Ерөнхийлөгчийн хоригийг хүлээж авсангүй
2017 оны 11 сарын 9

УИХ-ын чуулганы хуралдаан үргэлжилж байна. Чуулганы хуралдаанаар Монгол Улсын 2017 оны төсвийн тухай хуульд өөрчлөлт оруулах тухай, Нийгмийн даатгалын сангийн 2017 оны төсвийн тухай хуульд өөрчлөлт оруулах тухай хуулиудад тавьсан Монгол Улсын Ерөнхийлөгчийн хоригийг хэлэлцлээ.

Мөн чуулганы хуралдаанд Монгол Улсын Ерөнхийлөгч Х.Баттулга оролцож гишүүдийн асуусан асуулт хариулт өгөв.

УИХ-ын гишүүн, МАН-ын бүлгийн дарга Д.Хаянхярваа "Ерөнхийлөгч та Ерөнхийлөгч шиг бай. Намын дотоод асуудал руу ороод байна. Хэнийг ямар албан тушаалд тавихыг зааж байна. Төмөр замын хэрэгт татагдсан А.Гансүхийг албан тушаалд томилсон. Энэ зөв үү"

УИХ-ын гишүүн О.Баасанхүү “Төрийн албан хаагчид 300 мянган төгрөгийн урамшуулал авахгүй гээд байгаа. Түүний оронд 55 тэрбум төгрөгийг ахмадуудад өгье”

УИХ-ын гишүүн С.Чинзориг, “Хүүхдийн мөнгийг 8 сараас хойш олгоогүй. Төсвийн тодотголд хүүхдийн мөнгөнд зориулж 104.5 тэрбум төгрөгийг суулгасан. Хэрэв хоригийг хүлээж авбал бид он дуусталх хүүхдийн мөнгийг олгохгүйд хүрнэ”

УИХ-ын гишүүн Л.Энх-Амгалан, “Ерөнхийлөгч хоёр ч удаа ойр ойрхон хориг тавьлаа. Ерөнхийлөгч бол эв нэгдлийг сахих ёстой. Монгол Улс өнөөдөр өрийн дарамтад орчихлоо. Ажилгүйдлийн түвшин нэмэгдлээ. Гэмт хэрэгт холбогдож байгаа хүний тоо өслөө. Монгол Улс өнөөдөр улстөрийн тогтворгүй байдлын жагсаалтад орлоо. Нэг Засгийн газар 1.3 жил ажилласан байна. Бид эдгээр нөхцөл байдлыг ярих ёстой. Түүнээс хориг тавиад сууж байх ёсгүй”

УИХ-ын гишүүн Н.Номтойбаяр "Ч.Хүрэлбаатар гишүүний мэдээлэлд ташаа юм байна. Өмнөх Засгийн газрын үед 55 тэрбум тавигдана гэж яригдаагүй. Төсөв мөнгө тараана гэсэн тэнэглэл чинь танай Засгийн газрынх. Цалин нэмэх нь зөв. Гэхдээ эхлээд 3 сая иргэддээ төр ажил хийж өгөхийн тулд хэчнээн төрийн албан хаагчтай байх юм. Энэ судалгаагаа гаргах хэрэгтэй. Төрийн ажлыг хувьчлах хэрэгтэй. Энэ Засгийн газрын төсөв дагалдуулж барьсан санал нь тэнэглэлийн шинжтэй"

УИХ-ын гишүүн Ж.Мөнхбат "Хориг бол тавигдаж л байдаг зүйл. Хоригийг хүлээж авах эсэх нь парламентийн асуудал. Парламент дундаа олонхийг бүрдүүлж байгаа бүлгийн дотоод асуудал. Хоригийг бол дэмжихгүй. 2017 оны төсвийн тодотголд хүүхдийн мөнгийг 100 хувь олгохоор заасан байсан. Гэвч Ерөнхийлөгч үүнд хориг тавилаа. Тэгэхээр үүнийг дэмжихгүй"  гэлээ.

Улмаар хуралдаанд оролцсон гишүүдийн 85,2 хувь нь "Хоригийг хүлээж авах боломжгүй" гэж үзлээ.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Төрийн алба хаагчдад 300 мянган төгрөг өгөхийг Та дэмжиж байна уу?
  • Дэмжиж байна.
  • Дэмжихгүй байна.