Д.Трамп: Амжилт, ололтынхоо тухай хүмүүст ярьж бай
2017 оны 7 сарын 8
Дональд Трампын "Ялагч шиг сэтгэ" номоос...
Аливаа хүн сэтгэлдээ таашаал аваагүй л бол өөрийгөө тав тухтай байна хэмээн мэдэрч чадахгүй.
                                                                                                        Марк Твэн

Надад маш авьяастай, бас хөрөнгө чинээтэй нэг найз бий. Дэндүү чинээлэг гэж хэлж болно. Нэг удаа тэрбээр над руу утасдаж, Jean Georges зоогийн газарт хооллох ширээ захиалж өгөхийг хүсэхэд би мэл гайхаж, “Нью-Йоркийн зоогийн газарт ширээ төдийхнийг захиалж болохгүй юм бол тийм асар их хөрөнгийн хэрэг юу байна?” хэмээн дуу алдахад хүрсэн юм. Гэтэл Нью-Йоркт хэн ч түүний тухай хэзээ ч сонсч байгаагүйд хэргийн учир оршиж байсан юм билээ. Найз маань нэрээ ашиглахаас тэгтлээ их ичдэг байсан явдал өөрт нь сөргөөр нөлөөлжээ. Ингээд л тэр өөр хүмүүсээс, тухайлбал надаас тусламж гуйхад хүрсэн байна.
  
Энэ явдал миний маргаангүй итгэдэг “Өөрийгөө рекламд” гэдэг онолын талаар эргэцүүлэн бодоход хүргэсэн юм. Миний найз тэр онол зөв болохын гайхамшигтай нотолгоо мөн. Тэр “ядуу баян” гайгүйхэн шиг газарт очиж хооллохыг эрмэлзэхдээ үнэн хэрэгтээ ядуу хүн болж хувирч байгаа нь тэр ээ. Нэр төр гэдэг аугаа хүчтэй байж болно. Тэр ямар ч хаалга үүдийг нээх чадвартай билээ. Аристотель Онассисаас илүү баян хүн олон байдаг нь маргаангүй боловч хүмүүс энэ нэрийг сонсоод хэний тухай өгүүлж байгааг мэддэг байлаа. Алдар нэрнээс үүдэлтэй нэг эрх дарх бол аль нэг зоогийн газарт түвэггүйхэн шиг ширээ захиалах боломж мөн гэж би ярьсан билээ. Миний үлэмж баян найз ийнхүү өөрийнхөө олон эрх дархыг үгүй болгож байгаа юм.
  
Хэн нэгнийг бусад хүнд танилцуулангаа “Энэ хүн Пулитцеровын шагнал авсныг та нар мэднэ биз дээ?” гэх аястай үгсийг хайнгадуухан хэлэхэд л тэнд байсан хүмүүсийн хариу үйлдэл эрс өөрчлөгдөж, ердийн нэг эелдэг харьцаанаас шууд л амьд сонирхол болон хувирахыг та хэзээ нэгэн цагт ажигласан уу? Хэн ч биш байсан хүн гэнэт л хэн нэгэн болж ирнэ. Таныг “мандуулах” хүн хажууд тань байхгүй бол үүнийг өөрөө хийж сурах хэрэгтэй. Сайн танигдсан нэр өөрийгөө зарлан тунхаглана л гэсэн үг. Chanel-д зориулж Карл Лагерфельдын зохион бүтээсэн хувцас хэн нэгэнд таалагдахгүй байж болно. Харин тэр хувцсан дээр Chanel-ын таних тэмдэг хадаж орхиход л хүмүүс түүнийг худалдан авч, дурлан өмсч байна.
  
