Трамп: Өөрөө өөртөө босс бол!
2017 оны 6 сарын 12
Дональд Трампын "ХӨГЖИЛ ДЭВШИЛД ХҮРЭХ ЭХНИЙ 90 ХОНОГ" номоос...

-  IV  -
ӨӨРӨӨ ӨӨРТӨӨ БОСС БОЛ
ҮЙЛДВЭР, ХУДАЛДАА ЭРХЛЭГЧИЙН БАЯЛАГТ ХҮРЭХ ЗАМ

ҮЙЛДВЭР, ХУДАЛДАА ЭРХЛЭГЧ ШИГ СЭТГЭ
Майкл Е.Гордон, философийн ухааны дэд доктор

Үйлдвэр, худалдаа эрхлэлт бол таны амьдралдаа асар их баялагтай болж, хувийн талаар өсөх явдлыг хангагч хэрэгсэл болохыг би хувийн туршлагаасаа мэднэ. Миний арваннэгэн үйлдвэрийн зургаа нь амжилттай ажиллаж байсан, тэдгээрийн нэгийг би Британийн төрийн мэдлийн компанид худалдсан юм. Үлдсэн таван “бүтэл муутай” нь (миний үгсийн санд “балрах” гэдэг үг байдаггүй) надад орлого оруулдаггүй байсан ч намайг огт сулруулаагүй. Үнэн хэрэгтээ тэдгээр нь миний ирээдүйд амжилт олох найдварыг хэмжээлшгүй их нэмэгдүүлсэн юм, учир нь би их зүйлийг мэдэж авч, түүнийгээ хэрэглэж сурсан билээ.
   
Энэ бүлэгт бизнест амжилт олох талаар танд учирч болох аливаа төөрөгдлийг сарниулж, таны эзэмшин хөгжүүлж болох үйлдвэр, худалдаа эрхлэлтийн 11 дадал зуршлыг тайлбарлах болно.

ҮЙЛДВЭР, ХУДАЛДАА ЭРХЛЭГЧИЙН ТӨӨРӨГДӨЛ
Үйлдвэр, худалдаа эрхлэлтийн тухай ном зохиолд шинэ эхлэл бүтэлгүйтэх хувь хэмжээний тухай, үйлдвэр, худалдаа эрхлэгчдийн хүлээх ёстой асар их хохирлын тухай, баталгаат ажил алдагдах тухай, санхүүгийн эрсдэл, бүтэн хоногоор үр­гэлж­лэх хүнд хөдөлмөрийн тухай, бухимдал, урам хугаралтын тухай гэх мэт гайхал төрүүлэм дэмий юм дүүрэн байдаг. Энэ бүхний талаар би дараах хоёр үгийг хэлнэ: шал худал!    
   
Эргэн тойрноо хараад бизнест эргэлдэж буй асар их мөнгийг төсөөлөн бод. Том, бага ямар ч бизнес үйлдвэр, худал­­даа эрхлэлтээс боссон байдаг. Статистик мэдээнээс үзвэл, АНУ-д 24 сая үйлдвэрийн газар байдгаас 18 сая нь нэг эзэмшигчид харъяалагддаг байна, өөрөөр хэлбэл тэдгээрийг нэг хүн эзэмшиж, нэг хүн удирдаж байдаг ажээ. Жижиг үйлд­вэрийн олон эзэн ажлын байраа хадгалан хагас юм уу бүтэн ажил эрхлэлтийн болзолтойгоор ажилласаар л байна. АНУ-ын хүн ам тооллогын товчооны мэдээгээр зөвхөн 2003 онд гэхэд л бараг хорин таван сая америкчууд өөрийн бизнесийг эхэлжээ.
   
Миний бие үйлдвэр, худалдаа эрхлэлтийн зөрөг замд орохдоо мэдэрдгээсээ илүү их амьдралын хүчийг хэзээ ч мэдэрч байгаагүй. Өөрөө өөртөө босс байхдаа миний хийсэн мөнгөний хэмжээтэй тэнцэх тийм мөнгө надад олж өгч байсан ажил гэж байхгүй. Бухимдал, урам хугаралтыг хэлж байна уу? Би өөрийн санаачлага, үр шимээ өгөх санааг хэрэгжүүлэх хувийн эрх чөлөөгүй, корпорацийн тэнэг дүрэм журамтай эв­лэрч, өчүүхэн хэмжээний цалин авч, хэн нэг өөр хүний төлөө ажиллаж байхдаа ийм ажил хийж ч байх гэж дээ хэмээн бухимдаж, урам хугардаг байсан.
   
Хэрэв та ажил үйлсэд буурьтай хандаж, алхам алхамаар урагшилвал амжилт олох найдвар асар их байдаг нь баримт юм. Танд өөрийн чинь бодож байгаагаас бага авьяас, чадвар, тусгай мэргэжлийн мэдлэг, мөнгө болон бусад нөөц хангалттай. Та боловсруулалт, үйлдвэрлэл, баглаж боох, маркетинг, худал­даа, түгээлт, тээвэрлэлт, тооцоо зэрэг олон үүргийг гэрээ­лэн өгч болно. интернэт бараг шавхагдашгүй нөөцтэй. Та санхүүгийнхээ сул талыг хянадаг, гэхдээ эхний удаа юу ч бүтээгүй ч гэсэн дараачийн шинэ бизнес эрхлэх явдалд илүү сайн бэлтгэгдсэн байх болно.
   
