Баянзүрх дүүрэгт засаглалын хямрал нүүрлэжээ
2017 оны 8 сарын 10

Улстөржилтөөс үүдэлтэй засаглалын хямрал Баянзүрх дүүрэгт нүүрлэж, иргэд, аж ахуйн нэгжийн эрх ашиг ноцтой зөрчигдөж буй талаар тус дүүргийн ИТХ-ын төлөөлөгч Ч.Цэвэгмид, Б.Дэмбэрэл, Г.Хонгор, П.Төмөрхуяг нар өчигдөр мэдээлэл хийлээ.

Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн 26.3-т дүүргийн Засаг даргын бүрэн эрхийг дөрвөн жилийн хугацаатай томилохоор заасан байдаг. Гэтэл Баянзүрх дүүргийн ИТХ-ын төлөөлөгчид өнөөдрийг хүртэл бүрэн бүрэлдэхүүнээрээ хуралдаж, хуульд заасны дагуу Засаг даргын нэрийг дэвшүүлсэнгүй. 2012-2016 онд бүрэн эрхээ хэрэгжүүлсэн Д.Пүрэвдаваа хууль зөрчин Засаг даргаар ажилласаар...

Ингээд зогсохгүй Баянзүрх дүүргийн сонгуулийн тойргийн хорооноос нэр нь татагдсан асуудал нь шүүхийн шатанд байгаа долоон нэр дэвшигчийн нэг болох Ш.Ганчимэг дан ганц АН-ын төлөөлөгчдийн дундаас сонгогдож ИТХ-ын даргаар ажиллаж байгаа аж. Уг нь Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн 11 дүгээр зүйлд зааснаар дүүргийн ИТХ-ын анхдугаар хуралдааныг төлөөлөгчид бүрэн бүрэлдэхүүнээрээ хийж ИТХ-ын даргыг нэр дэвшүүлэн сонгох учиртай.
Баянзүрх дүүргийн хороодын ИНХ-ыг зохион байгуулахдаа мөн л хууль зөрчжээ. Тодруулбал, Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн 23.10 дахь хэсэгт заасан “хорооны хурлын хуралдаанд зөвхөн тухайн хорооны сонгуулийн насны иргэн бүр оролцож болох бөгөөд 20-30 өрх тутмаас тус бүр нэг хүн хүрэлцэн ирсэн тохиолдолд хүчинтэйд тооцно” гэснийг илт зөрчиж нийт иргэдэд зар түгээлгүй зөвхөн АН-ын гишүүдийн оролцоотой хуралдуулж ИНХ, хороодын Засаг дарга нарыг томилсон байна.

Нөгөөтэйгүүр Баянзүрх дүүргийн нийт сонгогчдын 46.3 хувийн саналыг авч МАН-аас ИТХ-д сонгогдсон 19 төлөөлөгчийг өнөөдрийг хүртэл хуралдаанд оролцуулахгүй байгаа нь иргэдийн сонголтыг үл хүндэтгэсэн үйлдэл юм гэж төлөөлөгчид мэдэгдлээ.

Дүүргийн Засаг даргын дэргэдэх хэлтэс албадын удирдлагууд есөн сарын хугацаанд хэд хэдэн удаа солигдсон, зарим нь хоёр даргатай болжээ. Мөн дүүргийн Гэр бүл, хүүхэд залуучуудын хөгжлийн хэлтэс ажлын өрөө тасалгаагүй, ажилтнууд нь 2017 оны нэгдүгээр сараас хойш цалингүй ажиллаж байгаа аж. Газрын албанд газрын эрх шилжүүлэх, эзэмшихтэй холбоотой 1511 иргэний өргөдөл хуримтлагдаж, Боловсролын хэлтэс нь Сүхбаатар дүүргийн 100 айлд байрлах нэгэн зочид буудалд өрөө түрээслэж байгаа юм байна.

Үүнээс гадна дүүргийн Засаг дарга Д.Пүрэвдаваа 2016 оны төсвийн зарцуулалтын тайланг төрийн аудитаар хянуулаагүй, Төсвийн тухай хуулийг зөрчиж дүүргийн Прокурорын газарт 40 сая төгрөг олгох шийдвэр гаргажээ.

Ийнхүү өвөлжилтийн бэлтгэл, хичээлийн шинэ жилийн нээлт хаяанд тулсан энэ цаг үед 355 мянга гаруй хүн амтай Баянзүрх дүүрэгт хуулийг уландаа гишгэж, засаглалын хямрал нүүрлэж, төсвийн сахилга бат зөрчигдөж, төрийн албан хаагчид нь ажлаа хэвийн явуулах нөхцөл алдагдаж, иргэд төрд итгэх итгэл алдагдахад хүрчээ.

Иймээс төлөөлөгчдийн зүгээс хуулийг хэрэгжүүлэх, Улаанбаатар хотын Засаг дарга, НИТХ-ын дарга нарт шаардлага хүргүүлэх, тус дүүргээс УИХ-д сонгогдсон гишүүдэд хандахаар шийдвэрлэсэн байна.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Төрийн алба хаагчдад 300 мянган төгрөг өгөхийг Та дэмжиж байна уу?
  • Дэмжиж байна.
  • Дэмжихгүй байна.