Д.Трамп: Айдастайгаа хийх тэмцэл
2017 оны 6 сарын 19
Дональд Трампын "Ялагч шиг сэтгэ" номоос...

Дэлхий дээр айдас шиг хөнөөлт зүйл байхгүй.

                                                         Ральф Уолдо Эмерсон
                          
Зөв тавьсан асуулт бол асуудлыг шийдвэрлэхийн тэн хагас нь мөн.
                                                                                                           Карл Юнг

Саяхан нэг сурвалжлагч надаас “Та юунаас илүү их айдаг вэ?” гэж асуусан юм. “Ямар ч айдас надад байхгүй” гэж би хариулсан. Тэр хүн гайхаж байна билээ. Би үүнийг “Хэрэв айдас мэтийн ямар нэгэн мэдрэмжийг тодорхойлох юм бол хэдийгээр заримдаа сэтгэл түгших явдал байдаг ч гарцаагүй айдаг болох юм байна” гэж хардаг болсон. Жишээ нь, Нью-Йорк хот алан хядах ажиллагаа болсноор аймшигт айдаст автсаныг би бусад бүх хүний нэгэн адил сайн мэднэ. Энэ тухай бодол бүх хүнд түгшүүр төрүүлдэг. Яагаад гэвэл хүн бүр аллагад өртөж болохсон билээ. Иймэрхүү явдал үе үе манай гаригийн хаа нэгтээ гардаг учраас олон хүний сэтгэл түгшдэг юм. Энэ бодол санаанд гүнзгий айдас болж хувирах боломж олговол алан хядах ажиллагаа ялах болно.

Энэ бүхэн бизнест ч хамаарагдана. Та өөрийн гэсэн ажил хэргийг эхлүүлэхээс айдаг уу? Энэ асуултыг өөр байдлаар тавья. Өөрийн гэсэн бизнесийг эхлүүлэх хэрэгтэй болжээ гэсэн бодол танд төрөхөд та сэтгэл түгшдэг үү? Ямар учраас? Чухам юу таны сэтгэлийг түгшээж байна вэ? Сэтгэлийн хөдлөлөө жолоодох нь айдастай харьцуулахад хамаагүй хялбар байдаг. Айдас нь бүтээлчээр сэтгэхэд садаа болдог саад тотгор мөн. Харин бодит хандлага саад тотгорыг даван туулахад тусалдаг, бүтээлч эхлэлд ногоон гэрэл тавьдаг юм.

Айдсын эсрэг хэрэглүүр бол маш энгийн. Ердөө л асуудлыг шийдэх арга олох хэрэгтэй. Та хөрөнгө оруулалт хийх, эд хөрөнгийн татварыг багасгах буюу өөрийн гэсэн бизнес эхлүүлэх, магадгүй энэ бүхнийг нэгэн зэрэг амжуулах гээд ямар ч ажил эрхэлж байсан аливаа зорилтыг тус тусад нь авч үзэх болно. Ингэхдээ л ердийн маягаар ажиллах хэрэгтэй. Дээр дурдсан үйл явц ухаан сорьсон бодлоготой төстэй бөгөөд тэнд байгаа хэсэг тус бүрийг зохих байранд нь тавьж, бүхэл бүтэн зураг гаргаж ирэхийг эрмэлзэх хэрэгтэй.

Жишээ нь, би Trump Tower барилгыг барьж эхлэхэд жинхэнэ ёсоор хэрэгжүүлэхийг хүссэн хэд хэдэн санаа надад байв. Надад Breccia Perniche гэдэг онцгой сортын маш үнэтэй, үзэсгэлэнтэй гоё, бас маш ховор тийм гантиг чулуу хэрэгтэй байсан боловч нэг янзын биш, цагаан толботой, бас судалтай чулуу үзүүлдэг юм байна. Тэр гантиг миний сэтгэлд нийцсэнгүй. Тийм болохоор би өөрөө чулуу олборлох газар руу /карьер/ очиж, хамгийн шилдэг гантиг хавтангуудыг сонгож авсан юм. Ийнхүү идэвхитэй үйлдэл хийсний дүнд сэтгэл түгших эх үүсвэр маань асуудлыг шийдвэрлэсэн алхам болж хувирдаг юм байна. Энэ бүхний дүнд би чухамдаа хүссэн тэр л гантиг хавтангуудаа авсан билээ. Хэрэв би өрөөндөө гантигны чанарын тухайд сэтгэл түгшээд л сууж байсан бол юунд ч хүрэхгүй байсан биз ээ. Би гантиг чулууг өөрөө сонгож авах гэж шийдсэнээрээ ухаан сорьсон бодлогын /тааврын/ бүрэлдэхүүн хэсгүүдийг зохих байранд нь тавьж, гайхалтай үр дүнд хүрсэн юм.