Толь бичигт үйлдвэр, худалдаа эрхлэлт гэдэг үгийг өндөр санаачлага хийгээд эрсдэлд бэлэн байх явдалд үндэслэн ашиг олохын тулд бизнесийг зохион байгуулах, хөгжүүлэх, удирдахыг хэлнэ гэж тодорхойлжээ. Түүнийг би юуны өмнө бүтээлч, хувийн талаас нь авч үздэг. Үйлдвэр, худалдаа эрхлэлт нь ертөнцийг үзэх үзэл, идэвх, үйл явцыг хамаарч таныг хүслэнт баялаг тийш чиглүүлнэ.
   
Ертөнцийг үзэх үзэл. Үйлдвэр, худалдаа эрхлэгчид бол ашиг олох санаа, бололцоог ямагт хайн амьдрал дундуур туучиж явдаг хүмүүс. Тэд шинэчлэл, сайжруулалт, бас хэрэглэгчид хийгээд нийт хувь нийлүүлэгчдэд зориулсан үнэт зүйлсийг арвижуулах, бүтээх, хангахад төвлөрч байдаг. Тэд өөрсдийн олсон амжилтын төлөө урамшуулал авахыг хүсч байдаг. Хэдий чинээ их үнэт зүйлсийг тэд бүтээнэ төдий чинээ санхүүгийн их шагнал авч байдаг.
   
Идэвх. Үйлдвэр, худалдаа эрхлэгчид туйлын идэвхтэй, тиймээс ч бололцоотой зүйлийн мөрөөр ормогц тэд зорилгоо биелүүлэхэд зайлшгүй хэрэгтэй нөөцийг дайчлахын тулд уулыг эргүүлдэг. Тэд Nike гэдэг уриаг даган ердөө л ажилладаг, тэгэхдээ өөрийнхөөрөө ажилладаг.

Үйл явц. Үйлдвэр, худалдаа эрхлэлт бол эрчимтэй, тас­ралт­гүй, амьд үйл явц юм. Үйлдвэр, худалдаа эрхлэгч, үндэслэгч, хөдөлгөгчийн хувьд та үйл явцыг анх өрсч санаанаас баялаг эзэмшитлээ үргэлжлүүл. Энэ замд та нөөцөө дайчилж, багаа бүрдүүлж, стратегиэ боловсруулан төгөлдөржүүлж, бизнес-төлөвлөгөө зохион анхны шидэт түншийг олж, өсөлтийн асуудлыг шийдэж, эцсийн дүнд хувьдаа баяжих хэрэгтэй болно.
   
Өөрийн бизнесийг эхлэх нь зүйтэг нотолсон дөрвөн хөдөлбөргүй учир нотолгоо бий:

Хувийн нөөц бололцоогоо ашиглах
Би үйлдвэр, худалдаа эрхлэгч болохоосоо өмнө 10 жил инженер-химичээр ажилласан. Би нэр хүнд бүхий компанид маш сайхан ажилтай байсан хэдий ч бизнес эрхлэх гэсэн давагдашгүй хүсэлд автсан агаад энэхүү хүсэл надаас яагаад ч салаагүй юм. Нэг найзтайгаа, бас хамт ажилладаг нэг нөхөртэйгээ хамт би санаа, бололцоог хайж, онцгой сонир­холтой санагдсан нэг санааг барьж авлаа. Бид маш энгийн бизнес-төлөвлөгөө зохиогоод өдрийн цагаар албан ажлаа хийж, оройн цагаар шинэ үйлдвэрээ байгуулж эхэлсэн юм. Миний улам өнөр болж буй гэр бүл, байшингийн барьцааны мөнгө, зээл авах хязгаарлагдмал бололцоо, хөдөлгөхгүй барьж байсан үл итгэл намайг эрсдэлээс зайлсхийхэд хүргэх гээд байсан боловч би эдгээр саадаар мөрөөдлөө баллуулаагүй юм. Манай шинэ үйлдвэр жаахан ч гэсэн орлого оруулж эх­лэхээс бүр өмнө хүсэл мөрөөдөлдөө үнэнч байсан минь том шагнал хүртээсэн билээ. Би эрч хүчээр дүүрэн, өөрийн хүчинд итгэлтэй, ялагдашгүй байлаа!

