Өрхийн эмч нар эгдүүцлээ илэрхийлэв
2017 оны 12 сарын 6
Эмч, багш нар цалин нэмэгдүүлэх шаардлага тавьсантай холбогдуулан улсаас төрийн алба хаагчдад нэг удаа 300 мянган төгрөг олгохоор болсон. Энэ мөнгийг 12 дугаар сард багтаан олгоно гэдгийг ч мэдээлээд байгаа. Гэхдээ энэ 300 мянган төгрөг нь өрхийн эмч нарт хамааралгүй гэнэ. Энэ талаар өнөөдөр Эрүүл мэндийн ажилтны үйлдвэрчний эвлэлийн холбооноос хэвлэлийн хурал хийж төр өрхийн эрүүл мэндийн төвийн эмч, ажилтнуудыг ялгаварлан гадуурхаж байна хэмээсэн юм.
 
Эрүүл мэндийн ажилтны үйлдвэрчний эвлэлийн холбооны дарга Б.Мягмар “Нийт төрийн албан хаагчдад 300 мянган төгрөг нөхөн олговор олгохоор болсон. Эрүүл мэндийн салбарын хөдөлмөр, нийгмийн зөвшилцлийн нэмэлт хэлэлцээр өнгөрсөн баасан гаригт эхэлсэн. Харамсалтай нь өрхийн эрүүл мэндийн асуудлыг шийдвэрлэж чадахгүйгээс үүдэн хэлэлцээр гацаад байна.
 
Улсын хэмжээнд 200 гаруй өрхийн эрүүл мэндийн төв бий. Энд 3000 гаруй эмч, эмнэлгийн ажилтнууд анхан шатны тусламж үйлчилгээг цаг наргүй үзүүлж байна. Одоо томуугийн дэгдэлтийн үед 22.00 цаг хүртэл ажиллаж байна. Ингэлээ гээд илүү цагийн хөлс өгдөггүй. 2014 оноос хойш өрхийн эрүүл мэндийн төвүүдийн ажилчдын цалинг нэг ч төгрөгөөр нэмээгүй. Харин хийдэг ажил нь хэд дахин нэмэгдсэн. Эрүүл мэндийн салбарынханд олгохоор шийдвэрлэсэн нөхөн олговор, урамшуулалд өрхийн эрүүл мэндийн төвүүдийг хувийн эмнэлэг гээд хамруулахгүй байна. 

Эрүүл мэндийн яам, Сангийн яам, Засгийн газар ийм зарчим баримталж байна. Төрийн үйлчилгээг үзүүлж байгаа өрхийн эрүүл мэндийн төвүүдийн ажилтнуудын дургүйцлийг төрүүлж байна. 3000 ажилтныг ялгаварлан гадуурхаж болохгүй. Тиймээс холбоглох яам, Засгийн газарт 3000 хүний гарын үсэгтэй шаардлагыг хүргүүлнэ. Эрүүл мэндийн салбарын нийт ачааны 80 хувийг өрхийн эрүүл мэндийн төвүүд үүрч байгаа” гэх мэдээллийг өглөө.
 
Мөн тэдний шаардлагыг хүлээн авч, 300 мянган төгрөг өгөхгүй бол өрхийн эрүүл мэндийн төвийн эмч, ажилтнууд ирэх баасан гаригт Эрүүл мэндийн яамны гадаа эсэргүүцлийн цуглаан хийхээр болжээ. 
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Төрийн алба хаагчдад 300 мянган төгрөг өгөхийг Та дэмжиж байна уу?
  • Дэмжиж байна.
  • Дэмжихгүй байна.