Та өөрийн гэсэн ажил эрхлэхдээ олон зүйлийг бие дааж хийх ёстой болно. Ингэхгүйгээр юу ч бүтэхгүй. Бизнесийг удирдана гэдэг нь тушаал заавар тараах, түүнчлэн таны өмнөөс бодож сэтгэн, ажил төрөл эрхлэх хүн ажилд авах төдийхнөөр хязгаарлагдахгүй. Ажлын ийм арга барил байдаг л даа. Гэхдээ л сандлаасаа босч, аливаа ажлыг өөрөө гүйцэтгэхэд ямагт бэлэн байх хэрэгтэй. Энэ үзэл санаа танд тааламжтай бус санагдвал та үйлдвэрлэл, худалдаа эрхлэхийн хэрэггүй. Хариуцлагын тухай санаа бодол таны хувьд зүй ёсных бол, та нарийн түвэгтэй зорилтуудыг шийдвэрлэх хүсэлтэй байгаа бол өөрийн тань санаачлага хамгийн сайн сонголт байх болно.

Айдас гэдэг нь хэтрүүлгийн чанартай байдаг. Үүнээс болоод аливаа асуудал бодит байдлаасаа илүү өргөн цар хүрээтэй юм шиг санагддаг ажээ. Хуучны зүйр үгэнд “Айдсын нүд том” гэдэг ч үнэн юм. Итгэл үнэмшил л айдсыг сөрөн зогсох чадвартай. Энэ нь өөртөө итгэж, өөрийгөө ялагч гэж үзэхийн нэг гол шалтгаан мөн. Та замд тохиолдох аливаа саад тотгор, элдэв асуудал, муу санаатнуудыг аргалан зохицуулах чадвартайгаа мэдэж байх ёстой.

1990-ээд оны эхээр би асар их өрөнд орж, тэр үед гудамж талбайн булан тохой бүрт л намайг төгсгөл болсон, тооцооноос хасагдсан хэмээн хашгиралдаж байсан юм. Хэвлэлийнхэн миний өр ширтэй холбогдсон тоо баримтыг хараад үүнээс өөрөөр яаж ч дуугарах байсан билээ. Гэвч би хэзээ ч өөрийгөө устгагдсанд тооцоогүй. Бий болсон түвэгтэй нөхцөл байдлыг шийдвэрээ хүлээж буй асуудал хэмээн үзэж, энэ л байр сууринаас үйл ажиллагаа явуулж эхэлсэн билээ. Энэ бол зүгээр л шийдчих амархан зүйл гэх юм уу хүмүүс худал ярьж байсан гэж би хэлэхгүй. Үнэхээр ноцтой асуудал байсан боловч би айдаст бууж өгөөгүй, бүгд л намайг дууслаа хэмээн лүндэн буулгаж байсанд ч итгээгүй. Би өмнөхөөсөө илүү амжилттай болж, миний бизнес асуудлыг шийдвэрлэх үйл явц мөн гэдэгт итгэл төгс байлаа. Та үүнд суралцаж, түүнд зөв байр сууринаас хандаж чадвал амжилтад хүрэх замд давуу байдал олж авч чадна.

Амьдралынхаа өчүүхэн хэсэгт ч айдас хэмээгч зүйл сууж бэхжих боломжийг бүү олго. Ингэж чадахгүй бол ялагдал хүлээнэ гэсэн үг юм. Бас айна гэдэг нь угаасаа л тааламжтай зүйл биш ээ. Айдсыг аливаа асуудлыг шийдвэрлэх бэлэн байдал, өөртөө итгэх итгэл, шаргуу хөдөлмөрөөр солигтүн. Энэхүү томьёо таны төлөө үйлчлэг. Тэр цагт та айдсын бус, хүчний байр сууринаас ажиллах болно. Энэ бол ялалтад хүрэх зам мөн билээ.

