Трамп: Өөрийгөө нэр хүндтэй болго!
2017 оны 8 сарын 7
Ирээдүйн үйл хэргээрээ өөртөө нэр хүнд бий болгож болохгүй.

                                                                                                            Хэнри Форд


Миний бие “Трамп” нэртэй брэндийг хэдэн арван жилийн туршид бий болгосон. Одоо миний гурван том хүүхэд энэ маркийн нэр хүндийг өндөрт авч явахаар “Trump Organization”-д ажиллаж байна. Хүү Дон, Иванка, Эрик нар бүгд надтай хамт ажиллаж байна. Тэд бол миний жинхэнэ шавь нар, “Нэр дэвшигч”-д тэд асар их үүрэг гүйцэтгэж байгаа билээ. Намайг өндөр шаардлагатай хүн гэдгийг хүүхдүүд маань мэддэг. Тэд ч маш өндөр сахилга баттай, хөдөлмөрч, хүмүүс учраас Trump Organization-д ажилтан байхад бүрнээ нийцэж байгаа юм.

Өндөр чанараараа нэрд гарсан брэндийг эзэмшигч байна гэдэг нь сайн нэр хүндтэй байх явдалтай бараг утга адил юм. Үүнийг бүр эхнээсээ л анхааралдаа байлгах явдал маш чухал. Таны ярьж, хийж байгаа бүхэн ихээхэн ач холбогдолтойг та санаж байгаа биз ээ. Аливаа үйлдлийн учир холбогдлыг хэт үнэлэхийн хэрэггүй. Танд өөрийн гэсэн бизнес байхгүй ч та жинхэнэ үгийнх нь утгаар брэндийг илэрхийлж байгаа юм. Хэрэв та хийж буй зүйлдээ үнэн сэтгэлээсээ хандаж байгаа бол хувь заяаныхаа төлөө хариуцлага хүлээж байна гэсэн үг.

Миний нэрийг зүүж буй брэнд үйл ажиллагааны аль ч төрөлд хамгийн өндөр чанарыг хангах ёстой. Хэрэв би гольфын талбай байгуулж байгаа бол хамгийн шилдэг нь байх ёстой. Тэнгэр баганадсан байшин барьж байгаа бол хамгийн шилдгийг барих ёстой. Мөн би костюм үйлдвэрлэх чиглэл бий болгох гэж шийдсэн бол хамгийн шилдэг нь л байх ёстой юм. Би тодорхой ажлуудад маш нямбай ханддаг хүн. Тодруулж хэл гэвэл бүх ажилд. Хэрэв та зарчмын хувьд хүрч болох зорилго өөд тэмүүлж байгаа бол тийм л байх ёстой.

Намайг гольфын талбай байгуулах үедээ тэр бүсэд ямар мод ургадгийг сонирхсон явдалд олон хүн маш ихээр гайхсан гэж нэг хүн надад ярьсан билээ. Үнэхээр би зарим нэг хүчин чармайлтыг тавьж, энэ төрлийн модны голлох мэргэжилтэнтэй уулзаж, олж авсан мэдлэгийг судлахад олон цаг зарцуулж байсан билээ. Дээр дурдсан хүмүүсийн гайхшралд би үнэхээр сэтгэл эмзэглэсэн. Яагаад гэвэл миний хувьд аливаад нэгбүрчлэн хандах явдал үнэхээр зүй ёсны хэрэг мөн. Та бүх нарийн ширийнийг биечлэн мэдэж байх ёстой. Ам дамжиж авсан мэдээлэл бол хоёрдугаар зэрэглэлийн л мэдээлэл байдаг. Хоёрдугаар зэрэглэлийн хүн байхын хэрэггүй. Өөрөө ажилла. Ингэж байж л онцсайн брэнд буюу нэр хүндэд, магадгүй хоёуланд нь хүрэх замыг тавьж болно. Нарийн ширийн зүйлс мод буюу өргөгч кран зэрэг юунд ч хамаатай байсан дэндүү жижиг гэж хэзээ ч байдаггүй. Миний албан тасалгааны буйдан дээр нүүр гарын гурван угаагуур хэдэн сар дараалан хэвтэж, надтай уулзах гэж ирсэн хүн бүрээс би “Энэ гурвын аль нь танд илүү таалагдаж байна вэ?” хэмээн асуудаг байсныг миний туслахуудын нэг дурсч ярьсан юм. Жижиг сажиг зүйлд тийм анхаарал тавих явдал хамгийн өндөр түвшний ур чадварын үзүүлэлт гэж би боддог.

