Ц.Сандуй нарыг МАН-ын Бага хурлын гишүүнээс хөөх үү
2018 оны 8 сарын 6
Өнөөдөр МАН-ын Бага хурал хуралдах юм. Өнгөрсөн долоо хоногт тус намын Удирдах зөвлөл хуралдаж, намын Бага хурлаа хуралдуулах тов гаргасан. Тус намын Бага хурлаар Хэнтийн 42 дугаар тойрогт явагдах нөхөн сонгуульд хэнийг нэр дэвшүүлэх талаар голчлон ярилцах ч гишүүдийнхээ ёс зүй, намын эв нэгдэл, “60 тэрбум”-ын асуудал зэрэг олны анхаарлыг татсан олон асуудлыг ч орхихгүй мэдээлэл байна.

МАН-ын Хяналтын хорооноос Ц.Сандуй, А.Ганбаатар, УИХ-ын дарга М.Энхболд нарт ёс зүйн хариуцлага тооцох асуудлыг Удирдах зөвлөлдөө танилцуулахаар болжээ. Энэ нь тус нам “60 тэрбум”-ын бичлэгийг хүлээн зөвшөөрсөн хэрэг боллоо гэж ажиглагчид үзэж байна.

МАН-ын Хяналтын хорооны дарга Д.Батбаатар “60 тэрбум”-ын бичлэгт бичигдсэн яриа амьдрал дээр хэрэгжээгүй ч намын нэр хүндийг унагаасан хүмүүст хариуцлага тооцох нь зүйтэй гэж үзсэн. Цаашид “60 тэрбум”-ын бичлэгээр улс төр хийх нь явуургүй болсон” хэмээн мэдэгдсэн билээ.

Зарим эх сурвалж мэдээлэхдээ “МАН өнөөдрийн  Бага хурлаараа М.Энхболдод ёс зүйн хариуцлага хүлээлгэж, Ц.Сандуй, А.Ганбаатар нарыг Бага хурлын гишүүнээсээ чөлөөлж болзошгүй байна” гэв.

МАН-ын хувьд Хэнтийн 42 дугаар тойргийн нөхөн сонгуульд эдүгээ тус аймгийн Засаг даргаар ажиллаж буй Н.Ганбямбыг сойх мэдээлэл байгаа юм.

Дашрамд дурдахад, энэ долоо хоногт АН хуралдаж, тус тойргийн нөхөн сонгуульд оролцох эсэхээ шийдэх ажээ. МАХН-ын хувьд өнгөрсөн долдугаар сарын 7-нд Бага чуулганаа хуралдуулж, Хэнтий аймгийн 42 дугаар тойргийн нөхөн сонгуульд оролцохоо албан ёсоор мэдээлсэн билээ.

Нөхөн сонгуульд оролцох нам, эвсэл наймдугаар сарын 8-наас өмнө хуульд заасан бичиг баримтуудыг Сонгуулийн ерөнхий хороонд хүргүүлэх ёстой.
Эх сурвалж: Medee.mn
Эх сурвалж www.wikimon.mn
Д.Туяа
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
У.Хүрэлсүхийн Засгийн газрын үйл ажиллагаанд та сэтгэл хангалуун байна уу?
  • Тийм
  • Дунд зэрэг
  • Явцгүй байна