Аз жаргалтай төгсгөл (Өгүүллэг)
2017 оны 10 сарын 28

Жонн, Мэри хоёр учирна. Дараа нь юу болох вэ? Хэрэв аз жаргалтай төгсгөлийг хүсэж байвал А хэсгийг уншаад үз.

А
Жонн, Мэри хоёр бие биедээ дурлаж, улмаар гэрлэнэ. Хоёул цалин сайтай, сэтгэлд ханамжтай ажил хийж, бүх хүчээ дайчлан урам зоригтой ажиллана. Сайхан байшин авна. Үл хөдлөх хөрөнгийн үнэ өснө. Сүүлд нь гэрт нь амьдрах асрагчийг цалинжуулах чадалтай болохоороо хоёр хүүхэдтэй болж, тэдэндээ бүхнээ зориулна. Хүүхдүүд нь өсөж, том болно. Жонн, Мэри хоёр сэтгэл хангалуун, урамтайгаар бэлгийн харьцаанд орж, сэтгэлд нь нийцсэн найзуудтай болно. Тэд хамтдаа амралтад явж, хөгжилдөнө. Хоёул тэтгэвэртээ гарцгаахад урам хайрлаж, хүч чадал сорьсон сонирхдог зүйлтэй болно. Эцэст нь тэд нас барцгааж, энэхүү өгүүллэг төгсөнө.

Б
Мэри Жоннд дурлах авч Жонн Мэрид дурлахгүй. Жонн хүйтэн зан гаргаж, түүний биеийг зөвхөн өөрийн зугаа цэнгэл, хувиа хичээсэн хүсэлдээ л ашиглана. Мэригийн байранд долоо хоногт хоёр удаа ирэхэд нь бүсгүй оройн хоол хийж өгнө. Уншигч авхай Жонн Мэриг гадуур хоолонд оруулах тухай бодохгүй байгааг анзаарсан биз ээ. Оройн хоол идэж, Мэритэй хурьцал үйлдчихээд нам унтаад өгнө. Энд тэндгүй бохир аяга, тавагнууд хөглөрч, Мэри тэдгээрийг угаахад түүнийг ажилсаг гэж бодолгүй хэвтэнэ. Жонныг өглөө босоход Мэри түүнд гоё харагдах гэж уруулын будгаа түрхэхэд Жонн өндийгөөд түүнийг үл анзаарах бөгөөд оймс, богино өмд, дотоож, цамц, зангиа, гутлаа яаравчлан өмсөнө. Хувцсаа тайлахдаа үүний эсрэг үйлдэнэ. Жонн Мэригийн хувцсыг тайлахгүй. Мэри хурьцал хийхийг үхэтлээ хүсэж байгаа мэт өөрийнхөө хувцсыг өөрөө л тайлна.

Үнэндээ Мэри бэлгийн харьцаанд айхтар дурлахгүй боловч Жоннд дуртай юм шиг санагдуулж, байнга бэлгийн харьцаанд орвол Жонн гарцаагүй донтож, Мэригээс салж чадахаа байж, түүнтэй гэрлэнэ гэж Жоннд бодогдуулахыг хичээж байлаа. Гэвч шөнийг үнэхээр гайхамшигтай өнгөрүүлдэг болохоор гадагш бараг гардаггүй мөртлөө гурав хоногийн дараа зургаан цагт гэнэт ирж, энэ бүх зүйл дахин давтагддаг байв.

Мэри сульдаж эхэлжээ. Уйлахад нүүр муухай болдгийг хүн бүр андахгүй ч Мэри царай алдсан ч уйлахад нь түүнийг хэн ч зогсоож чадахгүй байлаа. Хамт ажилладаг хүмүүс нь анзаарч мэднэ. Найзууд нь Жонныг харх, гахай, нохойгоор нь дуудаж, түүнд тийм ч сайн биш гэсэн боловч Мэри итгэж өгөхгүй.