Миний байшингуудыг хүмүүс баригдаж дуусахаас нь өмнө худалдаж авдаг. Яагаад вэ?  Хүмүүс брэндийг таньдаг болж, мөнгөөрөө шилдэг чанар худалдаж авахыг мэддэг болжээ. Тэд юугаар ч эрсдэлтэй алхам хийхээ больж. Чанар, үнэнч хандлагад үндэслэсэн бизнес гэдэг бол их хүчтэй зүйл мөн. Ийм бизнес өөрөө өөрийгөө худалдан борлуулдаг байна. Ийм явдал нүд ирмэхийн зуурт болж өнгөрдөггүй бөгөөд та өөртөө нэр хүнд бий болгохын тулд уйгагүй ажиллах хэрэгтэй болно. Та ямар ч ажил үйл эрхэллээ гэсэн өнөөдрөөс л эхлэх хэрэгтэй. Хэнри Фордын хэлснээр ирээдүйнхээ үйл хэргээр өөртөө нэр хүнд /буюу брэнд/ бий болгож болохгүй. Ирээдүйн төлөвлөгөө, үзэл санаа, мөрөөдлөө үйл ажлаараа бататгах хэрэгтэй.

Бидний олонхид зөвлөмжийн захидал хэрэгтэй байдаг. Би тийм захидал бичдэг, хүлээж авдаг ч тийнхүү хүлээж авсан захидлаас “хариуцлагатай”, “мэргэжлийн”, “найдвартай” гэсэн үгнүүдийг ямагт хайдаг юм. Хэрэв ердөө гуравхан үгэнд тулгуурласан нэр хүнд бий болговол энэ гурван үг өрсөлдөгчдийн нэрсийн жагсаалтад эхний байранд бичигдэнэ. Брэнд, миний жинхэнэ нэр төртэй холбоотой зүйл яригдахад би чухамдаа дээрх гурван үгийн тухай л боддог. Хариуцлага, мэргэжлийн чадвар, найдвартай ажиллагааны тухай яригдах үед худалдан авагчидтай, харилцагчидтай, оюутнууд, уншигчид, сонсогчидтой, бусад олон хүнтэй жинхэнэ ёсоор харьцах ёстой юм. Энэ бол тийм ч амархан бүтдэг зүйл биш гэдгийг хүлээн зөвшөөрөх ёстой. Би маш олон хүний өмнө хариуцлага хүлээж байгаа, тиймээс өндөр стандарт гэдэг бол өндөр л стандарт байх ёстой. Үүн дээрээ би баттай зогсох болно. Би хэзээ ч арай багавтар стандартыг хүлээн зөвшөөрөхгүй.

Та өөрийнхөө эрмэлзэж буй тэрхүү нэр хүндийг бий болгохын тулд мөн л ингэж ажиллах ёстой. Шаргуу чанарт өөрийн гэсэн давуу тал бий. Хамгийн өндөрт авиран гарч, тэндээ үлдэх явдал тэдгээр давуу талын нэг мөн. Одоо, өнөөдөр л та эхэл. Энэ л хоромд эхэл. Танд олон өрсөлдөгч бий, тэд таныг хүлээхгүй.

Оюун ухаан, хариуцлага, үр дүнтэй ажиллагаанд үндэслэсэн сайн нэр хүндийг бий болго. Шилдгүүд ингэж л ханддаг юм.
Эх сурвалж: ном

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
МАН-ын шинэ даргад хэн нь тохирох вэ?
  • Ж.Эрдэнэбат
  • Ц.Нямдорж
  • У.Хүрэлсүх
  • Н.Энхболд
  • Ө.Энхтүвшин