“Өлийн даваа”-ны босоо ороолон гурван ч хүний аминд хүрчээ
2017 оны 8 сарын 26

Орой болгон хүүхэн дуулна, цагаан гэгээ тасармагц ямаа майлна гээд ер бусын тохиолдол газар бүр л хүмүүст тохиолдож байдаг нь сонирхолтой. Энэ удаа морь тушдаг байсан газар ил үзэгддэг чөтгөртэй болжээ. “Өлийн даваа” орой болохоор л зүүн талаараа морьтой хүн ер урагшаа гишгүүлэхгүй. Тэр тухай сонссон Цоодол гэдэг эр ямар чөтгөр байдгийг нь үзэх гэж хэд хэдэн удаа “Өлийн даваа” орж хөнжил пүүгээтэй очиж хоносон боловч юутай ч таараагүй гэдэг юм билээ. Саяхнаас “Өлийн даваа”-ны далд чөтгөр ил үзэгдэх болж таарсан хүн сэтгэл мэдрэлийн өвчтэй болж хохирсон байна.

“Өлийн даваа”-ны баруун хойд аманд Төмөрхуяг өвөлжөө барьж суурьших болжээ. Төмөрхуяг өвлийн амралтаараа ирсэн хүүхдүүдээ сум руу хүргэж очоод оройхон гэр рүүгээ харьж явсан байна. Гэнэт морь нь үргэхээр нь харвал, зэвхий саарал дээлтэй үс гэзэг нь сэгсийсэн хачин муухай царайтай хүн хажуугаар нь гүйгээд гарч явжээ. Салхитай жихүүн байсан болохоор Төмөрхуяг сормуусаа цантсан юм болов уу гэж бодоод нүдээ арчаад харахад яах аргагүй л хачин муухай хүн харагдаж. Өөрөө тарнийн хэдэн үгтэй болохоор өнөөхийгөө уншаад гэр рүүгээ давхиж гарчээ. Чөтгөртэй таарвал морийг хурдаар нь биш хатируулж явдаг гэж олонтаа сонссон болохоор тэр ёсоор явсаар харьж өөрт тохиолдсон зүйлээ эхнэртээ ярьж өгчээ.

Түүнээс хойш орой үдэш “Өлийн даваа” руу ойртохоо больжээ. Төмөрхуяг эхнэртэйгээ хооллоод сууж байтал гаднаас нь нутгийн Энхболд гэдэг залуу босгоор нь дөнгөж даваад л ухаан алдаад унажээ. Тэд сандралдан эхнэрийнхээ үнэртэй усыг үнэртүүлж байгаад нэг юм ухаан оруултал Энхболд чөтгөр, чөтгөр гэж хашгираад Төмөрхуяг руу зүтгээд байсан байна. Маргааш өглөө нь Энхболд овоо гайгүй болохоор нь түүнээс юу болсныг сонирхсон аж. Энхболд сумын төв ороод гэр рүүгээ харих гэж явж байсан байна. Түүнийг “Өлийн даваа” руу ойртож явтал хачин муухай царайтай хүн хажуугаар нь гүйж явжээ. Тэрхэн зуур айснаасаа болоод юу болсныг ч бүү мэд, нэг мэдэхнээ өнөөх муухай амьтан морин дээр нь сундалдчихсан явж байжээ.

Ингээд л Энхболд ухаан алдан орон гаран явсаар Төмөрхуягийнд ирсэн байж. Түүнээс хойш Энхболд сав л хийвэл татаж унадаг өвчтэй болсон байна. Тэр өдрөөс хойш сар хэртэй болж байж. Өглөө Төмөрхуяг малаа бэлчээгээд явж байтал “Өлийн даваа”-н дээр нэг машин харагджээ. Хүн амьтан орж гарч буй нь ер мэдрэгдэхгүй байсан байна. Өдөр гэр рүүгээ очиж цайгаа уугаад дахин мал руугаа явтал өнөөх машин байж байхаар нь очиж сонирхоё гэж бодоод очсон байна. Цонхоор нь очоод шагайтал ганцхан жолооч машиныхаа рулийг дэрлээд унтаж байх юм гэнэ. Цонхыг нь тогшсон боловч ер сэрэхгүй байжээ. Тэгэхлээр нь хаалгыг нь онгойлгоод таттал хөөрхий жолооч амьсгал хураагаад бие нь хөшчихсөн байсан байна. Төмөрхуяг мал руугаа яван шууд л ойрхон байдаг сумын төв рүү довтолгон цагдаа, эмнэлэг хоёрт очиж дуулгажээ. Ямар ч гадны нөлөөгүй байсан ба эрүүл мэндээр ч зүгээр гарсан аж. Амьд хүний гэрч болохоор үхсэн хүний дэр бол гэсэн үг байдаг. Төмөрхуяг үхсэн хүний талаар цагдаад баахан дуудагдаж нэг хэсэгтээ л ажлаа алдсан байна. Золтой л хүний амь хохироосон гэж шоронд оролгүй салсан байна.