ТӨСӨӨЛӨЛ БОЛ САНХҮҮГИЙН АВХААЛЖТАЙ БАЙДАЛД ХҮРГЭХ ТҮЛХҮҮР

Нөхцөл байдлыг төсөөлж харах чадвартай хүмүүс аливаа зүйлийн мөн чанарт нэвтрэн орж чадна. Тэд харж тогтоосон дүр төрхийг үнэлж үздэг байна.
    Роберт Кийосаки
Дэлхийн бараг хамгийн шилдэг сургууль болох Уортоны бизнесийн сургуулийг төгсөх завшаан надад олдсон билээ. Манай багш нар бизнест хамаатай бүх зүйлд биднийг сургах гэж маш их чармайлт гаргасан юм. Аливаа мэдээлэлтэй байх явдал тэр болгон амжилтын баталгаа болж чадахгүй нь мэдээжийн хэрэг боловч тэрхүү амжилтад бид онцсайн бэлтгэгдсэн юм билээ.

Надад бол аз таарсан. Тийм учраас би зарим нэг зүйлийг надаас арай бага азтай байсан хүмүүст тайлбарлаж өгөхийг хүссэн юм. Санхүү, бизнес гэдэг нь өргөн хүрээтэй байгууллагуудыг хамарсан нарийн түвэгтэй бүтэц мөн билээ. Өөрөөр хэлбэл, янз бүрийн хүрээнд ашиглаж болох нэг арга юм уу даа. Би барилга барьж байхдаа санхүүгийн ажил хэргийн янз бүрийн талууд нэг том бүдүүвч дотор л өөр өөрийн байр суурийг эзэлдгийг ойлгосон билээ. Би улам ихийг мэдэх болсны хэрээр эдгээр бүдүүвч улам их цар хүрээтэй болж байна. Би өнгөрснөө эргэж харахдаа тэр үед л дэлхийн хэмжээнд сэтгэж байснаа ойлгож байна.

Энэ үгс дэндүү гэнэхэн сонсогдож болох авч би харж төсөөлөхүйн хүчинд хатуу итгэдэг бөгөөд энэхүү төсөөлөл надад үнэхээр тус болсон юм. Танд юу туслахыг би батлан хэлж чадахгүй ч харж төсөөлөхүй үр нөлөөтэйд нэг бус удаа итгэсэн билээ. Магадгүй, Жоан Мирогийн бүтээсэн уран зураг, ямар нэгэн таталбар зураг буюу уран баримал таны сэтгэлд нийцэж болох юм. Хүмүүсийг амжилтад хүрэх замд урам зориг оруулсан дүрүүдийн тухай би олон сонирхолтой түүх сонссон. Гэсэн ч талх, давсны дүрслэл бүхий гэрэл зураг миний танилыг зоригжуулсан /тэрээр их амжилтад хүрсэн/ юм гэнэ лээ. Та ч өөртөө ямар нэгэн ийм урамшуулал олж авахыг оролдоод үзэгтүн.

Санхүүгийн чиглэлийн зарим хичээл уйтгартай мэт санагдаж болох ч заавал ч үгүй анхаарал тавин судлах хэрэгтэй. Би дээр дурдсан хичээлүүдэд анхаарал тавьдаг байсан болохоор, судалсан хичээлүүдээ ямар нэгэн төсөлд тэр дор нь хэрэглэсэн болохоор тэр хичээлүүд миний хувьд илүү их сонирхолтой болсон билээ. Би бизнесийн сургуульд суралцахын зэрэгцээ ажил хийж байсан нь төгсч гараад жинхэнэ ажил хэргээ эхлүүлэхэд надад ихээхэн цаг хугацаа хэмнэх боломж олгосон гэж би боддог.

Өнөөдрийн өндөрлөгөөс харахад чухамхүү энэ хандлага онцсайн боловсролоос ч илүү миний үйл ажиллагааны амжилтад тус дөхөм болсон гэж би боддог. Янз бүрийн асуудал гарч ирж байсан ч би аль болох түргэн ажилдаа орохыг эрмэлзсэн бөгөөд бүх зүйл ямар нэгэн хэмжээгээр өөр өөрийнхөө байрыг эзэлсэн гэж хэлж болно. Аливаа ажилд урьдаас бэлтгэх  нэг арга гэвэл энэ байна.

Уран зөгнөлийн авьяастай хүн олон боловч энэ нь хүн бүрт ашиг тусаа өгөөгүй. Яагаад гэвэл тэд үйл ажиллагаа явуулах төлөвлөгөөг төсөөлөлдөө эргэлдүүлэх чадваргүй байжээ. Харин би ингэж чадна. Танд суурь мэдлэг бий гэдэгт итгээд өөрийнхөө төсөөлөлд хөгжигтүн. Төсөөллийн хүч болон нүдэнд харагдах дүр төрх гайхмаар үр дүнд хүргэдэг билээ.

