгаа юм.

Санхүүгийн эрх чөлөө өөд хөтөлж, баялаг бүтээх бололцоог танд олгох энгийн бөгөөд маш үр ашигтай таван алхамыг дурдая. Тэдгээрийг нэг бүрчлэн авч үзэж, хэлэлцэцгээе.
   
1. Хөрөнгө оруулалтын автоматжуулсан төлөвлөгөө нэвт­рүү­лэх. 7, 8 дугаар бүлэгт тодорхойлон бичсэнээр, та хөрөнгө оруулалтын автоматжуулсан төлөвлөгөөг хэрэгжүүлж, сар бүр нийт орлогынхоо 10 хувийг дэс дараатайгаар баялаг бүтээхэд шилжүүлж байх хэрэгтэй. Дараа нь энэ мөнгийг өөрийн хөрөнгө оруулалтын туршлага дээр үндэслэн ХОАТ-нд оруул. Энэ таны мөнгийг даруй өөрийн тань тусын тулд зарцуулагддаг болгоно. Арван хувь гэдэг их мөнгө шиг санагдаж болно, гэхдээ тийм биш. Тийм хэмжээнээс эхэлж чадахгүй бол түүнээс бага хэм­жээнээс эхэл. Эхлэхэд л асуудлын мөн чанар оршино! Энэхүү халдашгүй 10 хувь ажиглагдах ч үгүй байна гэж миний оюутнууд надад ярьдаг. Энэ бол таны мөнгөний шинэ системдээ хийж буй анхны алхам юм. Энэ алхамыг саатуулагч “цөөхөн мөнгө юу ч шийдэхгүй”, “үүнд миний хөрөнгө мөнгө хүрэлцэхгүй”, “би юунд мөнгө оруулахаа мэдэхгүй байна” гэсэн гурван тайл­барыг санаж байна уу. Энэ гурван шалтгийн аль аль нь таны орлогын хэмжээг баталгаатай хасах 100 хувь болгоно, учир нь мөнгө алдагдсан, үрэгдсэн, түүнийг та дахин хэзээ ч харахгүй. Ухаангүй явдлаа зогсоо. Хэрэв та дээр дурдсан шиг аян шалтаг заагаагүй байгаа бол яг одоо ХОАТ-гөө хэрэгжүүлж эхэл.
   
2. Өр барагдуулах төлөвлөгөө зохио. Наймдугаар бү­лэгт миний хэлсэнчлэн, өрнөөс салах асуудлыг хэлэлцэхдээ нийт орлогоосоо дахин 10 хувийг гаргаж, өрийнхөө хэмжээг тогтмол, сар тутам багасга. Ингэж шаргуу ажиллавал та орон сууц, машиныхаа зээлийг оролцуулан гурваас долоон сарын дотор өрнөөсөө бүрэн салах болно.
   
3. Өглөг буяны хандив өргөх төлөвлөгөө зохио. Нийт орлогын 10-аас доошгүй хувийг өглөг буяны үйл хэрэгт зориул. Энэ бол хүлээсэн хариуцлага мөн, нөгөөтэйгүүр баялаг бүтээх, түүнийгээ сайн зарцуулах чадварын нэг тал болой. Миний танил баячууд өглөг буяны үйлсэд хандив өргөдөг. Энэ нь тэднийг авч ч чаддаг, өгч чаддаг хүмүүс шиг ёс суртахууны чанартай, өгөөмөр сэтгэлтэй болгодог юм. Ядуус, дундчуудын олонхи нь өглөг буяны үйлсэд тогтмол хандив өргөдөггүй, тэгвэл баян хүмүүсийн ихэнх нь хандивлаж байдаг нь сонин. Амжилт ардаа түлхүүр үлдээдэг, бусдад өгөх хэрэгтэй гэсэн миний санаа үүнд л байна. Хэрэв та баян биш, бас юу ч өгдөггүй байлаа гэхэд үзээд алдвал юу алдах вэ? Юу ч алдахгүй! Болно оо. Энэ ажлыг хий. Санхүүгийн шинэ системийнхээ нэг хэсэг болгон өглөг буяны үйлсэд оролцох төлөвлөгөө зохиохыг та нарт би хичээнгүйлэн зөвлөх байна. Та нарын зарим нэг нь “Хөрөнгө оруулалтаас 10 хувийг шахаж гаргахаа мэдэхгүй байхад минь намайг дахин 10 хувийн өр төлөх гэж мунгинаж байхад, дээр нь бас 10 хувийг нь өглөг буяны үйлсэд зориул гэж байдаг! Би хэзээ ч тэгж чадахгүй. Би ердөө ингэж чадахгүй” хэмээн бодож болох юм. Ойлгож байна. Би өөрөө тэгж боддог байсан. Эхэл, яг одоо эхэл гэж би зөвлөх байна. Хэрэв та эдгээр нэн чухал зүйл тус бүрт хэдхэн хувийг зориулан гаргаж чадвал ёстой онцсайн хэрэг. Та эдгээр нэн чухал тус бүрт зориулан 10 хувийг гаргадаг болох хүртэл хувь хэмжээгээ сар бүр бага багаар нэмж болно. Үүний гол зангилаа зүйл нь даруй эхлэх явдал юм. Ийм үйл ажиллагаа танд урагшлан ахиж, санхүүгийн эрх чөлөөтэй болох эрч хүчийг хангаж өгнө.
   
