Нийгмийн даатгалын илүү төлөлтийг буцаан олгож байна
2017 оны 8 сарын 11

Иргэдийн дунд олон асуулт дагуулаад буй Нийгмийн даатгалын шимтгэлийн буцаан олголттой холбоотой зарим асуудлыг ЭМНДЕГ-ын мэргэжилтэн Э.Баасанжалбаас тодрууллаа.


-Нийгмийн даатгалын шимтгэлийн буцаан олголтыг олгож эхэлсэн талаар сонслоо. Энэ талаар тодорхой мэдээлэл өгөхгүй юу? Ямар хүмүүс буцаан олголт авах эрхтэй вэ. Тодорхой мэдээлэл өгөхгүй юу?
-Даатгуулагчийн нийгмийн даатгалын шимтгэл төлөх дээд доод хязгаар гэж байдаг. Энэ нь тухайн үед мөрдөгдөж буй хөдөлмөрийн хөлсний доод хэмжээнээс багагүй, түүнийг арав дахин нэмэгдүүлсэн хэмжээнээс ихгүй байхаар зохицуулагдсан бөгөөд зарим даатгуулагчийн тухайд үндсэн ажлаас гадна хэд хэдэн ажил давхар эрхэлж хөдөлмөрийн хөлс, орлого тус бүрээсээ нийгмийн даатгалын шимтгэл төлсөн байдаг. Эдгээрийн нийлбэр дүн нь дээр дурдсан дээд  хэмжээнээс илүү төлөгдсөн тохиолдолд илүү төлөгдсөн шимтгэлийг буцаан олгодог.

-Энэ жилийн тухайд нийт хэдэн хүн хамрагдаж байгаа вэ?
-Эрүүл мэнд, нийгмийн даатгалын ерөнхий газраас ажил олгогчийн нийгмийн даатгалын шимтгэл төлөлтийн тайлан, даатгуулагчийн шимтгэл төлсөн тооцооны хуудас, өгөгдлийн сангийн мэдээлэлд тулгуурлан илүү төлсөн шимтгэлээ буцаан авах эрх бүхий даатгуулагчийн нэрсийн нэгдсэн жагсаалтыг гаргадаг. Энэ жилийн тухайд давхардсан тоогоор 38561 хүнд 2,6 тэрбум төгрөгийн буцаан олголт олгохоор тусгагдсан, энэ ажил эхлээд явж байна.

-Буцаан олголтын эрх үүссэн хүмүүс хаана хандах вэ?
-Даатгуулагч үндсэн ажлынхаа харъяалал бүхий эрүүл мэнд, нийгмийн даатгалын хэлтэст хандана. Ингэхдээ даатгуулагчийн баталгаажсан нийгмийн даатгалын дэвтэр,  үндсэн ажлаас гадуур гүйцэтгэсэн ажил, үйлчилгээний орлогоос төлсөн шимтгэлийг бүртгэх дэвтэр, иргэний үнэмлэх, даатгуулагчийн нэр дээр нээсэн банкан дахь дансны тодорхойлолт зэргийг бүрдүүлэн очсоноор илүү төлсөн шимтгэлээ авах боломжтой юм.

-Шимтгэлийн буцаан олголтод хамрагдсан эсэхээ яаж мэдэх вэ?
-Тухайн онд авах шимтгэлийн буцаан олголтын хэмжээгээ харъяа эрүүл мэнд, нийгмийн даатгалын хэлтэстээ очиж дэлгэрэнгүй лавлах шаардлагатай. Харин шимтгэл төлөлтийн мэдээллээ цахимаар авахыг хүсвэл http://www.ndaatgal.mn/regnd/ цахим хаягаар орж бүртгүүлэн мэйл хаягаараа шууд лавлах боломжтой.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Цаазын ялыг сэргээх нь зөв үү?
  • Зөв
  • Буруу
  • Насаар нь хорих хэрэгтэй
  • Мэдэхгүй