БИЗНЕСТ АМЖИЛТ ОЛНО ГЭДЭГ НЬ БАЙГАЛИАС ЗАЯАСАН ХИШИГ МӨН ҮҮ?
Өдгөө буй газарт хүрэхийн тулд урьд өмнө таны байсан газраас л явж эхлэх хэрэгтэй байжээ.
Роберт Луис Стивенсон
Намайг бизнес эрхлэхийн төлөө төрсөн хүн гэж олон хүн үздэг юм билээ. Зарим талаараа тэдний зөв байж болох ч үйлдвэрлэл, худалдаа эрхлэгч байх чадвар нь олон жилийн шаргуу хөдөлмөрийн дүнд хуримтлуулсан дадал зуршил мөн. Спорт, хөгжмийн нэгэн адил бизнест ч анхааралтай байж, дасгал сургуулилтыг эрчимтэй хийх хэрэгтэй. Би Уортоны бизнесийн сургуульд суралцах шийдвэр гаргахаасаа өмнө Өмнөд Калифорнийн Их сургуульд суралцах тухай бодож, кино үйлдвэрлэлийг судлах бодолтой байсан билээ. Ингээд эхний сургуулийг сонгох шийдвэр гаргаж, маш буурьтай бөгөөд зорилготой оюутан болсон юм.

Миний өнөөдрийн үйл ажиллагаанд бардам зангийн илрэлүүд байдаг бөгөөд энэ нь бүх зүйл амархан, албадлагын шинжгүй байх ёстой гэсэн утгыг агуулдаг. Тиймээс би бизнесийг урлагтай зүйрлэж ярих дуртай. “Мөнгө хийнэ гэдэг бол урлаг, ажиллана гэдэг нь урлаг, харин амжилттай бизнес эрхэлнэ гэдэг нь давхар урлаг мөн” гэж Энди Уорхолын хэлсэн үг надад ямагт тааламжтай санагддаг. Би түүнтэй санал нэг байна.

2007 оны нэгдүгээр сард Холливудын Яруу алдрын гудамжинд надад шагнал олгосон нь Уортоны сургууль төгсч, үл хөдлөх хөрөнгийн зах зээлд хүч үзэж яваа хүний хувьд нэлээд гэнэтийн үйл явдал болсон юм. Надад зугаа цэнгээний салбарт ажиллах төрөлхийн авьяас бий юу? Байж болохыг үгүйсгэхгүй ч би энэ талаар нэлээд буурьтай дадлага, сургалтад явсан. Шоу бизнес яаж ажилладгийг би мэднэ. Гэвч би цаашид улам ихээр суралцана. Оюутан байхдаа би хүч бололцооноосоо ямагт илүү ихийг хийдэг байсан бөгөөд багш нарын зүгээс бидэнд тавьдаг шаардлагаас илүү их даалгаврыг санаачлагаараа биелүүлдэг байсан. Ямар ажил эрхэлж байгаагаас үл хамааран амжилт бүтээл ихтэй маш олон хүн мөн л дээрхийн адил ажилладгийг би анзаарсан юм.

Уинстон Черчилль гарамгай илтгэгч байлаа. Их Британийн Ерөнхий сайд байсан энэ хүн энэхүү илтгэх чадвараа хөгжүүлэхийн тулд их цаг зав гаргаж байсныг номноос уншиж мэдэхээсээ өмнө би түүнийг байгалиас заяасан илтгэгчийн авьяастай төржээ гэж боддог байсан юм. Мэдээж хэрэг, энэ хүн гайхамшигтай авьяас чадвартай ч байнга хөдөлмөрлөж байжээ. Чиглэсэн зорилготой, шаргуу хөдөлмөрийн дүнд л тэр хүний авьяас чадвар хөгжжээ. Моцарт бүр бага наснаасаа хөгжим тоглож эхэлсэн, түүнийг суут хүн болно гэдэгт хэн ч эргэлзэж байгаагүй боловч байгалиас түүнд заяасан авьяас чадварыг бага багаар хөгжүүлсэн билээ.

