Хулгайлагдсан хүүтэйгээ 22 жилийн дараа уулзжээ
2018 оны 5 сарын 12

Хятадын оршин суугч Ли Минзао болон Чен Зен гэх гэр бүлийн хосууд 22 жилийн өмнө хамт ажилладаг хүн нь хулгайлж одсон хүүтэйгээ эргэн уулзжээ. Энэхүү гэр бүлийн сэтгэл хөдөлгөм уулзалтыг цагдаагийн ажилчид бичлэгт буулган авч олон нийтэд хүргэсэн байна. Пенпен хүүгийн ээж Чен "Би хүүгийнхээ хөмсгөн дээрх энэ сорвийг санаж байна. Тэр хоёр настай байхдаа уначихсан юм" хэмээжээ. 

Хүү нь алга болдог өдөр Ли түүнийг өөрийн ажилладаг цементийн үйлдвэр лүү дагуулж явсан аж. Үйлдвэр дээр түүнтэй хамт ажилладаг Ян гэгч эр хүүг нь харж байхыг зөвшөөрсөн байна. Гэтэл тэр оройноо Пенпен хүүг гэрт нь хүргэж өгөөгүй тул эцэг, эх нь Яны гэрт очсон боловч мань эр хүүг нь аваад зугтчихсан байжээ. Сандарсан эцэг, эх Маожиан мужийн хууль хяналтын байгууллагад хандаж, хөрш зэргэлдээ Хенан, Хубэй, Шанши мужуудад очиж Пенпен хүүгээ хайсан боловч эрэл нь мухардсан аж. 

Хөөрхий эцэг нь хүүгээ алга болохоос өмнө мэддэг байсан утасны дугаараа одоог хүртэл солиогүй байсан бөгөөд хүү нь нэг л өдөр тэдэн рүү залгаж мэднэ хэмээн хүлээж байжээ. Хосууд мөн хүүгээ эргэж ирнэ гэж найдан жижигхэн тоосгон байшиндаа 22 жил амьдарсан байна. 

2010 онд Сичуан мужийн цагдаа нар хүний наймааны хэрэгт буруутган Яныг баривчилсан аж. Гэхдээ тэд Пенпен хүү мөн л Ян гэдэг нэртэй өөр нэг хүний наймаачин этгээдэд худалдагдсан гэдгийг олж мэдсэн аж. Аз болоход тэрхүү Ян нь мөн л баригдсан байсан тул түүнээс Пенпен хүүг нэгэн хосуудад худалдсан гэдгийг мэдэж авчээ. Энэ олон хүндрэл бэрхшээлийг үл харгалзан хууль сахиулагчид аман зураг гаргагчийн тусламжтайгаар хүүг хайсаар байжээ. Улмаар дөрөвдүгээр сард тэд ДНХ-ийн шинжилгээний хариу нь таарсан 26 настай Лью хэмээх залууг олсон байна. 

Лью төрсөн эцэг, эхдээ гэр бүлтэй болж, хоёр хүүхдийн эцэг болсон гэдгээ хэлсэн аж. Ээж нь "Бид түүнийг буцаж ирээд бидэнтэй хамт амьдар гэхгүй. Түүнд Хэбэй мужид өөрийн гэсэн ажил, гэр бүл байгаа гэдгийг бид ойлгож байгаа" хэмээсэн байна. 


Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
АТГ-ын дарга Х.Энхжаргалыг огцруулах шаардлагатай юу?
  • Шаардлагатай
  • Шаардлагагүй
  • Мэдэхгүй