Цагдаа нар мэдээлэгчийнхээ аюулгүй байдлыг бодолцсонгүй юу
2017 оны 8 сарын 12
Иргэний өгсөн мэдээллийн дагуу хар тамхи хэрэглэсэн бүлэг залуусыг барьсан талаар ЦЕГ-аас мэдээллээ. Тодруулбал, өнгөрсөн сарын 17-ны өдөр Сүхбаатар дүүргийн VIII хорооны нутаг дэвсгэрт таван залуу мансуурсан байдалтай байна гэх мэдээлэл Цагдаагийн байгууллагад иргэнээс иржээ.

Уг мэдээллийн дагуу цагдаагийн албан хаагчид дээрх этгээдүүдийг шалган үзлэг хийхэд иргэн Т-ийн биеэс мансууруулах болон сэтгэцэд нөлөөтэй байж болзошгүй цаасанд боосон зүйл илэрчээ. Энэ хэрэгт Монгол улсын иргэн Т, Ц, Ө, Л, Т гэх 5 этгээдийг саатуулан Эрүүгийн хуулийн тусгай ангийн 20.7 дугаар зүйлийн 1 дэх хэсэгт зааснаар эрүүгийн хэрэг нээн шалгаж байгаа аж.

Мөн дээрх этгээдүүдийн биеэс биологийн дээж авч шалгахад ТНС буюу мансууруулах, сэтгэцэд нөлөөт бодис хэрэглэсэн болох нь тогтоогдсон байна.

Дашрамд дурьдахад, хар тамхины хэргийг илрүүлэхэд туслалцаа үзүүлж цагдаагийн байгууллагатай хамтран ажилласан иргэнийг ЦЕГ-аас шагнаж, талархал илэрхийлжээ.

Гэхдээ цагдаагийн хурандаа нар хэргийн талаар мэдээлэл өгсөн залуугийн зургийг олон нийтийн сүлжээнд нэр устай нь тавьсан нь иргэнийхээ амь, нас эрүүл мэндэд аюул заналхийлсэн хэрэг болсон гэдгийг иргэд хэлж шүүмжилж байгаа юм. Тэд хар тамхи хэрэглэсэн залуусынхаа нэр, зургийг ил гаргаагүй байж мэдээлэл өгсөн хүний аюулгүй байдалд халдан зургийг нь олонд дэлгэсэн нь ард түмнийхээ аюулгүй байдлын төлөө тангараг өргөсөн цагдаагийн байгууллагын хувьд байж боломгүй алдаа гэж үзэж байна.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Төрийн алба хаагчдад 300 мянган төгрөг өгөхийг Та дэмжиж байна уу?
  • Дэмжиж байна.
  • Дэмжихгүй байна.