Байгалиас надад заяасан бизнес эрхлэгчийн авьяас чадвар нь миний олон жижиг сажиг зүйлийг орхилгүйгээр нийтлэг дүр зургийг харж чаддагт оршдог байж болох юм. Би хэд хэдэн асуудлыг нэгэн зэрэг анхаарлынхаа төвд байлгаж, тэдгээрийг логик төгсгөлд амжилттай хүргэх үйл явцыг хянаж чадна. Энэхүү дадал зуршил туршлагын дүнд бий болдог. Гэхдээ би сургуульд байхдаа ч аль болох олон асуудлыг анхааралдаа авах оролдлогыг ямагт ухамсартайгаар хийдэг байв.

Мэргэн ухаантай бөгөөд алсын хараатай олон хүн гайхалтай сайн бизнес эрхлэгчид байдаг. Жишээ нь, Билл Гейтс, Марк Бернетт нарыг нэрлэж болно. Ингэхлээр авьяас гэж чухам юу вэ? Эрхэлж буй ажилдаа тодорхой оргилд хүрсэн хүмүүс, эсвэл спортод гялалзсан амжилт гаргасан Тайгер Вудс болон Роже Федерер нарыг бид суут хүмүүс гэж боддог. Гэвч энэ хүмүүсийг нарийн судлаад үзвэл тэдний амжилт гайхалтай сайн бэлтгэл сургуулилтын үр дүн мөн ажээ. Авьяас гэдэг нь өөрийн ажлыг амжилттай хийж гүйцэтгэх чадвар мөн гэж би боддог. Олон хүн тэнгэрээс заяагдсан ажлаа олж хийж чадахгүй явж байгаад түүнийгээ олмогцоо амжилтад хүрдэг ажээ. Шаргуу хөдөлмөр, оюун ухаан зарсан хөдөлмөр хоёр мөр зэрэгцэн явах ёстой.

Би өөрийнхөө туршлагаас дүгнэлт хийгээд удамших ёс болон хүрээлэн буй орчин хэмээх хоёр хүчин зүйлийг ихээхэн ач холбогдолтой гэж үздэг. Миний эцэг үүний нэг тод жишээ юм. Тэрбээр барилга болон үл хөдлөх хөрөнгийн бизнес эрхэлсэн бөгөөд тэр хэрхэн амжилтад хүрсэнийг нь би нүдээрээ харсан билээ. Энэ зам ямар амар хялбар бөгөөд сонирхолтойгийн тухайд надад ямар ч төсөөлөл байхгүй байв. Би өөрийнхөө гоо зүйн шаардлагын эрхээр энэхүү замыг илүү сонирхолтой болгосон юм. Эцгийн минь ачаар надад бүр хүүхэд ахуй цагтаа тийм илэрхий туршлага олж авах аз таарсан гэж би үздэг. Энэ нь надад үлэмж давуу байдал олгосон гэж би боддог. Тиймээс ч өөрийгөө “амжилттай үр хөврөл”-ийн клубын гишүүн гэж үздэгээ байнга ярьдаг юм.

Гэхдээ энэхүү гишүүнчлэл намайг төрөлхийн авьяас чадвараар шагнасан уу? Үгүй гэж бодож байна. Энэ нь надад тодорхой хэмжээний давуу байдал олгосон бөгөөд би түүнийг байнга хөгжүүлсний дүнд авьяас чадвар болгож хувиргасан юм. Иймэрхүү арга барилтай байж болох ч сонирхол буюу авьяас чадваргүй бол тэрхүү арга барилыг өөртөө ашигтайгаар эргүүлж чадахгүй. Миний ах үл хөдлөх хөрөнгө сонирхдоггүй учир өөр ажил эрхлэхээр шийдсэн юм. Миний нэг найз гэр бүлийнхээ уламжлалыг л бодож Уолл-Стрийтэд ажилласан боловч ажил нь огт бүтэмжтэй болоогүй. Бүх өв түүнд шилжиж ирсэн хэдий ч найз маань ийм үйл ажиллагаанд заяагдсан хүн биш байжээ. Энэ ажлаа орхиж, өөр үйл хэрэгт бие сэтгэлээ зориулахаар шийдсэн тэр цагт л найз маань амжилт гаргаж эхэлсэн билээ.