Би үйлдвэр, худалдаа эрх­лэлтийн дор дурдсан хишгийг хүртсэн юм:
    • Үнэндээ хоосон юмнаас хосгүй үнэт зүйл бүтээх болол­цоо
    • Амьдралын зорилгодоо хүрэх зориг, хичээнгүй чанар
    • Би өөрөө өөртөө босс гэдгээсээ авах таашаал, хүнд хөдөлмөрийнхөө төлөө хүртэх урамшуулал
    • Би өөртөө үйлдвэр, худалдаа эрхлэлтийн авъяасыг хөгжүүллээ гэсэн бахархал.
    • Өөртөө итгэх халуун дулаан, гэгээлэг сайхан мэдрэмж, би оролдож байгаа учраас л үүнд хүрлээ гэсэн өөрийн нэр төрийн мэдрэмж
    • Өөрийн хамгийн үнэт актив болсон цаг хугацаагаа захирч байгаагаас авах таашаал
    • Миний болон миний гэр бүлийн өмнө одоохон нээгдэх гэж байгаа санхүүгийн гайхамшигтай үүд хаалгыг бясалган бодох үеийн өрнүүн сэтгэл

Та үр шимээ хүртэж, өөртөө их мөнгө үлдээнэ
Намайг үндсэн ажилдаа явж байх зуур бизнес зарим нэг ашиг оруулж, арилжаа наймаа хийж байлаа. Дараа нь эрсдэл хамгийн бага болж, нөөц бололцоо өргөнөөр нээгдэхлээр би өөрийн бизнесийг хөгжүүлэх ажилд бүрэн орохын тулд компанид хийж байсан ажлаа орхисон юм. Хувийн нөөц бололцоо үйлдвэр, худалдаа эрхлэхийн хангалттай сонирхолтой хүчин зүйл мөн боловч жинхэнэ санхүүгийн жинхэнэ шагнал дараах дөрвөн зүйлээр илэрч байдаг:
    1. Бүтээгдэхүүн, үйлчилгээгээ ашигтай худалдсанаас орж ирэх ашгийн урсгалаар
    2. Таны бизнесийн үр шим, эсвэл сонирхогч худалдан аваг­чид юм худалдсаны үр шим, эсвэл ажил хэргийг хөг­жүүлснээр цаашид олох баялгаар
    3. Ажил хэргийг хөгжүүлэхэд үзүүлэх татварын хөнгө­лөлтөөр
    4. Активын хамгаалалт, хувийн хариуцлагаар.
    Эхний хоёр зүйл илт тодорхой зүйл, харин сүүлчийн хоёрт тусгай тайлбар хэрэгтэй. Хуульч, татварын стратегийн мэргэ­жилтэн Ж.Чайлдерс эдгээр сэдвийг 18, 20 дугаар бүлэгт дэлгэрүүлж авч үзнэ.

Татварын хөнгөлөлт
Та хууль ёсоор, шинээр нээгдсэн үйлдвэрийн үйл ажил­лагаанд дараах зүйлийг оролцуулан ажил хэргийн зардалд татварын хөнгөлөлт эдэлж болно:
    • Бизнестэй холбоотой үйл ажиллагаа явуулахад зарцуулж буй хувийн болон компанийн хөрөнгөд
    • Ажил төрөл хөөцөлдөх томилолтын зардалд (маркетинг хийх, түншүүдтэй холбоо тогтоох, бүтээгдэхүүний эх үүсвэр хайх, гэрээт борлуулагчдыг бэлтгэх, худалдааны үзэсгэлэн үзэх, өрсөлдөгчдөө судлах г.м)
    • Бизнестэй шууд холбоотой зардалд
    • Эмнэлгийн үйлчилгээ, шүд эмчлүүлэхэд үзүүлэх хөнгөлөлт
    • Жилд авах, гэр бүлийн гишүүдэд мөнгө олгоход үзүүлэх хөнгөлөлт
    • Хандивын төлбөрт үзүүлэх хөнгөлөлт.
    Бүх зардлаа нарийвчлан баримтжуулж, тодорхой тэмдэг­лэл, дэвтэр хөтөл.

Актив, хувийн хариуцлагын хамгаалалт
Таны үйлдвэр, худалдаа эрхлэж байж олсон мөнгө чинь актив, хувийн хариуцлагын хамгаалалтыг танаас шаардана. Та болон танай гэр бүл сул талтай бөгөөд маш олон янзын шалтгаанаар шүүхийн нэхэмжлэлд өртөж болно. Энэ эрсдэлийг дутуу үнэлж болохгүй. Гэхдээ та компанийн зохих бүтэц, эсвэл хязгаарлагдмал хариуцлагатай нөхөрлөл зохион байгуулж, тэдгээрийг зөв удирдвал танд тусах хувийн хариуцлага багасч болно. Хуулийн хэд хэдэн хэрэгсэл энэхүү хамгаалалтыг хэрэг­жүүлж байдаг, тухайлбал: С-корпорац, S-корпорац, хяз­гаар­лагдмал хариуцлагатай нөхөрлөл, татвар төлдөггүй арилжааны бус корпораци. Энэ талаар 18, 25 дугаар бүлгээс илүү дэлгэрэнгүй уншаарай.