4. Өргүй амьдрах хэв маягийг эзэмш. Өрнөөс ангижирна гэдэг дахиад өр тавина гэсэн үг биш, харин ердөө л эрүүл саруул ухаанаар ажиллахыг хэлнэ. Таны санхүүгийн шинэ систем амьдралын энэ шинэ хэв маягийн салшгүй нэг хэсэг болох ёстой. Зөвхөн бэлнээр төлөх (сар бүрийн эцэст бүрэн төлж байх хэрэгтэй зээлийн карт үүнд хамаарна), хяналт тавьж байх зэрэг хуучин энгийн арга ашигтай байж болно. Үүнийг би ингэж үзэж байна. Олон хүн “Надад шинэ костюм хэрэг­тэй” гэдэг. Тэгвэл шинэ костюмны чек ирэхэд түүний үнийг төлж чадахгүй бол танд шинэ костюм хэрэггүй! Үнийг нь төлж чадах юмаа л худалдаж ав. Та богино хугацаанд хэр чинээгээрээ амьдарна хожим үлдсэн бүх амьдралаа мөрөөдөж ч байгаагүйгээр сайхан өнгөрүүлэх болно.
   
5. Үлдсэнийг нь үр (наргицгаая!) Энэ бол амархан зүйл. Дээр дурдсан стратегийг ягштал баримталж, үндсэн өрөө төлөөд үлдсэн мөнгөө үрж болно. Тийм ээ, та буруу дуулаагүй. Тэр мөнгийг ямар нэг гэмших сэтгэлгүйгээр хүссэн хэмжээгээрээ үр. Ихэнх хүн одоо ямар нэг бөөн хог биш харин хэрэгтэй юмаа авч байгаагаа мэддэг. Ийнхүү тэд эцсийн дүнд сайн юмтай, их мөнгөтэй болдог байна. Та ч гэсэн яагаад ингэж болохгүй гэж? Даруй эхэл. Энэ нь уг энгийн системийн нэг сайхан тал юм. Энэхүү систем таныг үлдсэн бүх мөнгөө хэрэгтэй бүхэндээ уян хатан зарцуулдаг болгоно.
   
Таван алхамаас бүрдэх эл төсөв таныг хөдөлмөрлөхөд хүргэдэг тэр төлөвлөгөө огт биш харин өөрөө таны тусын тулд ажилладаг автоматжуулсан систем болохыг та ойлгож эхэлж байгаа гэж би бодож байна.

Ихэнх хүний хувьд энэ систем энгийн бөгөөд нэвтрүүлэхэд түвэгтэй биш. Одоогийн байдлаар санхүүгийн хувьд тун ч хүндрэлтэй байгаа, эсвэл хөрөнгө мөнгө нь хүрлэлцэхгүй байгаа хүмүүс санхүүгийн уг системийг аажмаар нэвтрүүлэх хэрэгтэй болно. Та орлого, зарлагынхаа хэмжээнээс үл шалтгаалан энэхүү системийг амжилттай ашиглаж болно. Уг системийг зөв ажиллуулахын тулд зарим нь өчүүхэн төдий засвар оруулаад л болох байхад заримынх нь хувьд нэг бол орлого, нөгөө бол зарлагын үүднээс, эсвэл аль алиных нь үүднээс амьдралын хэв маягаа ноцтой өөрчлөх шаардлагатай болно. Зарим нь одоо чухамхүү өөрийн хүссэн амьдралын хэв маягийг дагаж байгаа боловч дураараа байж чадахгүй байна, гэвч тэд миний санхүүгийн шинэ системийг нэвтрүүлмэгц хүссэн амьдралаа зохиож чадна.
   
Энэхүү систем таарч тохирч байгаа. Эдгээр таван энгийн алхамыг дагаснаар санаа амар амьдрах болсон миний олон мянган оюутан дэлхий дахинд бий. Хэрэв та миний санхүүгийн автоматжуулсан системийг нэвтрүүлэхийн тулд ноцтой өөрч­лөлт хийх шаардлагатай хүмүүсийн тоонд багтаж байгаа бол цөхрөх хэрэггүй. Эхлэхээр шийдсэнээр л зөв чиглэлд орлоо гэсэн үг. Урагшаа! Энэ бол эцсийн дүнд таны сонголт. Санхүүгийн сүйрлийн урт хугацааны зовлон эдлэхийн оронд та түр зуурын зовлонг тэсч гарна гэдэгт би үнэн сэтгэлээсээ итгэж байна.
   
