Д.Трамп: Ялагчийн зиндаанд сэтгэ
2017 оны 6 сарын 28
Дональд Трампын "Ялагч шиг сэтгэ" номоос...

Аливаа хүн өөртөө зориулж сонгож авах шилдэг зам бол өөрийнхөө чадах хамгийн өндөр үр дүнд хүрэх явдал мөн.  

Аристотель

Хүн ялагч болж төрдөг, бас ялагч болдог. “Ялан дийлэгч гэдэг нь илэрхий давуу талаа харуулж чадаж буй хүн юм” хэмээх нэгэн тодорхойлолт байдаг. Өөр нэг тодорхойлолтоор бол уралдаанд оролцоод тэргүүн байр эзэлсэн буюу гол шагналыг хүртсэн хүн мөн юм. Бид бүгд олимпийн аваргуудын тухай сонсч, магадгүй тэднийг телевизээр харсан билээ. Энэ хүмүүсийн ер бусын  амжилтыг дүгнэн хэлэлцэж байх үед хамгийн түрүүнд ухаан бодолд орж ирдэг зүйл бол тоолж хэмжээд баршгүй их дасгал сургуулилт, тэдэнд тохиолдож байсан ялагдал харууслууд, бас ялалтад хүрэхийн тулд тэдний гаргасан эрэлхэг зориг мөн билээ. Гэхдээ энэ бол аваргуудад байдаг ердөө зарим нэг чанар юм.
 
  
Түүнээс гадна энэ хүмүүс ер бусын амжилтад хүрэх гэж эрмэлзжээ. “Бусадтай л адилхан байх” зорилт ялан дийлэгчийн зиндаанд сэтгэдэг хүнд таарахгүй. Ялагчид өргөн цар хүрээтэй сэтгэдэг. Мөн ийм өргөн цараатай хөдөлмөрлөдөг. Тэд шаргуу бас сахилга баттай. Энэ тухай бодогтүн. Ялан дийлэгчид аваргын цараатай сэтгэдэг ажээ. “Аварга энэ бол хүч нь барагдсан ч босч ирж л байдаг хүн” гэж Жэк Дэмпси хэлжээ. Энэ үг танд ч хамаатай гэж бодоцгооё.
   
Надад онцгой хүнд өдөр тохиолдоход миний амьдрал автомашины уралдаантай төстэй юм. Энэ уралдааны замыг дуустал нь туулах тэсвэр хатуужил надад байвал зүгээрсэн гэж би байнга боддог. Би ялагдагч болж үлдэхийг хүсдэггүй учир тэрхүү тэсвэр хатуужлыг дасгал сургуулилтаар олж авч болно. “Ялагчаар тодрогчид өөртөө хариуцлага хүлээдэг юм. Торон дээгүүр над руу бөмбөг нисч ирж байх зуурт та итгэлтэй харж сууж болно. Би тэр бөмбөгийг буцааж цохихыг хүсч байна” гэж алдарт теннисчин бүсгүй Билли Жин Кинг ярьжээ. Тэр бүсгүй юун тухай ярьсныг би ойлгож байна. Яагаад гэвэл би яг тэгж бодож байгаа юм.
   
Жил бүр би US Open-ын тэмцээний тасалбар худалдаж авдаг. Аваргууд ялалт өөд хэрхэн тэмүүлдгийг харж суух нь надад маш сайхан байдаг. Спорт, урлаг гээд аль ч хүрээний мэргэжлийн хүмүүсийг ажиглаж суухад надад үнэхээр сайхан санагддаг. Энэ хүмүүсийг сэтгэлгээний адил төстэй хэлбэр нэгтгэдэг. Тэд ялан дийлэхийг хүсч, шилдгийн шилдэг байхыг эрмэлздэг. Хоёр, гуравдугаар биш зөвхөн нэгдүгээр хүн байхыг хүснэ. Үүнийг эргэцүүлэн бодох хэрэгтэй юм. Үнэхээр авьяаслаг хүмүүс миний бодлоор сэтгэлийнхээ үзүүрт ялагдчих вий гэсэн бодол тээж явдаг учраас л бүтэлгүйтдэгийг би харж байсан. Ялалт бүр хариуцлагатай байхыг шаарддаг, аваргууд ч түүнд хүртэл өсдөг ажээ. Өөрийгөө уудалж үзэгтүн. Ингээд хариуцлага хүлээхэд бэлэн, тийм ч чадвартай гэдэгтээ итгэгтүн. Хэрэв тийм биш бол сайн ажиллах хэрэгтэй. Хариуцлага хүлээх чадвар бол амжилтын чухал бүрэлдэхүүн хэсэг мөн.
   