ҮЙЛДВЭР, ХУДАЛДАА ЭРХЛЭГЧИЙН ГОЛ ДАДАЛ ЗУРШЛУУД
Үйлдвэр, худалдаа эрхлэлт тийм их сонирхол татдаг юм бол яагаад олон хүн анхны үйлдвэрээ байгуулж зориглодоггүй вэ? Яагаад гэвэл тэд өөртөө: би үйлдвэр, худалдаа эрхлэгч гэж үү гэсэн асуулт тавьдаг юм.
   
Сүүлийн 15 жилд би бүхий л түвшинд (сургууль төгсөгчдөөс эхлээд шинжлэх ухаан доктор, удирдах ажилтан хүртэл) олон мянган оюутан сургасан, тиймээс эргэлзэгч нь зөвхөн та биш гэдгийг мэднэ. Гэхдээ энэ бол зүгээр суухад хүргэх учир өөртөө тавих асуулт биш. Үйлдвэр, худалдаа эрхлэлт нь “тийм”, эсвэл “ үгүй” гэдэг асуултад хариулагдана. “Тийм ээ, би үйлдвэр, худалдаа эрхлэгч”. “Үгүй ээ, би үйлдвэр, худалдаа эрхлэгч биш”.
   
Үйлдвэр, худалдаа эрхлэлт нь өв залгамжлагдан шилж­дэггүй. Үйлдвэр, худалдаа эрхлэлт таны хромосом, уламжлагдсан чанарт огт хамаагүй. Төрөлхийн үйлдвэр, худалдаа эрхлэгч гэж байхгүй. Үйлдвэр, худалдаа эрхлэгчид амжилт олох гэсэн хүсэл зориг, дадал зуршил, мэдлэгээрээ хэрэг явдлыг хүссэнээрээ өрнүүлдэг. Та ч гэсэн үйлдвэр, худал­даа эрхлэгчдийг амжилтад хүргэдэг дадал зуршлыг мэдэж авч, өөртөө хөгжүүлж болно. Дараах зөв асуултыг өөртөө тавь:
   
Мэдэх хэрэгтэй юмыг би яаж мэдэж авах вэ, амжилт олох найдвараа дээд зэргээр нэмэгдүүлэхийн тулд үйлдвэр, худалдаа эрхлэгчийн дадал зуршлаа хэрхэн сайжруулах вэ?
   
Амжилт ологч үйлдвэр, худалдаа эрхлэгчид хувийн дадал зуршлаа хөгжүүлж, батжуулахад суралцдаг. Надад итгээрэй. Хэрэв та үнэхээр хүсэх л юм бол үйлдвэр, худалдаа эрхлэгч болж чадна. Үйлдвэр, худалдаа эрхлэгчийн дадал зуршлын дараах жагсаалтыг “Трампын их сургууль. Үйлдвэр, худалдаа эрхлэлтийн үндэс” номноос авлаа.

