Иргэншлийг нь худалдан авч болдог 13 улс
2018 оны 3 сарын 5
Өнөөдөр баячууд дарвуулт завь, нисэх онгоцоор уралдахаа больжээ. Томоохон бизнесмэн, олигархи, баян чинээлэг хүмүүс өдгөө иргэншлээрээ уралддаг болсон гэнэ. Зарим нэг улс, орнууд ч тэдний энэ сонирхлыг тал бүрээр хөхиүлэн дэмжихээр болсон аж. 

Европын Холбооны иргэн болох хамгийн хурдан арга бол Кипр улсын пасспорттой болох явдал юм. Ингэхийн тулд тус арал дээр үл хөдлөх хөрөнгө барьж байгуулахад хоёр сая еврогийн хөрөнгө оруулалт хийх хэрэгтэй. Харин Кипр арал дээр очих ямар ч шаардлагагүй. Хагас жилийн дараа гэхэд л та Европын улс, орнуудаар чөлөөтэй явж, амьдарч, ажиллаж, суралцах боломжтой пасспортыг авах болно. 


Мальта улсын пасспорттой болохын тулд Үндэсний хөгжлийн санд нь 650 мянган еврогийн хандив өгөхөд л болно. Дээр нь гэр бүлийн гишүүн бүр 25 мянган евро төлөх ёстой. Улмаар 150 мянган еврогийн төлбөр төлөөд Мальта улсын харьяат болох албан ёсны хүсэлтээ гаргана. Ингэвэл та таван жилийн хугацаанд тус улсын харьяат болох юм. Тус арал дээр дор хаяж 350 мянган еврогоор үл хөдлөх хөрөнгөтэй болох ёстой. Энэ бүх нөхцлүүдийг биелүүлбэл тус улсад нэг жил амьдраад иргэний пасспортыг нь авч болно. 


Португалийн пасспортыг авах нь хялбар хэдий ч удаан хүлээх хэрэгтэй болно. Тэнд 500 мянган еврогийн үл хөдлөх хөрөнгө худалдаж авбал таван жилийн дараа түр суух үнэмлэхтэй болно. Нэг жилийн дараа иргэний пасспортыг нь авна. Хоёр жилдээ хоёр долоо хоногийн хугацаатай очоод байвал болох нь тэр. Харин португал хэлийг суралцах нь дээр болов уу. Иргэн болох үед чинь хэлний шалгалт авч мэднэ. 

Испанид 500 мянган еврогоор үл хөдлөх хөрөнгө худалдаж аваад таван жил амьдарсны эцэст түр оршин суух үнэмлэхтэй болно. Харин иргэн нь болохын тулд 10 жил тэнд амьдрах хэрэгтэй. Тийм учраас Португалийн иргэн болох нь хамаагүй амархан биз ээ.

Грек улсад 250 мянган еврогоор үл хөдлөх хөрөнгө худалдаж аваад түр оршин суух эрхтэй болно. 

АНУ-ын Засгийн газар хөрөнгө оруулагчдад түр оршин суух эрхтэй болох, Ногоон карттай болох хоёр замыг санал болгодог. Хөрөнгө оруулагчийн визийг дор хаяж нэг сая долларын хөрөнгө оруулалт хийсэн хүмүүст олгоно. Энэ визийг хүртсэн хүмүүс тэнд амьдарч, суралцаж, ажиллаж, тэтгэвэр авах эрхтэй болдог. 

Дэлхийн бөмбөрцгийн баруун хэсэгт орших хамгийн жижиг улс болох Сэнт-Кикс ба Невисийн иргэн болохын тулд 400 мянган долларын үл хөдлөх хөрөнгө худалдан авах юм уу чихрийн үйлдвэрлэлийг дэмжих санд 250 мянган долларын хандив өргөх ёстой. Энэ улсын иргэний пасспорттой болвол та Шенгений бүс болон Их Британи руу визгүй зорчих эрхтэй болно. 

Доминика улсын иргэн болоход тун хялбар гэнэ шүү. 200 мянган доллар төлөөд та тус улсын пасспорттой болох боломжтой. 

Антигуа ба Барбуда улс Карибын тэнгист оршдог бөгөөд ажил хэрэгч хүнд иргэний пасспортоо худалдахад бэлэн байдаг. Үл хөдлөх хөрөнгөд 400 мянган долларын хөрөнгө оруулалт хийвэл таван жилийн дараа иргэн нь болж болно. Бичиг баримтаа авахаас тавхан өдрийн өмнө тэнд очиход л хангалттай. Энэ улсын иргэн болсон хүн дэлхийн 135 оронд визгүй зорчих эрхтэй болдог. 

Гренада улсын пасспорттой хүн дэлхийн 127 орноор чөлөөтэй зорчиж болдог. Та энэ улсын иргэн болохын тулд 200 мянган долларын хандив өргөх юм уу 350 мянган доллараар үл хөдлөх хөрөнгө худалдаж авах ёстой. 

Арлын улс болох Сэнт-Люсиягийн пасспорттой болохын тулд 300 мянган доллараар үл хөдлөх хөрөнгө худалдан авч, Үндэсний хөгжлийн санд нь 100 мянган долларын хандив өргөх ёстой. Гурван сар хүлээхэд л тус улсын иргэний пасспорт таны халаасанд орно. 

Ази, Номхон далайн бүсэд оршдог Вануату улс тус улсын эдийн засагт хөрөнгө оруулалт хийсэн хүнд иргэний пасспортоо өгдөг цорын ганц улс билээ. Танд удаан хүлээх шаардлага байхгүй. 1-2 сар хүлээхэд л болно. Ганц бие хүн 220 мянга, дөрвөн хүнтэй гэр бүл 280 мянган долларын хандив өгөхөд л хангалттай. 
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
У.Хүрэлсүхийн Засгийн газрын үйл ажиллагаанд та сэтгэл хангалуун байна уу?
  • Тийм
  • Дунд зэрэг
  • Явцгүй байна