Одоо санхүүгийн энэ шинэ системийг хамгийн хялбар аргаар ажиллуулдаг зарим стратегид таны анхаарлыг хан­дуулъя.

ЗАРДЛАА БАГАСГА
Дунд зэргийн орлоготой гэр бүлийн хувьд зардлаа багас­гах нь орлогоо нэмэгдүүлэхээс хялбар байх нь олонтаа тохиолдоно. Ийм тохиолдолд амьдралаа улам түвэг уддаг болгох биш харин хялбар болгох зорилго тавь. Зардалдаа нарийвчлан дүн шинжилгээ хий. Хуучин чекүүдээ эргүүлж үзэн, худалдаж авсан ямар зүйл таныг нэг их баярлуулаагүй, эсвэл огт баярлуулаагүйг мэдэж ав. Олон хүн огт хэрэггүй үйлчилгээ хийлгэж мөнгө төлж байснаа мэдэж авдаг.
   
Зардлыг түргэн арилгах энгийн зарим нэг аргаас дурдвал:
    1. Юм авахаар явахдаа түрийвчээ гэртээ орхиж бай. Барааг үзээд түрийвчээ авахаар гэртээ харих замдаа ямар эд худалдан авахаа сайтар бод, тэгсний дараа дэлгүүрт буцаж оч, ингэснээр та бага юм худалдаж авах болно.
    2. Таныг их юм худалдаж авахад хүргэдэг маркетингийн технологийн учрыг ол. Жагсаалт, шуудан, утсан холбоо, цахим шуудангийн илгээмжээс өөрийн нэрийг хас.
    3. Түгээлтийн төлөөлөгчөөс юм бүү ав, харилцуур утсаар хандив бүү өг
    4. АТМ-картаас сал
    5. Харилцан туслах кассын гишүүн хэзээ ч бүү бол
    6. 30 хоногийн зардлынхаа тооцоог бичгээр хөтлө
    7. Жижиглэнгийн бүрэн үнийг хэзээ ч, юуны ч төлөө бүү төл
    8. Хямдруулахыг ямагт хүс, интернэтээр дамжуулан, арилжааны зарын дагуу худалдаа хий
    9. Зул сарын баярын бэлгэнд зарцуулдаг мөнгөнийхөө хагасыг л зардуулдаг бол
    10. Офисын тавилга хэрэгслийг бичиг хэрэгслийн дэл­гүүрээс биш үнэ хямдарсан барааны дэлгүүрээс худалдаж ав
    11. Дотоодын болон олон улсын ярианы үнэлгээтэй танилц. Үүрэн холбоогоор ярьсан яриа хийгээд зохих үнэлгээг тооцоолж бай
    12. Тээврийн өртгийг судла. Хямд үнээр үйлчлэх тусгай санал байгаа эсэхийг мэдэхийн тулд интернэт ашигла, эсвэл хөнгөлөлт зарлатал тийзийг нөөцөлж бай
    13. Ном худалдаж авахын оронд номын сангаас авч бай, уншсан номоо худалд
    14. Тэсвэр алдсан, төлөвлөөгүй зардал гаргахын оронд до­лоон хоногт нэг удаа хүнсээ худалдан авч бай. Авах юмаа урьдаас бэлтгэн жагсааж бич. Чанарын хувьд адилхан бол нийтэд танил болсон орон нутгийн үйлдвэрлэгчдийн бүтээгдэхүүнийг ав
    15. Улирлын эцэст хямдрал зарласан хойно хувцас ав
    16. Дараачийн удаа машин авахдаа эдэлж байсан сайн машин аваарай. Эвдрэлийг багасгахын тулд машинаа арчилж, үйлчилгээ хийж бай
    17. Болж өгвөл гэр бүлийн ахмад гишүүд, хүүхдүүддээ хөнгөлөлт ав

Та зардлаа хянаж үзвэл, мөнгөө юунд зарцуулж байгаагаа бодолгүйгээр үрэх хандлагатай байснаа бараг лавтай мэдэх болно. Өөрийн бодлогогүй үрлэгэн байдлыг харж, ямар ч хэрэггүй зүйл худалдаж авахаа боль. Энэ энгийн практикийг нэвтрүүлэх нь мөнгө хэмнэж, хэмнэсэн мөнгөө хөрөнгө оруу­лалтад, өрнөөс салахад, хандив өргөхөд зориулахад чинь туслах болно. Жил бүр хүүгийн төлбөрт хичнээн мөнгө зарцуулж байгаагаа бодоод та гайхах байх.
   
