Прокуророос экс Ерөнхий сайдуудыг суллуулах хүсэлт гаргажээ
2018 оны 6 сарын 7
Дөрөвдүгээр сарын 10-нд Монгол Улсын Ерөнхий сайд асан С.Баяр, Ч.Сайханбилэг нарыг Оюутолгойн хөрөнгө оруулалтын болон Дубайн гэрээний асуудлаар АТГ-аас баривчлан саатуулж, ШШГЕГ-ын харъяа 461 дүгээр ангид хорьж, өнөөдрийг хүртэл суллаагүй. Экс Ерөнхий сайдуудыг хорьсон асуудал улс төрийн хүрээнд багагүй шүүмжлэл дагуулаад байгаа бөгөөд хорьж шалгах үндэслэлгүй гэх хүмүүс ч цөөнгүй байсан. 
Зарим хүмүүсийн зүгээс хуулийнхан орчин цагийн хэлмэгдүүлэлт эхлүүлэв үү гэсэн байр суурийг илэрхийлж байв. Тэгвэл тэдний цагдан хорионы асуудлаар Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүх өнөөдөр хуралдахаар болжээ. Шүүх прокуророос ирсэн хүсэлтийг өнөөдөр хэлэлцэх юм байна. Нийслэлийн прокурорын газраас С.Баяр, Ч.Сайханбилэг нарын цагдан хорих таслан сэргийлэх арга хэмжээг өөрчилж хязгаарлалт тогтоох санал ирүүлсэн байна. Тодруулбал, тэдэнд хилийн хорио тавьж, батлан даалтад гаргах санал хүргүүлжээ. Тэд эрүүл мэндийн шалтгаанаар II эмнэлэгт хэвтэн эмчлүүлж байгаа бөгөөд Ч.Сайханбилэг өчигдөр хагалгаанд орсон. Тэдний эрүүл мэнд сайжирсан гэх мэдээллийг тус эмнэлгээс өгөөд байгаа юм. 

Ерөнхий сайд асан Ч.Сайханбилэгийн өмгөөлөгч өмнө нь "2018 оны дөрөвдүгээр сарын 10-ны өдөр 15.00 цагт Ч.Сайханбилэгийг гэрчээр асууна гэж АТГ-аас дуудсан. Манай үйлчлүүлэгч Ч.Сайханбилэг АТГ дуудсан цагт, дуудсан хугацаанд нь очсон. Ч.Сайханбилэг нь Ерөнхий сайд байсны хувь энэ хүн төрийн тусгай хамгаалалтад байх ёстой. Учир нь Засгийн газрын тухай хууль болон Төрийн тусгай хамгаалалтын хууль гэж байна. Энэ хууль буугаагүй байхад төрийн хамгаалалтад байгаа хүний зөвхөн шүүхийн шийдвэрийн дагуу баривчилдаг. Төрийн тусгай хамгаалалтын хугацаа 4 жил хүчинтэй байдаг. Энэ хуулийг зөрчиж баривчилсан" гэсэн бол С.Баярын өмгөөлөгч А.Ариунаа "Өмгөөлөгчийн хувьд миний үйлчлүүлэгч С.Баярыг 2018 оны дөрөвдүгээр сарын 10-ны өдрийн 18:00 цагийн үед шүүгчийн зөвшөөрөлгүй баривчилсан. 

Ингэхдээ гэмт хэргийн баримт нотолгоог гээх, үрэгдүүлэх, устгах, зөөвөрлөх гэсэн үндэслэлээр цагдан хорьсон. С.Баярыг баривчилсан гол зүйл нь Оюутолгойн гэрээтэй холбоотой асуудал. Оюултолгойн гэрээг байгуулснаар энэ хүн их хэмжээний авлигал авсан гэж 10 гаруй жил ярьж байна. Оюутолгойн гэрээтэй холбоотой бүх бичиг баримт өнөөдөр Засгийн газрын хэрэг эрхлэх газрын архивт хадгалагдаж байгаа. Гэтэл түүнийг зөөвөрлөх, устгах, үрэгдүүлэх боломжтой гэсэн үндэслэлээр баривчилсан нь буруу" гэсэн тайлбар өгч байсан юм. 
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
У.Хүрэлсүхийн Засгийн газрын үйл ажиллагаанд та сэтгэл хангалуун байна уу?
  • Тийм
  • Дунд зэрэг
  • Явцгүй байна