Би гольфын талбай байгуулах ажил эрхэлж байхдаа их зүйлд суралцсан. Энэ наадгай миний санаанд маш ихээр нийцэж, би гольфын талбайг жинхэнэ тоглогч шиг л мэддэг болсон ч ийм талбай байгуулна гэдэг нь огт өөр түүх билээ. Би ажлаа эхлэхийн өмнө дэлхийн зонхилох мэргэжилтнүүдтэй зөвлөлдсөн. Миний байгуулсан гольфын талбайнууд байгалийн үзэсгэлэнт газруудад байрлалтайн хувьд олон тооны шагналууд авдаг байсан боловч энэ нь барилгачны авьяас гэдэгтэй огт хамаагүй зүйл билээ. Энэ тоглоомд /спорт/ дур санирхолтой байсан, хүний гараар бүтэж болох гольфын хамгийн гоёмсог талбай байгуулах хүсэл эрмэлзэл л надад гол нөлөө үзүүлсэн юм.

Тархины солбилцсон дасгал сургуулилтад зориулсан судалгаа гэж байдаг. Тухайлбал, энэ судалгаанд өөр хүрээнд болж буй үйл ажиллагааны үр дүнг боловсронгуй болгохын тулд нэгэнт хуримтлуулсан дадал зуршлыг ашиглаж болох тухай тэрхүү судалгааны дүнгийн баримт бичигт дурджээ. Хүмүүст “Гольф тоглож бай” гэж миний байнга зөвлөдгийн нэг шалтгаан энэ бөгөөд гольф бол оюун ухаан ихээр шаардах тоглоом, хэд хэдэн түвшинд нөлөөлдөг билээ. Гольф тоглож байх үед миний толгойд нэг бус гайхалтай санаа, асуудлыг шийдэх нэг биш арга орж ирж байсан болохоор энэ онолд нэн даруй гарын үсэг зурахад би бэлэн байна. Үнэхээр энэ онол амьдралд хэрэгждэг. Танд зураг зурах юм уу төгөлдөр хуур тоглох сайхан санагдаж болно. Аливаа ажил, хобби буюу таны шууд үйл ажиллагаанд холбоотой биш сонирхол зэрэг нь амьдралын ажил хэрэгч талд юугаар ч орлохын аргагүй нэмэлт зүйл байх болно.

Энэ бүхнээс гадна би аз завшаан гэдэг зүйлд дэндүү итгэдэг болсон. Шаргуу хөдөлмөрлөж, амжилтад хүрэхийн тулд бүхнийг хийсэн боловч амжилт хажуугаар нь өнгөрөөд байгаа юм шиг хүмүүсийг би мэднэ. Энд хэргийн учир юунд оршиж байгаа талаар би тодорхой зүйл хэлж чадахгүй ч энэ нь намайг аз завшаанд зарим талаар итгэхэд хүргэдэг юм. Хүн бүр ер бусын амжилтад хүрэх чадваргүй нь ч үнэн билээ. Бидний зүгээс ямагт нөлөөлөөд байж болдоггүй тийм нэгэн тэнцвэртэй байдал ертөнцөд байдагт бүх хэргийн учир оршдог байж болох юм. Энэ утгаар нь авч үзвэл аз завшаандаа итгэж байх нь үр дүнтэйг би ямар ч байсан ажиглаж мэдсэн бөгөөд тэгсэн цагт тэрхүү аз завшаан таны талд үйлчилж эхэлнэ.

Бизнес бол бүтээлч үйл явц мөн. Урлагтай адил төстэй байх түүний шинж чанар чухамдаа үүнд л байгаа юм. Салбар бүрт өөрийн гэсэн тэргүүлэгчид бий. Хэрэв би үл хөдлөх хөрөнгийн салбарт нэрд гарсан бол энэ нь би ажилдаа шинэ мэдлэг, туршлага хуримтлуулах байр сууринаас төдийгүй бас бүтээлчээр хандаж ирсэнтэй олон талаар холбоотой билээ. Metropolitan Opera-гийн ерөнхий  захирал  Питер Гелб дуурийн талаар маркетингийн хамгийн шинэ нүүдэл /шатрын/ хийж, урлагийн энэхүү эрхэм дээд төрлийг орчин үеийн амьдралын гольдролд эргүүлэн оруулж байна. Тэрбээр урлагийн энэ төрлийг сурталчилахын тулд өнөөдрийн зах зээл хүлээн авч, дүгнэн цэгнэж болох тэр бүх арга хэрэгслийг ашиглаж байна. Өндөр үр дүнд хүрэхийн тулд хуучныг сэргээж, шинийг бий болгох буюу энэ хоёрыг хослуулах чадвартай байх явдал маш чухал юм.