    1. Тухайн нөхцөл байдлыг үнэлж дүгнэх. Ажиглах, мэдээлэл цуглуулах, ирээдүйн бизнест чинь нөлөөлж болох бололцоо, аюулыг ойлгох чадвараа сайжруул. Түүнчлэн өөрийн дадал зуршлын сайн тал, туршлага, зорилгоо харгалзан үз. Хэрэв та буруу төсөөллийг иш үндэс болгон ажлаа эхэлвэл заавал буруу хариу авах болно.
    2. Мөрөөдлөө зоригтой биелүүлэх. Та зохистой үнэлэлт дүгнэлт өгөөд одоо өөртөө хэмжигдэхүйц тодорхой зорилго тавьж болно. Зориг гарга! Тэгвэл та санаснаасаа хавьгүй их зүйл хийж чадна. Энд алт олборлоход гаргадагтай тэнцэх хэмжээний хүчин чармайлт шаардлагатай.
    3. Няцашгүй байх. Зорилгодоо хүрэх замын шат бүрийг цаг тухайд нь даван туулахад анхаарлаа төвлөрүүл. Та болон танай багийнхан энэ замд олон саад бэрхшээлтэй тулгарах болно, гэхдээ таныг зогсоох бололцоог тэр тээг саадад бүү олго. Өөрийгөө илэрхийлж, ажлаа хийж гүйцээ.
    4. Амжилтыг баримжаалан хэлэлцээг хатуу хийх. Хүмүүс­тэй тогтоосон аливаа харилцаа амжилт олохыг баримжаалсан хэлэлцээ хийх чадвараас ашиг хожмоо гаргаж чадна. Та юу хүсч байна тэр юмандаа хүрч чадахын зэрэгцээ харилцан ойлгох, харилцан ашигтай байх явдалд тулгуурласан харилцаагаа хэвээр байлгах болно. Таны баримталвал зохих суурь журмыг дор дурдлаа:
    • Харилцан ойлголцлыг хайхын өмнө сонсч, өөрөө ойлгохыг хичээ
    • Хүмүүс хийгээд үйл явцыг зааглан үз
    • Байр суурин дээрээ бус харин эрх ашиг дээр төвлөр
    • Бодитой шалгуур дээр бат зогс
    • Нийтлэг ашгийн хувилбаруудыг бодож ол
    • Амжилттай хэлэлцээ хийдэг дадал зуршил маань надад тун чухал учир би энэ сэдвээр бүхэл бүлгийг “Трампын их сур­гууль. Үйлдвэр, худалдаа эрхлэлтийн үндэс” номондоо оруулсан.
    5. Асуудлыг үр ашигтай шийдвэрлэх. Миний ажил хэргийн болон хувийн амьдралд шийдвэрлэх шаардлагатай асуудал гардаггүй өдөр ховорхон тохиолддог. Асуудлыг шийдвэрлэх гэдэг бол сургалт, практикийг дамжуулан эзэмшдэг дадал зуршил юм. Асуудлыг нягтлан таньж мэдэхээс эхэл, өөрч­лөлтүүдийг авч үз, шалтгааныг хай, шийдвэрээ тунгаан бод. Таны амжилтын хэмжээ асуудал шийдвэрлэх чадвараас чинь онцгой их хэмжээгээр шалтгаална.
    6. Зөв шийдвэр гаргах. Зөв шийдвэр гаргах чадвар нь ажил хэрэг болон хувийн амьдралд туйлын чухал. Шийдвэр гаргахад суралцаж, энэ дадал зуршлыг өөртөө хөгжүүлж бас болно. Гаргах гэж буй шийдвэрийг тодруулахаас үйл явц эхэлнэ, дараа нь зөв шийдвэр юунд хүргэх ёстойг тодорхойлно, үүний дараа байж болох өөр шийдвэрүүдийг боловсруулж, үнэлж дүгнэнэ, гарч болох үр дагаваруудыг авч үзнэ, эцэст нь ул үндэстэй сонголт хийнэ. Энэ үйл хэрэгт суралцаж, түүнийг шийдвэр гаргах чадвараа тогтмол боловсронгуй болгох, тэрчлэн асуудлыг илүү үр ашигтай шийдвэрлэхэд хэрэглэж болно. Сэтгэлийн хөөрлөөр ажиллах хэрэггүй.
    7. Уураг тархины дайралт. Уураг тархины дайралт нь бүлэг хүмүүсийн сэтгэлгээ, туршлага, дүрслэлийг дайчилж, үүний үр дүнд содон санаа төрүүлж, асуудлыг шийдвэрлэнэ. Бүлэг хүмүүсийн хамтын мэдлэг аливаа бодгалийнхаас олон дахин илүү байдаг. Уураг тархины дайралтын хүч үүнд л оршино.
    8. Нөөцийг дайчлах. Таны үйлдвэрийг хамгийн бага, бол­зош­гүй эрсдэлтэйгээр цааш, түргэн ахиулж байгаа бүх зүйл болох нөөцийг хэрхэн ашиглахыг ойлгохгүйгээр юунд ч хүрэхгүй. Нөөцийн төрөлд биеийн, санхүүгийн дэд бүтэц, хүний нөөц, мэдлэг болон таны хязгааргүй дүрслэл багтана.
    9. Харьцаа. Та нөхцөл байдлыг үнэлж дүгнэлээ, зоригтойгоор зорьж байгаа зүйлээ тогтоолоо, үйл ажиллагааныхаа чиглэлийг тодорхойллоо. Тэгээд юу болж байна? Та сонирхогч бүх талуудтай тууштай, байнгын харилцаа холбоотой байхгүй бол юу ч болохгүй. Юу хийхийг хүсч байгаа, юуг өөрсдөөс нь хүсч буйгаа нөхөддөө тодорхой танилцуул.
    10. Шийдэмгий ажиллагаа. Үйлдвэр, худалдаа эрхлэлт, сэтгэлгээ, төлөвлөлт, зохицуулалт, стратеги, урьдчилан харах явдлаар хязгаарлагддаггүй, тэр нь үйл ажиллагаа явуулахыг шаардаж байдаг юм. Зорилтоо яаж биелүүлж болохыг тодор­хойл. Түүнийг хэрэгжүүлэх талаар няцашгүй бай.
    11. Бүрэн бүтэн байх шинж чанар. Бүх юмыг өөрсдөд нь зориулж өмнөөс нь та хийх хүмүүс бий, бас өөрсдөд нь зориулж та цаг хугацаагаа зарцуулахгүй байх тийм хүмүүс ч бий. Ялгаа нь хүний зан чанар, зан төрхөд байна. Шударга, үнэнч, найдвартай, учрыг мэддэг, мэргэжсэн, боловсорсон, нягт нямбай, хэлэлцээ хийж, нөгөө этгээдээ сонсч чаддаг, хошин шог ая занг мэдэрдэг энэ бүхэн бол амжилт ологч үйлдвэр, худалдаа эрхлэгчдийн шинж чанар юм. Тэднийг дага, хэзээ ч бүү хоцор.