Энэ мэтчилэн гэнэт үзэгдэх болсон “Өлийн даваа”-ны чөтгөр хагас жилийн дотор гурван ч хүний аминд хүрсэн гэнэ. Бүхнийг чөтгөрт тохох гэсэн боловч цаг үе чанга байсан болохоор ойшоох хүн яахан байх билээ. Хамгийн сүүлд “Өлийн даваа”-ны чөтгөр морьтой явсан ах, дүү хоёрыг жаал хөөсөн байна. Цогт, Цогтбаяр гэдэг хоёр залуу сумын төв ороод буцаж явсан байна. Тэр хоёрыг “Өлийн даваа” руу өгсөж явтал гэнэт Цогтын морь үргэн ухас хийжээ. Тэд гайхаж харвал үхээрийн царайтай хүн хажуугаар нь зэрэгцээд алхаж явж. Гайхсан ах, дүү хоёр хамт байсан болохоор зориг орон өнөөх муухай амьтныг хөөж цохих гэж оролдсон боловч ер гүйцэгдэхгүй юм гэнэ. Хөөж яваад цохихын даваан дээр алга болчихоод байсан аж.

Нэгэнт л баригдах эд биш юм, орхиод давхия гээд ухас хийцгээж. Нэг харахнээ өнөөх муухай амьтан араас нь хөөж явсан байна. Бараг 5 км хэртэй газар дагаж яваад хоцорсон аж. Айдаггүй хүнд бол гай болоод байдаггүй юм байж. “Өлийн даваа”-ны чөтгөрийг зөнд нь ойлгосон Төмөрхуяг эхнэртээ ч хэлэлгүй сэм явж зэргэлдээх сумын номтой сайн ламыг залж авчран өөрийн нүдээр үзсэн болон зарим хүмүүст тохиолдсон бүхнийг нэг бүрчлэн ярьж өгчээ. Төмөрхуягыг анхааралтай сонсч суусан лам шөнө хамт “Өлийн даваа”-нд очихыг санал болгоход дотроо дурамжхан байсан ч хүчээр зөвшөөрч.

Газрын холоос гуйж авчирчихаад яаж ч үгүй гэх билээ. Үдээс хойш жаахан нойр авсан ламтан орой цагаан гэгээ тасармагц Төмөрхуягыг дагуулан мөнөөх газар ирсэн байна. Хүлээгээд л байж. Чөтгөр байдаггүй гэнэ. Гарч ирэхгүй бол яана гэж Төмөрхуяг дотроо санаа зовон сууж байтал өнөөх үзээрийн муухай гараад ирсэн байна. Лам түүнийг анхааралтай харж байснаа өврөөсөө жижигхэн судар гаргаж аман дотроо хэдэн юм шивнээд судраараа ганцхан далайгаад цохитол дороо л хөсрий яс болон хувирсан аж. Ламтан тэр орчныг арцаар ариулаад Төмөрхуягынд очжээ.

Буцахдаа,
-Их удчихсан чөтгөр юм. Ахиж өндийж чадахгүй. Одоо санаа зоволтгүй гээд буцсан байна. Төмөрхуяг санаа тавиагүй бол хэдэн ч хүний аминд хүрч болох байжээ.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Төрийн алба хаагчдад 300 мянган төгрөг өгөхийг Та дэмжиж байна уу?
  • Дэмжиж байна.
  • Дэмжихгүй байна.