Луу амталсан нулимс
2018 оны 5 сарын 22

Сайн зохиол бичихийн тулд сайн сэтгэх хэрэгтэй. Хөөрхөн зохиолыг хөөрхөн сэтгэж, хүчтэй зохиолыг хүчтэй сэтгэж бичнэ. Ялгаагүй сул зохиолыг ч сул сэтгэсэн хүн л бичдэг.

Жинхэнэ хүчтэй зохиол, хүмүүсийн ярьдгаар онцын онц сонирхолтой ном уншья гэвэл “Луу амталсан нулимс”-ыг уншиж үзээрэй. Энэ бол өмнө байгаагүй сэдэв. Би эхний хуудсыг нь сөхөөд л нэгэн өдөр, нэгэн шөнө уншиж дуусгасан.
Роман хэмээх урлан туурвихуйн томоохон төрлийг бичихэд бүү хэл, уншихад ч ихээхэн мэдрэмж, чадвар шаарддаг. Хөнгөхөн гүйлгээд уншчихад утга санаа нь тодроод ирдэг, үйл явдлыг нь “хяналтандаа” байлгаад байж болдог тийм зохиол байдаг. Тэр бүү хэл, хоёр гурван хуудас алгасаад уншихад ч өрнөл тайллыг нь урьтаад мэдчих боломжтой ном байдаг. Харин үг өгүүлбэр бүхнийг нь үлдээлгүй тогтож уншихаас аргагүй, тэгсэн хэрнээ хэн хүнийг уйдааж чилээх нь үгүй буурьтай зохиол гэж бас бий. “Луу амталсан нулимс” бол тийм л зохиол юм. 

“Луу амталсан нулимс” бол 1900-гаад оноос эдүгээ хүртэлх монголчуудын түүхийг хятад хүний нүдээр харсан бодит хийгээд бодит бус төсөөллийн тухай роман юм. 

Энэ бол бидний дунд бодитой оршин байгаа мөртөө байхгүй мэт, мэддэг юм шиг мөртөө үл мэдэх хятад үндэстний нэгээхэн хэсгийн тухай, тэдний үзэл бодол, хүлцэл хийгээд “дотор” санааны тухай зохиол юм.
Энэ бол хүн чанар хийгээд буян, нүглийн дэнс үндэс угсаа үл харгалзан хэнийг ч онч мэргэн шийтгэж, басхүү соёрхон урамшуулдаг тухай бүтээл юм. 

Энэ бол соёл уламжлалын ялгаа, сүсэг бишрэлийн хил заагийн тухай ном юм. Бидний эрээлж цээрлэдэг юмс бусдын амьдрах эх үүсвэр болж, бидний алдаа оноо бусдын тэрслэх шалтгаан болдгийг харуулсан туурвил мөн.
Харь санаатнууд Монголыг монгол биш болгох санааг хэрхэн сэдэж, эд хөрөнгө хураахын төлөө юу ч хийхээс буцдаггүй байсан нь өнөө цагт хэлбэр дүрсээ хувирган гадаадын том улсуудаас бидний зүг чиглүүлж буй зөөлөн хүчний бодлогын тухай бүтээл юм. 

Энэ бол ер хүний сэтгэлийн тухай зохиол юм. Хятад хүний Күнзийг ойлгох, суртал юуг нь амьдралд хэрэгжүүлэх итгэлийнх нь тухай, нэгэнт тогтсон чиг байх аваас алдаа оноог юман чинээ үл тоон зүтгэх тэнэглэлийн тухай ном юм.
Энэ бол монгол охид бүсгүйчүүд үр үндсээ цэвэр байлгахгүй бол, түүнчлэн эх оронч сэтгэл зүрх билиг оюунаас ангид одвол алсдаа юунд хүргэж болохыг харуулсан зохиол юм.
Энэ бол хүний өвөрмөц шинж, гойд чадварын агаарт сүлэгдсэн домог мэт амьдралын тухай ном юм аа.
Д.Гүн-Үйлс
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
АТГ-ын дарга Х.Энхжаргалыг огцруулах шаардлагатай юу?
  • Шаардлагатай
  • Шаардлагагүй
  • Мэдэхгүй