Итгэхэд бэрх, үнэмшихэд хэцүү ч...
2018 оны 5 сарын 12
- Араг яснаас сүүмэлзэх аймшигт хөх галаас амь мултарсан жолооч эр - 

Чөтгөрийн гал гэж байдгийг уншигч авхай та сонссон уу? Мэдээж хэрэг хот оронд олон жил суурьшсан хүмүүс чөтгөрийн гал үзээгүй. Бас тэр тухайд сонсоо ч үгүй нь ойлгомжтой. Тэгвэл ийм галтай холбогдсон нэгэн адал явдлын тухай бичиглье. Говь-Алтай аймгийн нутагт байдаг Хүйсийн говиор Баян-Өлгий аймаг руу ачаа тээвэрлэж явсан залуухан жолооч Бадамрагчаа 80-аад оны эхээр төөрч орхижээ. Шөнө дундын үед машиных ус халаад байхаар бага зэрэг салхи сөрөх санаатай замаас хазайн давхиж яваад төөрч орхисон юм байх. 

Гай таарахад тэр шөнө замаар машин бага явсан уу, аль эсвэл ямар нэгэн далдын шидээр харуулахгүй байсан уу гэрэл гэгээ үзэгдэхгүй байжээ. Чингэж төөрч будилж явахад нь алсад нэгэн гэрэл ёлтойх нь тэр. Мань эр ч одоо л замаа олох нь гэж бодоод тэр зүг жолоогоо мушгив. Давхиад л байлаа...давхиад л байлаа. Сүүлдээ нэг л замаараа тойроод байгаа юм шиг санагдаж алсын бараа харах санаатай машинаасаа гарав. Мөнөөхөн гэрэл алга болчихсон байв. Гэрлээ олж харах санаатай машинаа тойрон алхахад өмнө нь түүдэг асч байх нь тэр. Айл байгаа юм уу гэж бодтол нэг л биш болоод явчихжээ. Үл ялиг гэрэлтэй хөх гал сүүмэлзэж байлаа. 

Уг гал маш хурднаар эргэлдэн тойрч битүү цагариг үүсгэж эхлэхэд нь мань эр айж сандарсандаа санд мэнд харайлган машиныхаа кабинд орж амжив. Хөх гал дугуй цагариг үүсгэн бүсэлсэн байлаа. Тэгснээ хэсэг гал тасран явсаар машиных нь хамар дээр гараад ирэв. Айн чичирч дагжсан тэр хэн нэг нь айлгаж байна гэсэн бодлыг тархиндаа хүчээр хийгээд юу ч юм олж харахаар нүдээ тас ширтжээ. Гэтэл сайн хараад байсан чинь санжиганасан араг ясны хохимой толгойны ухархайгаас уг гал гарч байх нь тэр. Мөн битүү цагариг үүсгэсэн хөх гал хөдлөөд байсан нь дандаа араг яснууд болох нь мэдрэгджээ. Ингээд л мань эр ухаан алдаж унасан байна. Аз болоход тэр үеэр үүр цайж байжээ. Хэдийгээр ухаан алдсан ч маш хурдан сэргэлээ. Сэргээд хартал дандаа хүний хувхай яс цайрч байсан аж. Бодвол дээхэн үед ил задгай оршуулах ёслол үйлддэг үед тавьж байсан шарилууд ийн хувхайрсан бололтой. Хачирхалтай нь төв зам холгүй байлаа. 

Машинаа асааж давхисаар Ээвийн буудал хэмээх буурчийн газар очиж хооллохдоо энэ тухайгаа ярьтал нь нэгэн өвгөн 
- Эсэргүү нарыг дээхэн үед буудсан гэдэг. Тэнд очиж галд ээрэгдсэн хүн тэндээ үхдэг гэж сонсогддог. Яг хаана байдгийг нь энэ нутагт насаараа амьдарсан би л олж үзээгүй юм даа. Маш ойрхон байдаг гээд байгаа юм гэж хэлсэн аж. Тэрбээр чухам яагаад амьд гарснаа одоо болтол бодоод олдоггүй бөгөөд тэр цагаас хойш хөдөө явахаасаа айгаад такси баазад ажиллах болсон гэдэг.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
У.Хүрэлсүхийн Засгийн газрын үйл ажиллагаанд та сэтгэл хангалуун байна уу?
  • Тийм
  • Дунд зэрэг
  • Явцгүй байна