С.Баярыг дахин гэмт хэрэг үйлдэж болзошгүй гэх үндэслэлээр хорихоор болов
2018 оны 4 сарын 12
Өнөөдөр Чингэлтэй дүүргийн эрүүгийн хэргийн анхан шатны шүүхээс Монгол Улсын Ерөнхий сайд асан Ч.Сайханбилэгийг үргэлжлүүлэн 30 хоног хорих шийдвэр гаргасан билээ. Түүний дараагаар Ерөнхий сайд асан С.Баярыг үргэлжлүүлэн хорих эсэх шүүх хурал болж өндөрлөлөө. Шүүх хурлаас С.Баярыг ч мөн нэг сар хорих шийдвэрийг гаргалаа. Уг шийдвэртэй холбоотойгоор түүний өмгөөлөгч А.Ариунаа "Миний үйлчлүүлэгч, Монгол Улсын Ерөнхий сайд асан С.Баярыг 2018 оны дөрөвдүгээр сарын 10-нд шүүгчийн шийдвэргүйгээр баривчилсан. 

Ингэхдээ гэмт хэргийн ул мөр нотлох баримтыг зөөвөрлөх, устгаж болзошгүй гэсэн үндэслэлээр баривчилсан. Энэ үндэслэлийг үгүйсгэж шүүхэд гомдол гаргасан. Энэ үндэслэлээр эрүүгийн хэрэг үүсгэж, баривчилж байна. Гэтэл Оюутолгойн гэрээтэй холбоотой бүх материалууд өнөөдөр Засгийн газрын хэрэг эрхлэх газрын архивт, УИХ-ын газар, Үндэсний аюулгүй байдлын зөвлөлийн архивт байхад хойшлуулашгүйгээр баривчилсан нь үндэслэлгүй гэж үзэж байна. 

-С.Баяр шүүх хуралд онлайнаар оролцсон байх. Тэрбээр уг асуудалд хэрхэн байр сууриа илэрхийлсэн бэ?
-Өөрөө хэлэхдээ "Нэг сарын баривчлагдах, цагдан хоригдох нь надад сонин биш ээ. Гэхдээ Оюутолгойн гэрээтэй холбоотойгоор Монголын хоёр ч Ерөнхий сайдыг баривчлан хорих нь дэлхий нийтэд бидний нэр хүнд унах асуудал үүсэх вий. Оюутолгойн хувьцааны ханш унасанаар эдийн засагт нөлөөлөх юм. Энэ талаас нь харж үзэх хэрэгтэй шүү" гэж хэлсэн. С.Баярыг дахин гэмт хэрэг үйлдэж болзошгүй, мэдээлэл байгаа гэдэг үндэслэлээр цагдан хорилоо. 

-Прокурор үндэслэлээ тайлбарласан уу?
-Энэ хүн эрх мэдэл албан тушаалаа урвуулан ашигласан гэдэг үндэслэлээр эрүүгийн хэрэг үүсгэж яллагдагчаар татагдсан байгаа. С.Баяр нь Элчин сайдаар ажиллаж байсан хүн. Оюутолгойн гэрээг байгуулснаар авлига авсан, долоо найман хаус авсан гэдэг асуудлыг өөрөө шалгуулахаар ажлаа хүлээлгэн өгөөд Монголдоо ирсэн. Тийм байхад дахин гэмт хэрэг үйлдэж болзошгүй хэмээн цагдан хорьсон нь үндэслэлгүй гэсэн байр сууринаас шүүхэд оролцлоо. Мөн прокуророос ямар хэрэг дахин үйлдэнэ гэж үзээд байгаа шалтгаанаа тайлбарлана уу гэж хүссэн.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
У.Хүрэлсүхийн Засгийн газрын үйл ажиллагаанд та сэтгэл хангалуун байна уу?
  • Тийм
  • Дунд зэрэг
  • Явцгүй байна