Сэтгэлдээ хамаагүй сайн, өөр Жонныг төсөөлөн бодож байлаа. Хэрэв эхний Жонныг өчүүхэн төдий тааруулаад шахаад өгөхөд хар чавганаас яс, хайрцагнаас Жак, хүр хорхойн үүрнээс эрвээхий гарч ирэх байлаа. Нэгэн үдэш Жонн хийсэн хоолыг нь муулжээ. Өмнө нь хэзээ ч Мэригийн хийсэн хоолыг муулдаггүй байсан билээ. Мэри гомдов.

Найзууд нь түүнийг Майж гэдэг нэгэн эмэгтэйтэй зоогийн газар байхыг нь харсан гэлээ. Майжаар ч зогсохгүй сүүлдээ Мэри болж, зоогийн газар нь мөн болж таарлаа. Жонн хэзээ ч Мэриг зоогийн газар аваачиж байсангүй. Мэри гартаа дайралдсан бүх нойрсуулах эм, аспириныг аваад тал шиг херес дарсаар даруулжээ. Виски хүртэл биш байгааг хараад уншигч авхай түүнийг ямар хүн болохыг нь мэдсэн биз ээ. Жонн Мэриг олоод, амжиж эмнэлэгт хүргэснээр өөрийн үйлдэлдээ гэмшиж, дараа нь гэрлэнэ гэж найдаад захиа орхижээ. Гэвч ийм явдал бололгүй Мэри тэнгэрт хальсан юм.
Жонн Майжтай гэрлээд, үйл явдал А хэсэгт өгүүлснээр өрнөнө.

В
Ахимаг настай Жонн Мэрид дурлах аж. Хоринхоёрхон настай Мэри Жонны үс унаж, үүндээ санаа зовоход нь Жонныг өрөвдөнө. Мэри түүнд хайргүй ч Жоннтой хурьцал үйлдэнэ. Тэд ажил дээр учирна. Мэри Жэймс гэдэг нэртэй, амьдрал нь хараахан төвхнөөгүй хоринхоёрхон настай залууд дурлана.

Үүний эсрэгээр Жонн олон жилийн өмнө төвхнөсөн нь түвэг, яршиг болно. Жонн тогтсон боломжийн ажилтай, өөрийн салбартаа тэргүүлэгч хэдий ч Мэригийн сэтгэлийг догдлуулахгүй. Эсрэгээрээ Мэри асар олон дууны цомогтой, мотоциклтой Жэймст сэтгэл алдарч байлаа. Гэтэл Жэймс үргэлж л мотоциклио унаад эрх чөлөөтэй явдаг байв. Охидууд эрх чөлөө гэдэг зүйлд адил ханддаггүй болохоор энэ зуур Мэри пүрэв гаригийн оройг Жоннтой өнгөрүүлдэг байв. Зөвхөн пүрэв гаригт л Жонн гадуур гардаг байлаа. Жонн Майж гэдэг эмэгтэйтэй сууж, үл хөдлөх хөрөнгө өсөхөөс өмнөхөн сайхан байшинтай болоод хоёр хүүхэд төрүүлж өгсөн завтай цагтаа урам хайрлаж, хүч чадал сорьсон сонирхдог зүйлтэй болно. Жонн Мэрид ямар чухал ач холбогдолтой болохыг хэлээд ч мэдээж хариуцлага бол хариуцлага болсон хойно эхнэрээ хаяж явсангүй.

Жонн шаардагдах хэмжээнээс илүү хариуцлага хүлээхэд Мэрид уйтгартай санагдаж байсан боловч ахимаг настай эрчүүд юмыг тууштай үргэлжлүүлж чаддаг болохоор ерөнхийдөө Мэрид их сайхан байдаг байлаа. Нэгэн өдөр Жэймс гибридтэй мотоцикл дээрээ тухлаад, боломжоороо Мэритэй хар тамхи татан орондоо арай гэж орцгоов. Бүх зүйл ид явагдаж байхад нь Мэригийн байрыг Жонн түлхүүрдэн орж ирлээ. Тэр хоёр мансуурсан, хоорондоо тэврэлдсэн байхыг нь харав. Жонн Майжыг бодоод ямар ч атаархал төрөөгүй боловч арга нь барагджээ. Эцсийн эцэст тэр хижээл настай, хоёр жилийн дараа өндөг шиг халзан толгойтой болохыг тэвчиж чадахгүй. Жонн зорьсон хэргээ хэрэгжүүлэхэд хэрэгтэй гэж гар буу шүүрч авлаа. Энэ нь зохиолын барагтайхан хэсэг байсан ч Жонн үүнийг дараа нь гүйцэлдүүлж, хоёуланг нь улмаар өөрийгөө буудан хорооно.