СААДЫГ ДАВАХУЙ
Сэтгэлийнхээ гүнд та өөрийн бизнестэй болохыг хүсч байгаа, гэвч бодитой болон зохиомол саад бэрхшээл, эрсдэл бий. Үйлдвэр, худалдаа эрхлэлт бол оролдлого, алдаанд үндэслэсэн хөдөлгөөн болохыг санаж яв, та хэдий чинээ их оролдоно төдий чинээ их юм олж мэднэ, чингэснээр сайн мэдэрч чаддаг болно.
   
Саад бэрхшээл, эрсдэлийг яах вэ? Та боломж хайж байхдаа бүтэлгүйтэж, тоглоомноос бүрмөсөн гарахгүй байхын тулд бүх эрсдэлийг хянаж сур.
  
Дараах зүйлийг туршаад үз. Чийрэгжүүлэлтийн клубт, эсвэл уулзалт, бусад ажил хэрэг болон олон нийтийн арга хэмжээн дээр амжилт ологч үйлдвэр, худалдаа эрхлэгчидтэй тааралдаад, тэднээс үйлдвэр, худалдаа эрхлэсэн түүхээсээ ярьж өгөхийг хүс. Анхны оролдлогоор амжилт олоогүй гэсэн үгийг тэдний олонхиос, ер нь хүн бүрээс та удаа дараа сонсох болно. Тэд анхныхаа боломжийг хянан үзэж, эсвэл түүнээс татгалзаж, өөр боломж судалж эхлэх зэргээр урагшлан ахисаар байдаг.
   
Томас Эдисоны амьдралын дараах сонгодог үзэгдэл энэ зүйлийг товч дүгнэж байна:
   
Бүх цаг үеийн аугаа зохион бүтээгч Томас Эдисон цахилгаан чийдэнгийн утас бодож олохыг оролдож байжээ. Т.Эдисон болон түүний багийнхан бололцоотой бүх нөхцөлд маш олон янзын материал туршин 8000 туршилт хийжээ. Түүний нэг танил нь “Ноён Эдисон, 8000 удаагийн бүтэлгүйтлийн дараа яаж үргэлжлүүлж чадаж байна аа? Та гунигт автаж, урам хугарахааргүй байж яаж чадав аа?” гэж асуухад Эдисон “Би нэг ч удаа бүтэлгүйтээгүй. Би оролдлого бүрийн дараа мэдлэгтэй болсон, туршилт бүр миний өмнө болзошгүй улам олон зам нээж өгсөн, эцсийн эцэст миний бүх юм бүтнэ” гэж хүйтнээр хариулсан юм гэнэлээ. Гэрлээ асаацгаая!
   
Ямар ямар саад бэрхшээл таныг саатуулж байна вэ? Үйлдвэр, худалдаа эрхлэхэд танд саад учруулах бололцоог тэдгээрт олгож байхын саад бэрхшээлийг үйл ажиллагаа явуулахыг уриалсан уриалга гэж бод. Жишээлэхэд дараах хүчин зүйлийг авч үз:
    1. Санхүүгийн нөөц хүрэлцээгүй байх. Би юу хийх хэрэг­­тэй вэ гэж өөрөө өөрөөсөө асуун энэ саадыг нэн даруй сулруул. Гарааны хөрөнгийг хаанаас хайх вэ? Мөнгөгүйгээс болж зогсч, хязгаарлагдахгүйн тулд цаашдын алхамыг яаж хийх вэ? Санхүүгийн хязгаарлагдмал нөөцтэйгээр урагшлан ахихын тулд юу хийх хэрэгтэй вэ? Үйлдвэрээ ажиллуулж, өргөжүүлэхийн тулд танд хэдий хэмжээний мөнгө шаардагдах вэ? Найз нөхөд, зөвлөхүүдийнхээ хамт уураг тархины дайралт хийх онцсайн бололцоог энэхүү үйлдвэр олгоно.
    2. Санхүүгийн алдагдалд орох магадлал. Эдисоны “орол­­дож тоглох тоглоомыг” санаж яв. Та өөрөө боломж гэж үнэхээр үзэж байгаа юмандаа аятайхнаар хөрөнгө оруул. Хэрэв таны үйлдвэр ажиллуулах чинь бүтээгүй бол дараачийн удаа өмнөх шигээ оролдоход, та илүү ухаажсан байх бөгөөд амжилт олох найдлага их байх болно. Бодит бололцоог барьж авлаа гэдэгт итгэтлээ бүх хөрөнгөө бүү оруул. Үнэн хэрэг дээрээ ямар хэмжээний санхүүгийн алдагдал таны санааг зовоож байна вэ? Хэдийд таны бизнес бүтэлгүй болж болох вэ, хамгийн муугаар бодоход та нийтдээ хэдий хэмжээний мөнгөний алдагдалд орж болохоор байна вэ? Энэ бол хөнөөлд хүргэх хэмжээний мөнгө үү, эсвэл бүхий л амьдралынхаа найдварыг ашиглахын төлөө таны алдахад бэлэн байгаа хэмжээний мөнгө үү?
   