Нэр олон зүйлийн талаар өгүүлж чадна. Гэхдээ одоохондоо таны нэр “Олон нийтийн хүртээл” болоогүй цагт та хэн болохоо, ямар амжилтад хүрсэн тухайгаа хүмүүст ярьж өгч болно. Холбоо тогтоох, нийтлэг эрх ашигтай хүмүүсийг эрж олох зэрэг бол эхлэл мөн. Хэрэв Лучано Паваротти хүн, амьтангүй газар бүх насаараа ганцаар сууж дуулаад л байсан бол бид ямар мундаг дуучнаа таньж мэдэлгүй өнгөрөөх байсныг та төсөөлж болно. Мөн Элтон Жон аль нэгэн гараашт өөрөө өөртөө л зориулж дуулаад байсан бол яах байсан бэ? Хүн төрөлхтөнд авьяас билгээ үзүүлнэ гэдэг ямар их гайхамшиг вэ?
  
Өөрийн гэсэн “би”-тэй байх, түүнийгээ хүлээн зөвшөөрнө гэдэг эрүүл сонголт мөн. Бидний “би” бол бидний өөрийн ухамсрын төв мөн бөгөөд энэ нь бидэнд утга агуулгын мэдрэмжийг өгч байна. Өөрийн гэсэн “би”-гүй хүмүүст амьдралын эрч хүч тун сул байдаг. Харин “би” нь дэндүү агуу хүмүүс дарангуйлал өөд тэмүүлэх хандлагатай байдаг ажээ. Бусад бүх зүйлийн нэгэн адил энд ч ухаалаг, тэнцвэртэй байдлыг хадгалах нь маш чухал юм. Таны “би” хөдөлгөөний эерэг эрч хүчийг хадгалахад тус дөхөм болж чадах бөгөөд ингэсний дүнд удаан хугацааны турш эрч хүчтэй, үр бүтээлтэй хэвээр байж чадна. Энэ нь олон чухал зүйлд, өөрөөр хэлбэл эрхэлж буй ажилдаа төвлөрөхөд тань тусална. Хэсэг хугацаа өнгөрсний дараа та амжилт ололтынхоо тухай хүмүүст ярихын хэрэггүй болно. Яагаад гэвэл тэд энэ тухай өөрсдөө мэдчих болно. Өөрийнхөө “би”-г бүү басамжлаарай.
  
Өөрийнхөө шилдэг найз байх явдал маш чухал. “Өөрөө өөрийгөө хөхиүлэн сайшаах хэрэгтэй” гэж Марк Твен хэлжээ. Эргэн тойрны хүмүүс таны ололт амжилтыг бууруулах, дутуу үнэлэхдээ гол төлөв дуртай байдаг. Таны өөрийгөө хүндэтгэх үзэл хангалттай хэмжээний хүчтэй бол энэ нь таны сэтгэлийг зовоохгүй. Яагаад гэвэл та энэ хүмүүс рүү их өндрөөс харж чадна, ингэхээс ч өөр арга байхгүйд хүрнэ. Шүүмжлэх дуртай хүмүүс амин хувийнхаа зорилгыг урьтал болгодог. Ингэх нь тийм ч муу зүйл биш. Гэвч та арай илүү ухаантай болохоор өөрийнхөө зорилгыг урьтал болгон тавих болно. Та өөрийнхөө тухай  сайн зүйл огт хэлж чадахгүй бол хэн ингэх болж байна вэ? Бодоод үзэгтүн. Мэдээжийн хэрэг магтахаас өөр аргагүй үйл бүтээсэн бол та өөрийнхөө тухай өндөр дуугаар мэдэгдэхээс бүү айгтүн. “Би саятангуудад сөрөг хүчин болж байна. Гэхдээ энэ байдалдаа хэвээр үлдэхийг надад санал болгох нь ямагт аюултай зүйл байх болно” хэмээсэн Марк Твений бас нэг үгээр энэ бүлгээ төгсгөе.
Эх сурвалж: номоос

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
МАН-ын шинэ даргад хэн нь тохирох вэ?
  • Ж.Эрдэнэбат
  • Ц.Нямдорж
  • У.Хүрэлсүх
  • Н.Энхболд
  • Ө.Энхтүвшин