Хэдэн арван жилийн өмнө би Гудзоны дагуух төмөр замын эзэнгүй хаягдсан агуулахуудыг худалдаж авсан бол өнөөдөр Trump Place бараг баригдаж дуусч байгаа бөгөөд тэнд арван найман гоёмсог байшин, Манхэттений Уэст-Сайдыг чимэглэсэн цэцэрлэгт хүрээлэн, хөлөг онгоцны буудал зэрэг л сүндэрлэв. Бүх зүйл ганцхан шөнийн дотор л бүтээд байх шиг заримдаа санагддаг боловч маш их нэрд гарсан, бас хөрөнгө чинээний хувьд гарын таван хуруунд багтах эрхмүүдийн ажил хэрэг ч үргэлж тийм байдаггүй билээ. Амжилт ихэвчлэн тэсвэр тэвчээртэй хамт ирдэг юм. Хэрэв танд тийм тэвчээр заяагдаагүй бол түүнийг өөртөө бий болгож болно.

Ингэхлээр бизнесийн амжилтыг байгалиас заяасан хишиг хэмээн үзэж болох уу? Амжилт гэдэг нь авьяас чадвар, нөр их хөдөлмөр, аз завшааны хослол мөн гэж би боддог.

ТОВЧ ТОДОРХОЙ, ХУРДАН ШАЛАМГАЙ, ЯВ ЦАВ БАЙЖ СУР

 Одоо хэмнэлт гаргаагүй хүн хожим харамсах болно.
                                                                                                     Күнз

Күнзийн энэ мэргэн сургаальд харууслын тухай өгүүлсэн бөгөөд би үүнийг зүгээр нэг сонсоод өнгөрсөн биш гэдгээ хүлээн зөвшөөрөх ёстой. Би бодол санаагаа илэрхийлж чадахгүй хүмүүстэй нэг биш удаа уулзаж байсан болохоор “харуусах” гэдэг үгийн утгыг бүрнээ ойлгодог болсон билээ. Би энд элэгсэг биш хүн болж харагдахыг хүсэхгүй байгаа боловч “Тэрэнд аливаа зүйлийн мөн чанарт хүрэхийн тулд хичнээн хугацаа хэрэгтэй юм бол? Түүнд Австрали хүртэл нисэх хугацаа аль хэдийнэ өнгөрсөн ч ингэж чадахгүй л эргэлдээд байх юм” гэсэн бодол надад байнга төрдөг юм. Бизнест удаан бодох хугацаа өөрийгөө ямар ч гоё үгээр илэрхийлэх зав зай гэж байдаггүй юм. Та аливааг товч тодорхой, түргэн шуурхай, яв цав хийх хэрэгтэй. Гэхдээ энэ нь элэгсэг хандлагын илрэл байх ёстой. Зарим хүн цаг хугацааг дэмий өнгөрүүлэх гээд байдаг юм. Күнз цаг хугацааг дэмий өнгөрүүлдэг хүмүүст хандаж дээрх үгийг хэлсэн болов уу гэж би боддог. Ер нь хэнд ч хэрэггүй дэмий яриагаар эргэн тойрныхоо хүмүүсийн цагийг барахын хэрэг юу байна вэ?

Би “Тэрбумтан шиг сэтгэ” хэмээх номондоо Рикардо Беллинод надад бизнес төлөвлөгөөгөө танилцуулахын тулд гуравхан минут байсан тухай бичсэн билээ. Тэр өдөр би тун ч завгүй, түүний танилцуулгыг сонсох тийм ч сонирхолтой биш байсан учир түүнийг надтай ярилцахаасаа татгалзах байх, энэ нь ч миний ажилд саад болохгүй байх гэж бодсон юм. Гэтэл Рикардо надтай ярилцахаас татгалзаагүйгээр барахгүй миний хүссэн гуравхан хоромд хамтарч бизнес хийхийг минь зөвшөөрүүлсэн тийм танилцуулгыг хийж чадсан юм. Гайхалтай байгаа биз? Энэ бол цаг хугацаанд хавчигдсан хүмүүс юу хийх чадвартайг л харуулсан явдал билээ.