Үүний товч хариулт ийм байна. Гэр бүлийнхээ юм уу хувийнхаа амьдралыг гаргуунд нь бүү хая. Хэрэв бид газар сайгүй явагч шинэ машин авах тухай (35000 доллар), гэр бүлээ­рээ амрах тухай (15000 доллар), өдөртөө хоёр аяга кофе уух тухай (жилдээ 1750 доллар), янжуур тамхины тухай (жилдээ 1500 доллар) ярьж байгаа бол эдгээр зүйлд ямагт мөнгө олдоно. Шинэ үйлдвэр байгуулахад хэрэгтэй мөнгө олохын тулд дараах зүйлийг хий:
    • Зардлаа багасгахыг бод. Нарийн бол
    • Сул нөөц, тоног төхөөрөмж, хүмүүсийг дайчил
    • Бизнесээ оройн цагаар, амралтын өдрүүдэд өрнүүл
    • Зөв замд байна гэдэгтээ итгэх хүртэл үйлдвэрээ ажил­луулах, хөгжүүлэх зардалд хамгийн багыг зарцуул
    • Нэг юм уу түүнээс олон түнштэй бол
    • Уураг тархины хамтын дайралт хий

    3. Орлого алдах, ажлын орчинг алдах зэрэг ажил төрлийн эрсдэл. Үүнийг давахад амархан. Хэрэв та орлого оруулагч өөрийн гэсэн хэвлэлийн машинтай болж чадвал өөрийнхөө хэмжүүрээр, өөртөө төсөөлөгдөх хамгийн гайхалтай амжилтад хүрч болно. Та бас хамтран зүтгэгчдийн нийгэмлэгийг сонгож аваарай. Миний хоёр дахь үйлдвэрийн тухайд бол, би олон улсын маркетинг эрхлэхийг хүссэн бөгөөд одоо хүртэл ерөнхий захирлын хувиар компаниа удирдаж байна. Намайг эзгүй хойгуур, надгүйгээр ажиллаж чадах зохион байгуулалтын хүчир­хэг дэд бүтэц байгуулах зайлшгүй шаардлагатай байлаа. Би өөр юу хүсэх байв? Дэлхий дахинаар аялж, олон улсын худалдааны үзэсгэлэн зохион байгуулж, дэлхийн өнцөг булан бүрт байгаа гэрээт борлуулагчид, түншүүдтэй уулзахыг уу? Хэрэв би өөрөө өөртөө босс байгаагүйсэн бол хэзээ нэгэн цагт ийм сайхан ажилтай болох байсан нь юу л бол. Гэхдээ надад бодит бололцоо нээгдлээ, миний нөөц бэлэн байна, бэлэн мөнгө ч байна гэдэгтээ итгээгүй цагт үндсэн ажлаа бүү орхиорой!
    4. Өөртөө хангалттай итгэхгүй байх. Амжилт олохын хэрээр өөртөө итгэлтэй болдог, тиймээс амжилт өөд тэмүүл. Хэрэв та оролдоод үзэх тоглоомд оролцохгүй бол өөрийгөө хангалтгүй хүндэтгэж байгаагаа мэдрэн амьдралыг туулах болно. Таны эхний хэд хэдэн оролдлого амжилтгүй болсон ч шинээр олж авсан мэдлэгийн үр дүнд өөрийгөө улам сайн мэдэрдэг болно. Бүү уруу царайл, Томас Эдисон шиг цааш үргэлжлүүлэн оролд. Хэрэв та Эдисон шиг ажиллавал амжилт олно. Ердөө бодлоготой ажиллаж, мөнгөн урсгалдаа хяналт тавьж бай.
    5. Гэр бүлд учрах дарамт. Үйлдвэр, худалдаа эрхлэх гэсэн эрмэлзэл хийгээд гэр бүлдээ их ойр дотно байдаг чанарынхаа хоорондын тэнцвэрийг олох нь надад үнэхээр маш чухал байлаа. Намайг анхны үйлдвэрээ байгуулж эхэлж байхад миний хүүхдүүд маш жаахан байсан. Тэр үед эцэг минь нас барьж, манай гэр бүлд сэтгэл санааны дэмжлэг хэрэгтэй байлаа. Бололцоотой бүх зүйл дээр би гэр бүлээ өөрийн үйл ажиллагаанд татан оролцуулахыг чармайж, гэр бүлийнхээ цагийг хамтдаа болон тус тусдаа бүтээлчээр өнгөрүүлэх арга замыг хайдаг байв. Ойлгож, тус хүргэж байх явдал тэнцвэр олоход тусладаг юм билээ.
    6. Эрүүл мэндийн байдал, бухимдал, орой болтол ажиллах явдал. Бүр тамирдаж гүйцлээ гэдгээ мэдэрмэгц амарч тайвшир. Үүнд ч гэсэн тэнцвэрийг ол! Дасгал хийж, эрүүл хүнс хэрэглэж, гэр бүл, найз нөхдийн хамт амарч, олон нийтийн ажил, бясалгал хийн, дуу дуулж, тоглож, хөгжим сонсч, инээж, бүжиглэж, кино үзэж, ном унш, гэхдээ үйлдвэр, худалдаа эрхлэхээр зорьсон сэтгэлээ бүү орхи.