Майж тодорхой хугацаанд гашуудавч сэтгэл санаа нийлсэн Фрэд гэдэг эртэй гэрлэж, өөр нэртэй болсон ч А хэсэгт өгүүлсэн ёсоор энэ түүх үргэлжилнэ.

Г
Фрэд, Майж хоёр ямар ч асуудалгүй амьдардаг байв. Тэд хоорондоо гайхамшигтай таарч, өчүүхэн төдий болзошгүй саад бэрхшээлийг хамтарч давахдаа сайн байлаа. Тэдний сайхан байшин далайн эрэг дээр дүнхийнэ. Нэгэн өдөр үлэмж далайн түрлэг болж, үл хөдлөх хөрөнгийн үнэ бууна. Үлдсэн хэсэг нь далайн түрлэг юунаас үүдсэн, Фрэд, Майж хоёр хэрхэн зугтсан талаар өгүүлэх болно. Олон мянган хүн живсэн боловч Фрэд, Майж хоёр амь гарсан билээ. Тэр хоёр сайхан сэтгэлтэй, юманд талархаж сурсан болохоор А хэсэгт өгүүлсэн ёсоор энэ түүх үргэлжилнэ.

Гэхдээ Фрэдийн зүрх өвдөнө. Өгүүллэгийн төгсгөл хэсэгт Фрэд насан эцэслэх хүртэл хоёул хэрхэн бие биенээ ойлгож, нинжин сэтгэл гаргаж буйг өгүүлнэ. А хэсэг төгстөл Майж хүмүүнлэгийн ажилд хүчин зүтгэнэ.

Д
Хэрэв энэ бүх өгүүлэмжийг хөрөнгөтний үзэлтэй болгон Жонныг хувьсгалч, Мэриг сөрөг тагнуулыг баллах албаны ажилтан гэвэл уншигч авхай хэрхэн цааш үргэлжлүүлэхийг үзье. Энэ бол Канад гэдгийг санаарай. Хэдийгээр тулаантай тууль завсар хооронд нь холбох хүсэл, шунал дүрэлзэж байсан ч он цагийн эрхэнд А хэсгээр төгсөнө. Хэдийгээр төгсгөлийг танасан ч адил төгсгөлтэй уншигч авхай учирна. Өөр бусад төгсгөлд бүү хууртаарай. Тэрхүү төгсгөлүүд бүгд хуурамч, хорсолтойгоор мэхлэх санаатай зориудын хуурамч эсвэл зүгээр л хэтэрхий өөдрөг сэтгэл үгүй бол илэрхий уян сэтгэлдээ хөтлөгдсөн болно. Цорын үнэн төгсгөл бол “Жонн, Мэри хоёр нас барна. Жонн, Мэри хоёр нас эцэслэнэ. Жонн, Мэри хоёр тэнгэрт халина” гэж байна.

Төгсгөл нь дэндүү юм. Эхлэл нь үргэлж хөгжилтэй. Үнэн их мэдлэгтэн завсар хооронд нь нэмэх таатай боломж бүрдүүлдэг ч энэ нь туйлын хэцүү билээ.

Зохиолын талаар энэ бүхнийг дурдаж болох ч ямар ч гэсэн ар араасаа юм юм болно.

Маргарет Этвүүд
Эх сурвалж www.wikimon.mn
Орчуулсан Ц.Шүрэнцэцэг
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Төрийн алба хаагчдад 300 мянган төгрөг өгөхийг Та дэмжиж байна уу?
  • Дэмжиж байна.
  • Дэмжихгүй байна.