Хүү төлөхөд мөнгө төлөхөө болихоор таны санхүүгийн үзүү­лэлт түрүүчийнхээс ямар ялгаатай болохыг бодоод үзээрэй.

КОМПЬЮТЕР ХЭРЭГЛЭ
Хэрэв та компьютер дээр ажиллаж чаддаг бол санхүүгийн олон программын нэгийг хэрэглэхийг би маш хичээнгүйлэн зөвлөх байна. Эдгээр программ төсөв зохиох, зардлыг зүйл зүйлээр хуваарилах, ашиг орлогын татварын талаарх бүх мэ­дээл­лийг хадгалах, хөрөнгө оруулалтыг ажиглан хянах, он­лайнаар банкны гүйлгээ хийх зэрэг олон үйлдэх хийх бололцоо олгоно.

АЮУЛЫН ДОХИОГ АЖИГЛА
    Эдгээр дохио гэвэл:
    • Эхлээд алдаа гаргана шүү хэмээн бэлтгэлтэй бай
    • Уян хатан хүлээн авахад бэлэн бай. Гэнэтийн зарим зардлыг төлөвлө
    • Улирлын, хагас жилийн, эсвэл жилийн зардлаа төлжээ гэдэгт итгэхийн тулд тэмдэглэлээ нарийвчлан шалга
    • Ямагт, ялангуяа эхлэлийн үед хэзээд бэлэн бай
    • Тууштай бай, эгзэгтэй үед гэр бүлээсээ тусламж гуй. Гэр бүл гар хумхиж суувал төсвийн хамгийн том асуудал үүсдэг юм. Эцэг, эхийн аль нэг нь ямар нэг ажил шүүрэн авч бүхнийг ганц дайчин шиг ганцаараа хийхийг оролдож байхыг би олон удаа үзсэн. Энэ нь гол төлөв нэг хүн санхүүгийн шинэ программ зохиож, бэлэн бүтээгдэхүүнийг гэр бүлдээ тулган хүлээлгэхэд хүргэдэг юм. Үүнийг үглэх, буруушаах, том том дуугарах, зодол­дох, хэрүүл уруул хийх явдал дагалдах нь олонтаа билээ.
   
Бүү ингээрэй! Санхүүгийн шинэ системдээ ганцаараа, сөргөлдсөн байдалд бүү ор. Баг болон ажилла. Гэр бүлийнх­нийгээ анхнаас нь татан оролцуул. Ингэх хоёр чухал шалтгаан бий. Нэгдүгээрт, танд тэдний тусламж шаардлагатай, гэр бүлийн бүх гишүүн оролцож байвал ямар нэг зардал, эсвэл ор­логын эх үүсвэрийг харахгүй өнгөрөх аюул үлэмж багасна. Хоёр дахь шалтгаан гэвэл, төлөвлөлтийн үйл явцад танай гэр бүлийн гишүүдээс хэн нь ч оролцохгүй бол тэд мөнгө үрэх гэнэтийн шинэ журмыг эсэргүүцэж, тантай хамтран ажиллахгүй биз ээ.

ТЭВЧЭЭРГҮЙТЭН ЮМ АВАХ, МӨНГӨ ҮРЭХИЙГ БОЛЬ
Мөнгөө яаж үрэхээ бод. Өөртөө үнэхээр хэрэгтэй юмыг ав. Жаахан эрхлэх нь мэдээж таныг баллахгүй, харин хэтэрвэл баллана шүү! Шаардлагатай газар нь зардлаа хатуухан хянаж бай.
   
Сарын туршид мөнгөө яаж зарсан тухай дэлгэрэнгүй тэмдэглэл хөтөл. Өөрийн болон гэр бүлийнхээ санхүүгийн дадал зуршлыг ажиглаж байхын тулд гаргасан зардал бүрээ тэмдэглэн бичиж бай. Ингэх нь санхүүгийн жинхэнэ байдлаа тодорхойлох бололцоог танд олгож, санхүүгийн автоматжуулсан системийг шууд хүлээн авахад тань туслах болно. Энэхүү санхүүгийн шинэ системийн тусын тулд ажиллаж байгаа бус харин уг систем таны тусын тулд ажиллаж байгааг санаарай. Уг системийг баримтал, тэгвэл шанг нь удахгүй хүртэнэ.

Үргэлжлэл бий...

Дональд Трампын "ХӨГЖИЛ ДЭВШИЛД ХҮРЭХ ЭХНИЙ 90 ХОНОГ" номоос...


Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Цаазын ялыг сэргээх нь зөв үү?
  • Зөв
  • Буруу
  • Насаар нь хорих хэрэгтэй
  • Мэдэхгүй