Хүмүүс өөртөө хааяа хязгаар тогтоож байх хэрэгтэй гэдгийг ойлгуулах гэсэндээ л би үүнийг бичиж байгаа юм. Танилцуулгыг тав хүрэхгүй хоромд хийж сурагтүн. Мөн өөрийнхөө тухай гурав хүрэхгүй хоромд ярьж сурвал зохино. Үг, ярианаасаа тийм ч чухал биш хэллэгүүдийг хасчихвал бодол санаагаа гайхалтай сайн илэрхийлж болохыг та олж мэдэх биз ээ. Сонсогчид буюу удирдагчид ажил хэргийнхээ мөн чанарыг илүү, дутуу үггүй илэрхийлэх таны чадварт талархах болно.

Бид бүгд залхана гэдэг үгийг мэдэх билээ. Заримдаа ямар нэгэн чухал мэдээллийг олж авахын тулд ямар ч хэрэггүй шахам олон тооны мэдээллийг уншихад хүрдэг. Хүмүүст зөвхөн чухал бөгөөд ач холбогдолтой мэдээлэл өгч, тэднийг тэрхүү залхах явдлаас ангижруулаарай. Ингэх нь таны төсөөлж байснаас хамаагүй түргэн хугацаанд зорилгодоо хүрэхэд тусална.

Энэ утгаараа бизнес нь буухиа гүйлттэй төстэй юм. Тухайн баг ялан дийлэхийн тулд нэгдмэл байх ёстой. Тэнд нэг ч хоцрогч байх ёсгүй. Яагаад гэвэл түүнээс болж бусад нь шаналах болно. Бусдад садаа болохгүй байх хэрэгтэйг ойлгож авагтүн. Үзэл бодлоо илэрхийлэхдээ хурдтай байж сур. “Илүү товч хэлж болох байсан уу? хэмээн өөрөөсөө байнга асууж, улам нягт байхыг эрмэлзэгтүн. Ингээд л алхам алхмаар урагшилж, илүү үр дүнд хүрэгтүн. Асуудлын мөн чанарыг илэрхийлэх анхныхаа үгийг л зөв сонго.

Яриа хэлэлцээр хийх миний аргад дүн шинжилгээ хийсэн хүмүүс хэргийн мөн чанарт түргэн хүрэх чухам тэр чадвар л таныг бусдаас ялгаруулах юм гэж тэмдэглэн хэлдэг юм. Бусад хүн хэлэх үгээ томьёолж байх зуур би номоо бичээд дуусгачихдаг юм. Миний толгойд бүх ажил хэрэг маань бэлэн болчихсон байдаг. Хэргийн мөн чанарыг түргэн барьж авч, ярих чадвар өөрөө ороод ирдэггүй, би энэ тухайд их ажилласан. Хүн бүр мэдээлэл явуулахдаа, бичиг төлөвлөхдөө, үдийн хоол захиалахдаа гэх зэргээр өдөр бүр энэ аргыг хэрэглэж болно.

Хэрэв та “Нэр дэвшигч” шоуг сонирхож үзсэн бол аливаа баримтыг илүүц үггүй илэрхийлэх чадвартай оролцогч бусдаас давуу оноо авч байгааг ажигласан биз ээ. Гучин секундэд илэрхийлж болох таван минутын тайлбарыг сонсоно гэдэг нь надад болон миний зөвлөхүүдэд анхааруулгын дохио болох биз ээ. Бидэнд гоёж гоодсон үг яриатай хамтрагчидтай ярилцаж суух зав байхгүй. Сонсоход ч уйтгартай нуршуу үг яриа ялалтад хүрэх боломжийг маань үлэмж багасгадаг юм.

Товч, түргэн, яв цав мэдээлэлд амьдралын их мэргэн санаа байдаг билээ. Мэдээллийнхээ зорилгыг мэдэж, үүнийгээ хүрээлэн буй хүмүүст үзүүлж чадах явдал бол хүмүүсийн хүндэтгэлийг хүлээх, бусдыг манлайлах зүгт том алхам хийх боломжийг танд олгоно. Энэ дадал зуршлыг хүнсний тасагийн лангууны дэргэд ч, “Нэр дэвшигч” шоуны танхимд ч, ер нь хаана ч, хэзээ ч хурцалж байгтүн. Үг яриагаа хэмнэж сурагтүн. Эдүгээ хүмүүс товч тодорхойг өндөр үнэлдэг болжээ.
Эх сурвалж: ном Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
МАН-ын шинэ даргад хэн нь тохирох вэ?
  • Ж.Эрдэнэбат
  • Ц.Нямдорж
  • У.Хүрэлсүх
  • Н.Энхболд
  • Ө.Энхтүвшин