    7. Том бололцоо олдохгүй байх. Бололцоо бол үйлдвэр, худалдаа эрхлэлтийн гол сэдэв. Та санаа хайж, бүтэлгүй санааг сарниулж, хожоотой далд бололцоог тодорхойл. Дараачийн бүлэгт бид энэ тухай илүү дэлгэрэнгүй ярилцах болно.
    8. Эрсдэлийг тэсвэрлэх чадвар сул байх. Ямар тодорхой эрсдэлүүд тэсэшгүй вэ гэж өөрөөсөө асуу. Тэдгээрийг жижгэвтэр хэсэгт хувааж, тодорхой дүр зургийг гаргаж ав. Та үйлдвэр, худалдаа эрхлэх мөрөөдлөө биелүүлэхийн тулд эрсдэлд орох хэрэгтэй байдаг, гэтэл та тэдгээр эрсдэлийг давах чадваргүй байжээ. Эрсдэлийг тэсвэрлэх чадвараа авч үзэх хэд хэдэн арга байдаг. Жишээлбэл, Гордоны “5000-аас 1” гэдэг журам байна. Би бол аялж, дэлхийн гайхамшгуудыг судлах донтой хүн л дээ, тиймээс олон жилийн өмнө өөрөө өөрөөсөө: “Нисэх онгоцоор зорчиход учрах эрсдэлийг тэсвэрлэх миний чадвар ямар байна вэ? Сая онгоцны нэг нь унавал яах вэ? 100 мянгаас нэг нь унавал яах вэ? Мянгаас нэг нь бол?, Зуугаас нэг нь бол яах вэ?” гэж асуусан юм. Ухаангүй айж амьдран, эрсдэлийн тэсвэрлэх чадвар тэгтэй тэнцэж байвал, аялах донгоо дарахад саад болох учраас нисэх онгоцоор аялахад надад тохиолдож болох эрсдэл барагцаалбал таван мянгад нэг юм байна гэж дүгнэсэн. Аялж чадахгүй бол ямар гээч амьдрал байх вэ? Миний хувьд утгагүй амьдрал болно. “Үйлдвэр, худалдаа эрхлэлтийн ажилдаа урамшуулал авахаар амжилт олохын тулд би ямар эрсдэлтэй тулгарахад бэлэн байна вэ? гэж өөрөөсөө асуу.
    9. Инерц. Энэ явдал хүн бүрт тохиолдоно. Нөхөдтэйгээ хамт бодож тунгаа. Миний инерцийн мөн чанарыг тодорхой­лоход туслаач гэж тэднээс хүс. Миний хувьд гэвэл би мухардмал байдалд орохдоо маш их гуниглаж, заавал ямар нэг юм хийх болдог. Ямар нэг юм хий гэж танд зөвлөх байна. Бага зэрэг ашигтай аливаа чиглэлээр маш аядуу нэг алхам хий. Үйл ажиллагаа таныг мухардлаас гаргана.
    10. Үйлдвэр, худалдаа эрхлэгчид хэрэгтэй юм надад байгаа гэж би хараахан бодоогүй байна. Худлаа!!! Үйлдвэр, худалдаа эрхлэгчийн 11 гол дадал зуршлыг эзэмшиж, хөгжүүлэх чадавхи бид бүхэнд бий гэдгийг түрүүнд дурдсан билээ. Та арга хэрэгслээ баяжуулахын хэрээр оролдоод үзэх тоглоом тоглох итгэл олж авах болно. Наад зах нь хувийнхаа амьдралд илүү хүчтэй хяналт тавьдаг болж, эцсийн дүнд үйлдвэр, худалдаа эрхлэх эрмэлзэл таныг эзэмдэж, шинэ бизнес эхлэхэд хүргэж мэднэ.

Энэ бүлэгт та үйлдвэр, худалдаа эрхлэх мөрөөдлөө хэрхэн биелүүлэх тухай өгүүллээ. Их зоригтой, хязгааргүй хүсэл тэмүүлэлтэй, туйлын хэрсүү, нэн шаргуу байх тухай яриа өрнөв. Эцэст нь би зохиолч, яруу найрагч И.В фон Гетегийн хэлсэн үгнээс иш татъя:

Хэрэв хүн зориглохгүй бол эргэлзэж, ухарч байдаг, хүч чармайлт нь байнга үр дүнгүй болдог... Та юу хийх гэж байлаа ч, эсвэл юу мөрөөдөж байсан ч ялгаагүй зоригло. Эр зоригтой бол суу билэгтэй адилхан. Түүнд хүч, ид шид оршино. Урагшаа!

Үргэлжлэл бий...

Дональд Трампын "ХӨГЖИЛ ДЭВШИЛД ХҮРЭХ ЭХНИЙ 90 ХОНОГ" номоос...
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Гарцгүй газраар зам гарвал 20 мянгаар торгохыг та дэмжиж байна уу?
  • Дэмжиж байна
  • Дэмжихгүй