Намайг гольф тоглодгийг олон хүн мэднэ. Гольф бол оюун ухааны тоглоом гэж би үргэлж ярьдаг. Энэ ч үнэн билээ. Энэ тоглоом техникийн сайн тоноглол, тодорхой хэмжээний ур чадвар шаардана. Гольфыг хайнга тоглоод гайгүй амжилтад хүрнэ хэмээн бодож болохгүй. Анхаарлаа төвлөрүүлж, тэвчээртэй тоглох хэрэгтэй. Домогт гольфчин Бобби Жонс нэг удаа “Гольфт нэг удаад нэг л цохилт хийж болно гэдэг шинэ бөгөөд ер бусын ойлголт огт байхгүй. Олон жилийн дараа би үүнийг сайтар ойлгосон юм” гэж хэлсэн юм. Ердийн амьдрал дээр бид өдөр бүр шаргуу ажиллаж, хором бүрт аваргын дайтай сэтгэдгийн хүчинд л ялалтад хүрдэг ажээ.
   
Одоо номын энэ бүлгийн эхэнд иш татсан Аристотелийн мэргэн үгийг авч үзье. Энэ бол өөртөө дүн шинжилгээ хийхийн дээд зэргийн илрэл мөн. Үнэхээр ч хүрч чадах хамгийн дээд амжилт өөд тэмүүлнэ гэдэг бол аливаа хүний хувьд шилдэг сонголт мөн. Өөрийнхөө өмнө өндөр бус зорилт тавихын хэрэг юу байна вэ? Та хүүхдээ “Би том болсон хойноо хэн ч болохыг хүсэхгүй байна” гэж хэлэхийг ядахдаа нэг удаа ч болов сонсч байсан уу? Үгүй ээ. Хүүхэд багачууд гэдэг мөрөөдөл, төлөвлөгөөгөөр дүүрэн, даруухан хүсэл эрмэлзэлтэй байна гэж бараг л үгүй дээ. Хүүхдүүд Ерөнхийлөгч, сансрын нисэгч, эрдэмтэн, эмч болохыг л хүсдэг. Ингэхлээр тэд зөв зам дээр байна. Тэдний сэтгэлгээний хэлбэр зөв байна гэсэн үг юм. Та өмнөө өндөр зорилтууд дэвшүүлэн тавьж байсан тэр цаг үедээ эргэн ирлээ гэж бод доо. Хүн бүр аварга болох чадвартай биш ч хүн бүр өөрийнхөө чадах хамгийн дээд зорилго өөд эрмэлзэн тэмүүлж болно. Энэ бол эхний алхам, бас өдөр бүрийн үүрэг хариуцлага мөн.
   
Ялагчид аливааг өөрийнхөө боломжоос давуулан гүйцэтгэдэг байна. Зарим ажлыг зүгээр л хангалттай хэмжээнд биелүүлдэг, бас заримдаа жинхэнэ ёсоор хүч бололцоогоо дайчилснаа бид бүгдээрээ мэддэг л байхгүй юу. Ингэхлээр өдөр бүр биеэ ийнхүү дайчлахыг эрмэлзэгтүн. Аливааг эхлүүлэх боломжийг өөртөө олгож чадаагүйн улмаас бүү алдагтүн. Амжилтаас бүү ай. Яагаад гэвэл хариуцлагын түвшин танд дэндүү их мэт санагдаж байгаа юм. Зүгээр л хамаг бүхнээ төвлөрүүлээд урагшаа зүтгэ. Ухаалаг хүчин чармайлтын дүнд хүрч ирэх үр дүнг хараад та гайхах болно. Александр Грэм Бэлл нэг санаа хэлснийг би хэзээ ч мартдаггүй юм. “Та одоо эрхэлж буй ажилдаа бүх бие сэтгэлээрээ төвлөрөгтүн. Нарны туяа галт шилний төвд цуглараагүй цагт юуг ч шатааж чадахгүй”. Үүнийг санаж явагтүн. Аваргуудын цараатай сэтгэж сурагтүн. Тэгвэл та ялагч болно.

Үргэлжлэл бий...

Дональд Трампын "Ялагч шиг сэтгэ" номоос...


Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Үндсэн хуульд нэмэлт өөрчлөлт оруулахыг та зөв гэж бодож байна уу?
  • Тийм
  • Үгүй
  • Мэдэхгүй