Хоёр сарын дотор салхинцэцэг өвчний 614 тохиолдол бүртгэгджээ
2018 оны 2 сарын 9
2018 оны эхний сарын байдлаар салхин цэцэг өвчний 614 тохиолдол бүртгэгдэж, өвчлөл буурахгүй байгаа аж. Иймээс иргэд, сургууль, цэцэрлэгийн эмч, багш нарт дараах мэдээлэл, зөвлөмжийг өгч байна. Уг өвчин нь бага зэргийн халууралт бүхий арьсан дээр толбон тууралт гарч улмаар цэврүүт тууралт болдог вирусийн шалтгаант халдвар, хордлогын шинжтэй цочмог түгээмэл халдварт өвчин юм.

Энэ өвчнийг ихэвчлэн бага насны хүүхэд өвчлөх боловч бас насанд хүрэгчид өвдөж болно. Халдвар нь вирусээр үүсгэгддэг учир дэгдэмхий, агаар дуслын замаар, хүнээс хүнд халдвар дамжина. Салхин цэцгийн халдвар авсан тохиолдолд 37.5 - 39 хэм хүртэл халуурах, толгой өвдөх, хоолны дуршил буурах зэрэг ерөнхий халдварын шинжүүд тууралт гарахаас 1-2 хоногийн өмнө илэрч эхэлдэг. Арьсан дээр эхлээд толбон, гүвдрүүт, улаан тууралт гардаг. Аажмаар томорч 2-3 хоногийн дараа шингэн агуулан цэврүүтэж, ойролцоогоор тав хоногийн дараа хагарч, хонхорхой үүсч тав тогтдог, тав нь ховхорч соривжилт үүсдэг. Тууралт гарахдаа эхлээд нүүр, их биеэр гарч цаашлан амны салст болон бүх биеэр тархдаг.

Нууц хугацаа нь 11-21 хоног. Халдвар авсан эхний өдрөөс сүүлийн тууралт гарснаас хойш тав хоногийн хугацаанд халдвартай байна.Тууралт нь загатналт ихтэй учир бага насны хүүхэд маажиж хоёрдогчоор халдварлаж, тууралт идээлж улмаар дархлал суларсан хүүхдийн арьсан дээр буглаа үүсч болно.

Уг өвчний шинж тэмдэг илэрсэн тохиолдолд өрхийн эмчдээ үзүүлж, эмчилгээ, зөвлөгөө авах шаардлагатай, хөнгөн тохиолдолд өрхийн эмчийн хяналтад гэрээр эмчилнэ. Салхин цэцэг өвчний халдварлах хугацаа урт, үүсгэгч вирус нь маш их дэгдэмхий учир өвчилсөн хүүхдийг сургууль, цэцэрлэгт нь явуулалгүй гэрийн нөхцөлд халдвартай хугацаа дуустал тусгаарлаж эмчийн зөвлөсөн эмчилгээний дэглэмийг мөрдөх, хүүхдийг өдөр бүр эсвэл өнжөөд усанд оруулах. Мөн амаар шингэн зүйл сайн уулгах юм. Хэрэв бэлэг эрхтэн орчим тууралттай байвал бэлэг эрхтнийг цэвэр усаар угааж вирусийн эсрэг тос түрхэх хэрэгтэй аж.

-ДАРХЛААГ ДЭМЖИХ-

Шим тэжээллэг, илчлэг сайтай бантан, ногооны зутан зэрэг шингэц сайтай хоол өгөх,
Гэрт хлор агуулсан уусмалаар чийгтэй цэвэрлэгээ өдөр бүр хийх,
Агаарын бохирдлын хэмжээ бага үеэр гэртээ агаар оруулах.

-ХЭЗЭЭ ЯАРАЛТАЙ ЭРГЭЖ ЭМЧИД ҮЗҮҮЛЭХ ВЭ-

Хүүхдийн халуун буурахгүй, тогтмол халуурах, толгой хүчтэй өвдөх, толгойгоо савчих, уйлагнаж, тайван биш болох, чанга хуцуулж ханиалгах, хүүхдийн амьсгал хяхтнах зэрэг шинж тэмдэг илэрвэл заавал эрүүл мэндийн байгууллагад хандах шаардлагатай.

-УРЬДЧИЛАН СЭРГИЙЛЭЛТ-

Эцэг эх асран хамгаалагч нар хүүхдийнхээ хоолой залгиурыг нь давс болон содын уусмалаар зайлуулах,
Гарыг нь тогтмол савантай бүлээн усаар угаах
Хүүхдийг эрүүлжүүлэх, дархлааг нь дэмжих витаминаар баялаг хоол хүнс хэрэглэх,
Цэвэр агаарт тогтмол гаргаж байх

-СУРГУУЛЬ, ЦЭЦЭРЛЭГИЙН ЭМЧ, БАГШ НАР-

Ангиас нэг хүүхэд өвдөхөд бусад хүүхдийн эцэг эх, асран хамгаалагч нарыг урьдчилан сэргийлэх мэдээ, мэдээллээр хангах,
Өвдсөн хүүхдийг бусад эрүүл хүүхдүүд дунд оруулахгүй байх, өөрөөр хэлбэл өвдсөн хүүхдийн халдвартай үе дуустал сургууль, цэцэрлэгээс чөлөөлөх,
Өвчлөл гарсан талаар харьяалагдах эрүүл мэндийн байгууллагад хандах, мэдээлэх, голомтод ариутгал халдваргүйтгэлийн арга хэмжээг авах хэрэгтэй.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
У.Хүрэлсүхийн Засгийн газрын үйл ажиллагаанд та сэтгэл хангалуун байна уу?
  • Тийм
  • Дунд зэрэг
  • Явцгүй байна